Mwanzo 19

1Ilikuwa jioni malaika wale wawili walipofika Sodoma. Lutu alikuwa ameketi kwenye lango la mji; mara alipowaona, aliinuka kuwalaki, akainama mpaka uso wake ukagusa ardhi. 2“Tafadhali, mabwana wangu,” akasema, “karibuni nyumbani kwa mtumishi wenu. Mnawe miguu na mlale hapa, kisha kesho asubuhi na mapema mtaendelea na safari yenu.” Wakajibu, “Hapana, tutalala nje uwanjani usiku huu.” 3Lakini aliendelea kuwasihi mpaka wakakubali kwenda pamoja naye, wakaingia nyumbani mwake. Akawaandalia chakula, akaoka mikate isiyo na chachu, nao wakala. 4Walikuwa bado hawajalala, ndipo wanaume wa mji, wanaume wa Sodoma, wakaizingira nyumba. Vijana kwa wazee, wanaume wote kutoka kila mtaa wa mji walikuwapo. 5Wakamwita Lutu kwa sauti, “Wako wapi wale wanaume waliokuja kulala kwako usiku huu? Watoe nje kwetu. Tunataka kulala nao.” 6Lutu alitoka nje kuwaendea pale mlangoni, akafunga mlango nyuma yake. 7“Rafiki zangu,” akasema, “nawasihi msifanye uovu huu. 8Sikilizeni, ninao binti wawili ambao hawajawahi kulala na mwanamume. Niwaletee nje, nanyi mwafanyie lolote mtakalo. Lakini wanaume hawa msiwafanyie chochote, kwa sababu wamekuja chini ya ulinzi wa paa langu.” 9Wakapiga kelele, “Ondoka njiani!” Wakasema, “Mtu huyu alikuja hapa kama mgeni, na sasa anataka kujifanya hakimu! Tutakutenda vibaya zaidi kuliko wao.” Wakamsukuma Lutu kwa nguvu, wakasogea karibu ili kuuvunja mlango. 10Lakini wale wanaume wawili waliokuwa ndani walinyosha mikono, wakamvuta Lutu ndani ya nyumba pamoja nao, wakafunga mlango. 11Kisha wakawapiga wale wanaume waliokuwa mlangoni kwa mwanga uliowapofusha, wote, vijana kwa wazee, hata wakapapasa bure wakiutafuta mlango. 12Kisha wale wanaume wakamwambia Lutu, “Je, unaye mtu mwingine hapa? Wakwe, wana, binti, au mtu yeyote mwingine wa kwako mjini? Watoe mahali hapa, 13kwa sababu tutauangamiza. Kilio dhidi ya watu wake kimekuwa kikubwa mno mbele za BWANA, hata yeye ametutuma tuuangamize mji huu.” 14Basi Lutu alitoka, akawaambia wanaume waliokuwa wamewaposa binti zake, “Haraka, ondokeni mahali hapa! BWANA anakwenda kuuangamiza mji!” Lakini wakwe zake wakadhani hakuwa akisema kwa dhati. 15Kulipokuwa kunapambazuka, malaika walimhimiza Lutu aharakishe. Wakasema, “Inuka! Mchukue mkeo na binti wawili walio hapa pamoja nawe, la sivyo utafagiliwa mbali mji utakapoadhibiwa.” 16Alipoendelea kusita, wale wanaume walimshika mkono, pamoja na mkewe na binti zake wawili, kwa sababu BWANA alimhurumia. Wakamtoa, wakamwacha nje ya mji. 17Walipokwisha kuwatoa nje, mmoja wao alisema, “Kimbia uokoe maisha yako! Usitazame nyuma wala usisimame popote katika uwanda. Kimbilia milimani, la sivyo utafagiliwa mbali!” 18Lakini Lutu akawaambia, “Tafadhali, bwana wangu, isiwe hivyo! 19Umemfadhili mtumishi wako, ukanionyesha huruma kuu kwa kuniokoa maisha. Lakini siwezi kufika mpaka milimani. Maafa yatanipata kabla sijafika huko, nami nitakufa. 20Kuna mji ulio karibu ninaoweza kuufikia, nao ni mdogo tu. Tafadhali niache nikimbilie huko. Ni mdogo sana, sivyo? Hapo nitaishi.” 21Akajibu, “Vema. Nitakukubalia ombi hili pia. Sitauangamiza mji huo unaousema. 22Lakini fanya haraka ufike huko, kwa sababu siwezi kufanya kitu mpaka utakapofika.” Ndiyo sababu mji huo ukaitwa Soari. 23Lutu alipofika Soari, jua lilikuwa limekwisha kuchomoza juu ya nchi. 24Kisha BWANA aliinyeshea Sodoma na Gomora kiberiti kinachowaka moto. Kilitoka kwa BWANA, kutoka angani. 25Hivyo akaipindua miji ile pamoja na uwanda wote, na wote walioishi katika miji hiyo, na kila mmea uliomea huko. 26Lakini mke wa Lutu, aliyekuwa akimfuata nyuma, alitazama nyuma, akageuka kuwa nguzo ya chumvi. 27Kesho yake asubuhi na mapema Abrahamu alirudi mahali pale alipokuwa amesimama mbele za BWANA. 28Akatazama chini kuelekea Sodoma na Gomora na nchi yote ya uwanda, akaona moshi ukipanda kutoka ardhini kama moshi wa tanuru. 29Hivyo Mungu alipoiangamiza miji ya uwanda, alimkumbuka Abrahamu, akamtoa Lutu katika maafa yaliyoipindua miji ambamo Lutu alikuwa ameishi. 30Baadaye Lutu aliondoka Soari, akaenda kuishi milimani pamoja na binti zake wawili, kwa sababu aliogopa kukaa Soari. Yeye na binti zake wawili wakaishi pangoni. 31Siku moja binti mkubwa alimwambia mdogo wake, “Baba yetu anazeeka, na hakuna mwanamume yeyote hapa karibu wa kutuoa na kutupa watoto, kama ilivyo desturi kila mahali. 32Njoo, tumpe baba yetu divai anywe, kisha tulale naye. Hivyo tutaudumisha ukoo wa baba yetu.” 33Usiku ule walimpa baba yao divai anywe, na binti mkubwa akaingia akalala naye. Hakutambua alipolala wala alipoamka. 34Kesho yake binti mkubwa akamwambia mdogo wake, “Jana usiku nililala na baba yangu. Tumpe tena divai usiku huu, nawe uingie ulale naye. Hivyo sisi wawili tutaudumisha ukoo wa baba yetu.” 35Hivyo usiku ule pia walimpa baba yao divai, na binti mdogo akaenda akalala naye. Tena hakutambua alipolala wala alipoamka. 36Hivyo binti wote wawili wa Lutu walipata mimba kwa baba yao mwenyewe. 37Binti mkubwa alizaa mwana, akamwita Moabu. Yeye ndiye baba wa Wamoabu waliopo leo. 38Binti mdogo naye alizaa mwana, akamwita Ben-ami. Yeye ndiye baba wa Waamoni waliopo leo.