Mwanzo 26

1Njaa iliingia tena nchini, ya pili baada ya ile ya wakati wa Abrahamu, naye Isaka akaenda Gerari, kwa Abimeleki mfalme wa Wafilisti. 2Huko BWANA akamtokea Isaka, akasema, “Usishuke Misri. Kaa katika nchi yoyote nitakayokutajia. 3Endelea kuishi katika nchi hii kama mgeni, nami nitakuwa pamoja nawe na kukubariki. Wewe na wazao wako ndio nitakaowapa maeneo haya yote, nami nitakitimiza kiapo nilichomwapia baba yako Abrahamu. 4Nitawafanya wazao wako wawe wengi kama nyota za angani na kuwapa nchi hizi zote, na kupitia wazao wako kila taifa duniani litapata baraka, 5kwa sababu Abrahamu alifanya kama nilivyomwambia, akatunza yote niliyompa ayashike: amri zangu, kanuni zangu na mafundisho yangu.” 6Basi Isaka akaishi Gerari. 7Wanaume wa mahali pale walipomwuliza habari za mke wake, alijibu, “Ni dada yangu.” Aliogopa kusema kwamba ni mke wake, akifikiri, “Huenda wakaniua hapa kwa ajili ya Rebeka,” kwa kuwa alikuwa mwanamke mrembo. 8Isaka alipokuwa amekaa huko kwa muda, Abimeleki mfalme wa Wafilisti alichungulia dirishani, akamwona Isaka akimbembeleza mkewe Rebeka. 9Abimeleki alimwita Isaka, akasema, “Kumbe ni mke wako! Kwa nini ulituambia ni dada yako?” Isaka akajibu, “Niliogopa mtu angeniua kwa ajili yake.” 10Abimeleki akasema, “Umetutendea jambo gani hili! Kidogo tu, mmoja wa watu angelala na mke wako, nawe ungetufanya sote kuwa na hatia.” 11Basi Abimeleki akawaonya watu wake wote, “Yeyote atakayemgusa mtu huyu au mke wake lazima auawe.” 12Isaka alipanda nafaka katika nchi ile, na mwaka ule akavuna mara mia ya alichopanda. BWANA alimbariki. 13Basi Isaka akawa mkuu. Akazidi kuwa mkuu zaidi na zaidi, hata akawa mtu mwenye utajiri mwingi mno. 14Akawa na makundi ya kondoo na mbuzi, na makundi ya ng’ombe, na watumishi wengi, hata Wafilisti wakamwonea wivu. 15Wafilisti walikuwa wamevifukia visima vyote ambavyo watumishi wa baba yake walichimba wakati Abrahamu alipokuwa hai, wakavijaza udongo. 16Kisha Abimeleki akamwambia Isaka, “Nenda ukaishi mbali nasi; umekuwa na nguvu nyingi kuliko sisi.” 17Basi Isaka akahama, akapiga kambi katika bonde la Gerari, akaishi huko. 18Isaka akavichimbua tena visima vya maji vya wakati wa baba yake Abrahamu, ambavyo Wafilisti walikuwa wamevifukia baada ya Abrahamu kufa, akaviita kwa majina yale yale aliyotumia baba yake. 19Watumishi wa Isaka walichimba bondeni, wakapata kisima cha maji safi yanayobubujika. 20Lakini wachungaji wa Gerari wakabishana na wachungaji wa Isaka, wakisisitiza, “Maji haya ni yetu.” Basi akakiita kisima kile Eseki, “Ugomvi”, kwa sababu ya ugomvi waliouzusha naye. 21Wakachimba kisima cha pili, nacho pia kikazusha ugomvi, kwa hiyo akakiita Sitna, “Uadui”. 22Akaondoka huko, akachimba kisima kingine tena, na safari hii hakuna aliyegombana juu yake. Akakiita Rehobothi, “Nafasi Pana”, akisema, “Sasa hatimaye BWANA ametupa nafasi, nasi tutazaa matunda katika nchi hii.” 23Kutoka huko akapanda kwenda Beer-sheba. 24Usiku ule BWANA akamtokea Isaka. “Mimi ni Mungu wa baba yako Abrahamu,” akasema. “Huna sababu ya kuogopa, kwa kuwa mimi niko pamoja nawe. Kwa ajili ya Abrahamu mtumishi wangu nitakubariki na kuwafanya wazao wako kuwa wengi.” 25Isaka akajenga madhabahu huko, akaliitia jina la BWANA. Akapiga hema lake huko, na watumishi wake wakaanza kuchimba kisima. 26Kisha Abimeleki akaja kutoka Gerari kumwona, pamoja na mshauri wake Ahuzathi na Fikoli, jemadari wa jeshi lake. 27Isaka akawauliza, “Kwa nini mmekuja kwangu? Mlinichukia na kunifukuza.” 28Wakajibu, “Ni wazi kwetu kwamba BWANA amekuwa pamoja nawe. Kwa hiyo tuliwaza, ‘Pande zote mbili, sisi na wewe, tufungwe kwa kiapo.’ Tunataka kufanya agano nawe, 29kwamba hutatudhuru, kwa kuwa sisi hatukukugusa; hatukukutendea chochote ila mema, tukakuaga uende kwa amani. Sasa wewe ndiye ambaye BWANA amembariki.” 30Isaka akawaandalia karamu, nao wakala na kunywa. 31Kesho yake waliamka asubuhi na mapema, wakafungana kwa kiapo wao kwa wao. Kisha Isaka akawaaga, nao wakaachana naye kwa amani. 32Siku ile ile watumishi wa Isaka walikuja kumpa habari za kisima walichokuwa wakichimba. “Tumefikia maji!” wakamwambia. 33Akakiita Shiba, “Kiapo”, na ndiyo sababu mji huo unaitwa Beer-sheba mpaka leo.

34Esau alipokuwa na miaka arobaini alioa wake wawili, wote wawili Wahiti: Yudithi binti Beeri, na Basemathi binti Eloni. 35Wake hao waliyafanya maisha ya Isaka na Rebeka kuwa machungu.