Mwanzo 2

1Hivyo mbingu na dunia zikakamilika, pamoja na vyote vilivyomo. 2Siku ya saba Mungu akaifikisha mwisho kazi aliyokuwa akiifanya, na siku hiyo ya saba akaacha kazi yote aliyokuwa ameifanya. 3Mungu akaibariki siku ya saba na kuitenga kuwa takatifu, kwa kuwa siku hiyo alipumzika baada ya kazi yake yote, yote ambayo Mungu aliyaumba na kuyafanya.

4Hii ndiyo habari ya mbingu na dunia jinsi zilivyoumbwa. Wakati BWANA Mungu alipofanya dunia na mbingu, 5hakuna kichaka cha porini kilichokuwa kimeota bado duniani, wala mmea wowote wa shambani ulikuwa haujachipuka, kwa sababu BWANA Mungu alikuwa bado hajanyeshea dunia mvua, na hapakuwa na mtu wa kuilima ardhi. 6Badala yake, maji yalikuwa yakibubujika kutoka chini ya dunia na kulowesha uso wote wa ardhi. 7Kisha BWANA Mungu akamfinyanga mtu kwa mavumbi ya ardhi. Akapuliza pumzi ya uhai ndani ya pua zake, naye mtu akawa kiumbe hai. 8BWANA Mungu akapanda bustani katika Edeni, kuelekea mashariki, na huko akamweka yule mtu aliyemfinyanga. 9Kutoka ardhini BWANA Mungu akaotesha kila aina ya mti unaopendeza kuutazama na wenye matunda mazuri ya kula. Katikati ya bustani kulikuwa na mti wa uzima, na mti wa kujua mema na mabaya. 10Mto ulitiririka kutoka Edeni kuinywesha bustani, na kutoka huko ukagawanyika kuwa matawi manne. 11Wa kwanza unaitwa Pishoni. Unapita katika nchi yote ya Havila, ambako kuna dhahabu. 12Dhahabu ya nchi hiyo ni nzuri, na huko pia kunapatikana utomvu wenye harufu nzuri na jiwe la shohamu. 13Mto wa pili unaitwa Gihoni. Unapita katika nchi yote ya Kushi. 14Mto wa tatu unaitwa Tigri. Unatiririka upande wa mashariki wa Ashuru. Na mto wa nne ni Frati. 15BWANA Mungu akamchukua mtu, akamweka akae katika bustani ya Edeni, aishughulikie na kuitunza. 16BWANA Mungu akampa mtu agizo hili: “Waweza kula kadiri upendavyo matunda ya mti wowote wa bustani, 17lakini usile kutoka mti wa kujua mema na mabaya, kwa sababu siku utakapokula kutoka kwake, bila shaka utakufa.” 18Kisha BWANA Mungu akasema, “Si vizuri mtu kuwa peke yake. Nitamfanyia msaidizi anayemfaa kikamilifu.” 19Basi BWANA Mungu akafinyanga kutoka ardhini kila mnyama wa porini na kila ndege wa angani, akawaleta kwa mtu ili aone atawapa majina gani. Jina lolote ambalo mtu alimpa kila kiumbe hai, hilo likawa jina lake. 20Mtu akawapa majina wanyama wote wa kufugwa, ndege wa angani na kila mnyama wa porini. Lakini kwa ajili ya mtu hakupatikana msaidizi anayemfaa kikamilifu. 21Basi BWANA Mungu akamfanya mtu alale usingizi mzito, na alipokuwa amelala, akaondoa mojawapo ya mbavu zake, akaziba mahali pale kwa nyama. 22Kisha BWANA Mungu akamjenga mwanamke kutoka ule ubavu aliouchukua kwa mtu, akamleta kwake. 23Mtu akasema, “Hatimaye, huyu hapa ni mfupa wa mifupa yangu na nyama ya nyama yangu! Ataitwa Mwanamke, kwa sababu alitolewa ndani ya Mwanamume.” 24Hii ndiyo sababu mwanamume huwaacha baba na mama yake na kuambatana na mke wake, nao huwa mwili mmoja. 25Wote wawili, mtu na mke wake, walikuwa uchi, lakini hawakuona aibu.