Mwanzo 1

1Mwanzoni, Mungu aliumba mbingu na dunia. 2Dunia ilikuwa bila umbo na tupu. Giza lilitanda juu ya kilindi cha maji, na Roho wa Mungu alikuwa akielea juu ya maji. 3Mungu akasema, “Kuwe na nuru,” nayo nuru ikatokea. 4Mungu akaona kwamba nuru ni njema, akaitenganisha nuru na giza. 5Mungu akaipa nuru jina Mchana, na giza akalipa jina Usiku. Jioni ikaja, kisha asubuhi: siku ya kwanza.

6Mungu akasema, “Kuwe na kuba katikati ya maji, ili liyatenganishe maji haya na maji yale.” 7Basi Mungu akalifanya kuba, akayatenganisha maji yaliyokuwa chini yake na maji yaliyokuwa juu yake. Ndivyo ilivyokuwa. 8Mungu akalipa kuba jina Anga. Jioni ikaja, kisha asubuhi: siku ya pili.

9Kisha Mungu akasema, “Maji yaliyo chini ya anga yakutane mahali pamoja, na nchi kavu ijitokeze.” Ndivyo ilivyokuwa. 10Mungu akaipa nchi kavu jina Nchi, na maji yaliyokusanyika akayapa jina Bahari. Mungu akaona kwamba ni vyema. 11Kisha Mungu akasema, “Nchi itoe mimea ya kijani: mimea inayozaa mbegu, na miti juu ya nchi inayozaa matunda yenye mbegu ndani yake, kila mmea na kila mti kulingana na aina yake.” Ndivyo ilivyokuwa. 12Nchi ikatoa mimea ya kijani: mimea inayozaa mbegu, kila mmea kulingana na aina yake, na miti inayozaa matunda yenye mbegu ndani yake, kila mti kulingana na aina yake. Mungu akaona kwamba ni vyema. 13Jioni ikaja, kisha asubuhi: siku ya tatu.

14Kisha Mungu akasema, “Kuwe na mianga katika kuba la anga ili kutenganisha mchana na usiku. Iwe ishara za kuonyesha nyakati zilizoamriwa, siku na miaka, 15na iangaze katika kuba la anga ili kuipa dunia nuru.” Ndivyo ilivyokuwa. 16Mungu akafanya mianga miwili mikubwa: mkubwa zaidi kwa ajili ya kutawala mchana, na mdogo zaidi kwa ajili ya kutawala usiku. Akafanya pia nyota. 17Mungu akaiweka katika kuba la anga ili kuipa dunia nuru, 18itawale mchana na usiku, na kutenganisha nuru na giza. Mungu akaona kwamba ni vyema. 19Jioni ikaja, kisha asubuhi: siku ya nne.

20Kisha Mungu akasema, “Maji yajae tele makundi ya viumbe hai, na ndege waruke juu ya dunia, katika kuba lote la anga.” 21Basi Mungu akaumba viumbe vikubwa vya baharini, na kila aina ya kiumbe hai kinachosogea na kujaa tele majini, na kila aina ya ndege mwenye mabawa. Mungu akaona kwamba ni vyema. 22Mungu akawabariki, akisema, “Zaeni mwe wengi, myajaze maji ya bahari; nao ndege wawe wengi kote duniani.” 23Jioni ikaja, kisha asubuhi: siku ya tano.

24Kisha Mungu akasema, “Nchi itoe viumbe hai, kila kimoja kulingana na aina yake: wanyama wa kufugwa, viumbe vinavyotambaa ardhini, na wanyama wa porini, kila kimoja kulingana na aina yake.” Ndivyo ilivyokuwa. 25Mungu akawafanya wanyama wa porini, kila mmoja kulingana na aina yake, wanyama wa kufugwa kulingana na aina zao, na kila kiumbe kinachotambaa ardhini kulingana na aina yake. Mungu akaona kwamba ni vyema. 26Kisha Mungu akasema, “Tuwafanye binadamu kwa sura yetu, wafanane nasi. Wawe watawala wa samaki wa baharini na ndege wa angani, wa wanyama wa kufugwa na dunia yote, na wa kila kiumbe kinachotambaa ardhini.” 27Hivyo Mungu akaumba binadamu kwa sura yake. Kwa sura ya Mungu alimwumba; aliwaumba wa kiume na wa kike. 28Mungu akawabariki, akawaambia, “Zaeni mwe wengi. Ijazeni dunia na kuiweka chini ya mamlaka yenu. Tawaleni samaki wa baharini, ndege wa angani, na kila kiumbe hai kinachotembea ardhini.” 29Mungu akasema, “Pokeeni: ninawapa kila mmea unaozaa mbegu juu ya uso wa dunia yote, na kila mti wenye mbegu ndani ya tunda lake. Vitakuwa chakula chenu, 30na kwa wanyama wote wa porini, ndege wote wa angani, na viumbe vyote vinavyotambaa ardhini, kwa kila chenye uhai ndani yake, mimea ya kijani itakuwa chakula.” Ndivyo ilivyokuwa. 31Mungu akatazama kila kitu alichokuwa amefanya, na kweli kilikuwa chema mno. Jioni ikaja, kisha asubuhi: siku ya sita.