Mwanzo 20

1Abrahamu aliondoka huko kwenda nchi ya kusini ya Negebu. Akakaa kati ya Kadeshi na Shuri, na kwa muda akaishi kama mgeni huko Gerari. 2Huko Abrahamu alisema juu ya mke wake Sara, “Huyu ni dada yangu.” Basi Abimeleki, mfalme wa Gerari, akatuma watu wamlete Sara, akamchukua awe katika nyumba yake. 3Lakini usiku ule Mungu alimjia Abimeleki katika ndoto, akamwambia, “Wewe ni sawa na mtu aliyekufa, kwa sababu ya mwanamke uliyemchukua. Yeye tayari ana mume.” 4Abimeleki alikuwa hajamgusa. Akasema, “Bwana, je, utawaua watu wasio na hatia? 5Ni yeye aliyeniambia, ‘Huyu ni dada yangu,’ naye mwenyewe akasema, ‘Huyu ni kaka yangu.’ Nilifanya hivi kwa moyo mnyofu na mikono safi.” 6Mungu akamjibu katika ndoto, “Ndiyo, najua ulitenda kwa moyo mnyofu, na ni mimi niliyekuzuia usitende dhambi dhidi yangu; ndiyo maana sikukupa nafasi ya kumgusa. 7Sasa mrudishie mtu huyu mke wake. Yeye ni nabii, naye atakuombea ili uishi. Lakini usipomrudisha, ujue hakika kwamba kifo kinakungoja wewe na wote walio wako.” 8Abimeleki aliamka alfajiri, akawaita maafisa wake wote, akawaeleza mambo hayo yote, nao wakaogopa sana. 9Kisha Abimeleki alimwita Abrahamu, akamwambia, “Umetufanyia nini? Nimekukosea nini mimi, hata ukaniingiza mimi na ufalme wangu katika dhambi kubwa namna hii? Umenitendea mambo ambayo mtu yeyote hapaswi kutendewa.” 10Abimeleki akamsisitizia, “Ulikuwa unawaza nini ulipofanya hivi?” 11Abrahamu akajibu, “Nilijisemea kwamba hakuna mtu hapa anayemcha Mungu, na kwamba wangeniua ili wamchukue mke wangu. 12Tena kwa hakika yeye ni dada yangu: ni binti wa baba yangu, ingawa mama yake ni mwingine. Kisha akawa mke wangu. 13Mungu aliponiondoa nyumbani kwa baba yangu nitangetange, nilimwomba anionyeshe uaminifu wake kwa kusema, kila mahali tulipokwenda, kwamba mimi ni kaka yake.” 14Kisha Abimeleki akampa Abrahamu kondoo na ng’ombe na watumishi, wanaume kwa wanawake, akamrudishia mke wake Sara. 15Abimeleki akasema, “Nchi yangu iko wazi kwako. Kaa popote unapopenda.” 16Akamwambia Sara, “Nimempa kaka yako karibu kilo 11.5 za fedha. Hiyo iwe ishara kwa wote walio pamoja nawe kwamba hukukosa. Mbele ya wote umeondolewa lawama.” 17Kisha Abrahamu alimwomba Mungu, naye Mungu akamrudishia Abimeleki afya, pamoja na mke wake na watumishi wake wa kike, wakaweza kuzaa watoto. 18Kwa kuwa, kwa sababu ya Sara mke wa Abrahamu, BWANA alikuwa amefunga kila tumbo la uzazi katika nyumba ya Abimeleki.