Mwanzo 30

1Raheli hakumzalia Yakobo watoto, na alipoona hivyo akamwonea dada yake wivu. Akamwambia Yakobo, “Nipe wana, la sivyo nitakufa!” 2Yakobo alimkasirikia Raheli, akasema, “Je, ninaweza kuchukua nafasi ya Mungu? Mungu ndiye aliyekuzuia usipate watoto.” 3Akasema, “Mchukue mtumishi wangu Bilha. Lala naye, ili azae juu ya magoti yangu, nami pia nipate jamaa kupitia yeye.” 4Basi Raheli akampa Yakobo mtumishi wake Bilha kuwa mke, naye Yakobo akalala naye. 5Bilha alipata mimba, akamzalia Yakobo mwana. 6Raheli akasema, “Mungu amehukumu shauri langu na amesikia kilio changu, naye amenipa mwana.” Ndiyo sababu akamwita Dani. 7Bilha, mtumishi wa Raheli, alipata mimba tena, akamzalia Yakobo mwana wa pili. 8Kisha Raheli akasema, “Nimeshindana vikali na dada yangu, nami nimeshinda.” Basi akamwita Naftali. 9Lea alipoona kwamba ameacha kuzaa, akampa Yakobo mtumishi wake Zilpa kuwa mke. 10Zilpa, mtumishi wa Lea, alimzalia Yakobo mwana. 11Lea akasema, “Bahati imenijia!” Akamwita Gadi. 12Kisha Zilpa, mtumishi wa Lea, akamzalia Yakobo mwana wa pili. 13Lea akasema, “Nina furaha kweli! Wanawake kila mahali watazungumza juu ya furaha yangu.” Basi akamwita Asheri. 14Wakati wa mavuno ya ngano Reubeni alikuwa shambani, akaona tunguja, akampelekea mama yake Lea. Raheli akamwomba Lea, “Tafadhali nipe baadhi ya tunguja alizoleta mwanao.” 15Lakini Lea akajibu, “Je, ni jambo dogo kwako kwamba umemchukua mume wangu? Sasa unataka kuchukua pia tunguja za mwanangu?” Raheli akasema, “Basi Yakobo atalala nawe usiku huu; hiyo ndiyo bei ya tunguja za mwanao.” 16Jioni Yakobo alipokuwa akirudi kutoka shambani, Lea akatoka kumlaki, akasema, “Usiku huu utakuja kwangu. Nimekulipia kwa tunguja za mwanangu.” Naye akalala naye usiku ule. 17Mungu alisikia maombi ya Lea. Akapata mimba, akamzalia Yakobo mwana wa tano. 18Lea akasema, “Mungu amenipa ujira wangu kwa kumpa mume wangu mtumishi wangu.” Basi akamwita Isakari. 19Lea alipata mimba mara nyingine, akamzalia Yakobo mwana wa sita. 20Lea akasema, “Mungu amenipa zawadi ya thamani. Sasa hatimaye mume wangu ataniheshimu, kwa kuwa nimemzalia wana sita.” Basi akamwita Zabuloni. 21Baadaye alizaa binti, akamwita Dina. 22Kisha Mungu alimkumbuka Raheli. Akasikia maombi yake, akalifungua tumbo lake. 23Alipata mimba, akazaa mwana, akasema, “Mungu ameniondolea aibu yangu.” 24Akamwita Yusufu, kwa maana alisema, “BWANA na aniongezee mwana mmoja zaidi.” 25Baada ya Raheli kumzaa Yusufu, Yakobo alimwambia Labani, “Niruhusu niondoke sasa, ili nirudi nyumbani kwangu na katika nchi yangu. 26Niruhusu niwachukue wake zangu na watoto wangu, ambao niliwatumikia kwa ajili yao, niende zangu. Wewe mwenyewe unajua kazi niliyokufanyia.” 27Lakini Labani akamwambia, “Kama una nia njema kwangu, tafadhali kaa. Nimetambua kwa ishara za uaguzi kwamba BWANA amenibariki kwa sababu yako.” 28Akaendelea kusema, “Niambie unataka ujira gani, nami nitakupa.” 29Yakobo akajibu, “Unajua jinsi nilivyokutumikia, na jinsi mifugo yako ilivyostawi nilipokuwa nikiichunga. 30Kabla sijaja ulikuwa na kidogo tu, nacho kimeongezeka mara nyingi; BWANA amekubariki kila hatua niliyopiga. Lakini nitaiangalia lini jamaa yangu mwenyewe?” 31Labani akauliza, “Nikupe nini?” Yakobo akajibu, “Hakuna kitu. Kubali tu sharti moja, nami nitachunga tena makundi yako na kuyalinda. 32Leo nitapita katika makundi yako yote na kutenga kila mnyama mwenye madoadoa au mabaka: walio weusi kati ya wanakondoo, na wenye mabaka na madoadoa kati ya mbuzi. Hao ndio watakaokuwa ujira wangu. 33Baadaye uaminifu wangu utanishuhudia. Kila utakapokuja kukagua ujira wangu, ikiwa nina mbuzi yeyote asiye na madoadoa wala mabaka, au mwanakondoo yeyote asiye mweusi, unaweza kumhesabu kuwa ameibwa.” 34Labani akasema, “Sawa kabisa, na iwe kama unavyosema.” 35Lakini siku ile ile Labani aliwatenga beberu wenye milia au mabaka, mbuzi wa kike wenye madoadoa au mabaka, wote waliokuwa na weupe, na kila mwanakondoo mweusi, akawakabidhi wanawe. 36Kisha akawapeleka mbali, mwendo wa siku tatu kutoka kwa Yakobo, naye Yakobo akabaki akichunga makundi ya Labani yaliyosalia. 37Kisha Yakobo alichukua fimbo zilizokatwa karibuni za mpopla, za mlozi na za mwaramoni, akabambua magome yake kwa milia, akaufunua mti mweupe uliokuwa chini yake. 38Aliziweka fimbo zilizobambuliwa katika mabirika ya kunyweshea, mbele kabisa ya wanyama walipokuja kunywa, kwa maana walikuwa na hamu ya kupandana walipokuja kunywa. 39Makundi yalipandana mbele ya fimbo, na wana wao wakazaliwa na milia, madoadoa na mabaka. 40Yakobo aliwaweka wanakondoo mbali, lakini akawageuza wanyama watazame wale wenye milia na weusi katika kundi la Labani. Kwa njia hiyo akajipatia makundi yake mwenyewe, akayaweka mbali na ya Labani. 41Kila mara wanyama wenye nguvu zaidi walipopandana, Yakobo aliziweka fimbo katika mabirika mahali ambapo kundi lingeziona waziwazi, ili wapandane katikati ya fimbo; 42lakini wanyama dhaifu walipopandana, hakuziweka fimbo. Kwa njia hiyo wanyama dhaifu wakawa wa Labani, na wenye nguvu wakawa wa Yakobo. 43Hivyo Yakobo akazidi kutajirika. Akawa na makundi makubwa, watumishi wa kike na wa kiume, ngamia na punda.