Mwanzo 37

1Yakobo aliendelea kuishi katika nchi ambayo baba yake alikuwa ameishi kama mgeni, yaani nchi ya Kanaani. 2Hii ndiyo habari ya jamaa ya Yakobo. Yusufu alipokuwa na umri wa miaka kumi na saba, alikuwa akichunga makundi pamoja na ndugu zake, akiwasaidia wana wa Bilha na wa Zilpa, wawili kati ya wake za baba yake. Yusufu akampelekea baba yao habari zisizo njema kuwahusu. 3Israeli alimpenda Yusufu kuliko wana wake wengine wote, kwa kuwa alikuwa amempata katika uzee wake, naye akamshonea kanzu ndefu yenye mikono mirefu. 4Ndugu zake walipoona kwamba baba yao alimpenda kuliko wao wote, walimchukia kiasi kwamba hawakuweza kumwambia neno lolote la kirafiki. 5Kisha Yusufu aliota ndoto, na alipowasimulia ndugu zake, chuki yao juu yake ikazidi. 6“Sikilizeni ndoto hii niliyoota,” akawaambia. 7“Tulikuwa shambani tukifunga miganda ya nafaka, ghafla mganda wangu ukainuka ukasimama wima, nayo miganda yenu ikauzunguka na kuuinamia hadi chini.” 8Ndugu zake wakamjibu, “Kumbe unadhani utakuwa mfalme juu yetu? Utakuwa bwana wetu, sivyo?” Wakazidi kumchukia kwa sababu ya ndoto zake na jinsi alivyozisimulia. 9Kisha akaota ndoto ya pili, akawasimulia ndugu zake pia. Akasema, “Sikilizeni, nimeota ndoto nyingine. Safari hii jua, mwezi na nyota kumi na moja zilikuwa zikiniinamia.” 10Alipomsimulia baba yake pamoja na ndugu zake, baba yake akamkaripia, akasema, “Ndoto gani hii? Kweli mimi na mama yako na ndugu zako tutakuja kukuinamia hadi chini mbele yako?” 11Ndugu zake walimwonea wivu, lakini baba yake hakulisahau jambo alilosema. 12Wakati mmoja ndugu zake walikuwa wameenda kuchunga makundi ya baba yao karibu na Shekemu. 13Israeli akamwambia Yusufu, “Ndugu zako wanachunga makundi karibu na Shekemu, sivyo? Njoo, nataka kukutuma kwao.” Yusufu akajibu, “Niko tayari.” 14Akamwambia, “Nenda ukaone ndugu zako wanaendeleaje na makundi yako hali gani, kisha urudi uniambie.” Basi akamtuma kutoka bonde la Hebroni, naye Yusufu akaenda mpaka Shekemu. 15Mtu mmoja alimkuta akizungukazunguka mashambani, akamwuliza, “Unatafuta nini?” 16Akajibu, “Ninawatafuta ndugu zangu. Waweza kuniambia wanachunga makundi yao wapi?” 17Yule mtu akasema, “Wameshaondoka hapa. Niliwasikia wakisema, ‘Tuendelee mpaka Dothani.’” Basi Yusufu akawafuata ndugu zake, akawapata huko Dothani. 18Walimwona alipokuwa bado mbali, na kabla hajawafikia wakapanga njama ya kumwua. 19“Tazameni, yule bingwa wa ndoto anakuja,” wakaambiana. 20“Haya, tumwue sasa hivi tumtupe katika mojawapo ya mashimo haya ya maji. Tunaweza kusema kwamba mnyama mkali amemla. Ndipo tutakapoona ndoto zake zitaishia wapi!” 21Reubeni aliposikia hayo, alijaribu kumwokoa Yusufu mikononi mwao. Akasema, “Hatupaswi kumwua.” 22Reubeni akawaambia, “Msimwage damu yake. Mtupeni katika shimo hili la maji hapa nyikani, lakini msimguse kwa mkono.” Alikusudia kumwokoa mikononi mwao na kumrudisha kwa baba yake. 23Basi Yusufu alipowafikia ndugu zake, walimvua kanzu yake, ile kanzu ndefu yenye mikono mirefu aliyokuwa ameivaa, 24wakamkamata wakamtupa ndani ya shimo la maji. Shimo hilo lilikuwa tupu; halikuwa na maji ndani yake. 25Kisha wakaketi kula chakula. Walipoinua macho, waliona msafara wa Waishmaeli ukija kutoka Gileadi, ngamia wao wakiwa wamebeba utomvu wa miti, zeri na resini, wakivipeleka Misri. 26Yuda akawaambia ndugu zake, “Tutapata nini kwa kumwua ndugu yetu na kuificha damu yake? 27Afadhali tumwuze kwa Waishmaeli, tusimguse kwa mikono yetu. Hata hivyo, yeye ni ndugu yetu, ndugu yetu wa damu.” Ndugu zake wakakubali. 28Wafanyabiashara Wamidiani walipopita, walimvuta Yusufu kutoka katika shimo la maji, wakamwuza kwa Waishmaeli kwa karibu gramu 230 za fedha, nao wakampeleka Yusufu Misri. 29Reubeni aliporudi kwenye shimo la maji na kuona kwamba Yusufu hayumo, alirarua nguo zake kwa huzuni. 30Akarudi kwa ndugu zake, akasema, “Kijana ametoweka! Na mimi, nitafanya nini?” 31Wakaichukua kanzu ya Yusufu, wakachinja mwanambuzi, wakailowesha kanzu katika damu yake. 32Waliipeleka ile kanzu ndefu yenye mikono mirefu kwa baba yao pamoja na ujumbe huu: “Tumeiokota hii. Ichunguze uone kama ni kanzu ya mwanao au la.” 33Akaitambua mara moja. Akapiga kelele, “Ni kanzu ya mwanangu! Mnyama mkali amemla. Bila shaka Yusufu amechanwa vipande vipande!” 34Yakobo alirarua nguo zake, akajifunga gunia kiunoni, akamwombolezea mwanawe kwa muda mrefu. 35Wanawe wote na binti zake wote walikuja kumfariji, lakini hakukubali kufarijiwa. Akasema, “Hapana, nitashuka Kuzimu nikiwa bado ninamwombolezea mwanangu.” Basi baba yake akamlilia. 36Wakati huo Wamidiani walikuwa wamemwuza Yusufu huko Misri kwa Potifa, mmoja wa maafisa wa Farao, mkuu wa walinzi wake.