Mwanzo 11

1Wakati huo watu wote duniani walikuwa na lugha moja na msamiati mmoja. 2Watu walipokuwa wakihama kutoka mashariki, waliona uwanda katika nchi ya Shinari, wakaishi huko. 3Wakaambiana, “Njooni tutengeneze matofali na kuyachoma yawe magumu.” Walitumia matofali kama mawe, na lami kama chokaa. 4Kisha wakasema, “Njooni, tujijengee mji wenye mnara utakaofika mbinguni, ili tujipatie jina, tusije tukatawanyika duniani kote.” 5Lakini BWANA alishuka kuuona mji na mnara waliokuwa wakiujenga wanadamu. 6BWANA akasema, “Wao ni taifa moja lenye lugha moja, na huu ni mwanzo tu wa yale watakayofanya. Tangu sasa hakuna jambo watakaloazimia kufanya ambalo litakuwa nje ya uwezo wao. 7Njooni, tushuke tuivuruge lugha yao, ili wasielewane.” 8Hivyo BWANA aliwatawanya kutoka huko katika uso wa dunia nzima, wakaacha kujenga mji ule. 9Ndiyo sababu mji huo uliitwa Babeli, kwa kuwa huko BWANA aliivuruga lugha ya ulimwengu wote. Kutoka huko BWANA aliwatawanya katika uso wa dunia nzima.

10Hii ndiyo habari ya ukoo wa Shemu. Miaka miwili baada ya gharika, Shemu alipokuwa na umri wa miaka mia moja, alimzaa Arfaksadi. 11Baada ya Arfaksadi kuzaliwa, Shemu aliishi miaka 500, akazaa wana wengine wa kiume na wa kike.

12Arfaksadi alipokuwa ameishi miaka thelathini na mitano, alimzaa Shela. 13Baada ya Shela kuzaliwa, Arfaksadi aliishi miaka 403, akazaa wana wengine wa kiume na wa kike.

14Shela alipokuwa ameishi miaka thelathini, alimzaa Eberi. 15Baada ya Eberi kuzaliwa, Shela aliishi miaka 403, akazaa wana wengine wa kiume na wa kike.

16Eberi alipokuwa ameishi miaka thelathini na minne, alimzaa Pelegi. 17Baada ya Pelegi kuzaliwa, Eberi aliishi miaka 430, akazaa wana wengine wa kiume na wa kike.

18Pelegi alipokuwa ameishi miaka thelathini, alimzaa Reu. 19Baada ya Reu kuzaliwa, Pelegi aliishi miaka 209, akazaa wana wengine wa kiume na wa kike.

20Reu alipokuwa ameishi miaka thelathini na miwili, alimzaa Serugi. 21Baada ya Serugi kuzaliwa, Reu aliishi miaka 207, akazaa wana wengine wa kiume na wa kike.

22Serugi alipokuwa ameishi miaka thelathini, alimzaa Nahori. 23Baada ya Nahori kuzaliwa, Serugi aliishi miaka 200, akazaa wana wengine wa kiume na wa kike.

24Nahori alipokuwa ameishi miaka ishirini na tisa, alimzaa Tera. 25Baada ya Tera kuzaliwa, Nahori aliishi miaka 119, akazaa wana wengine wa kiume na wa kike.

26Baada ya Tera kuishi miaka sabini, aliwazaa Abramu, Nahori na Harani. 27Hii ndiyo habari ya jamaa ya Tera. Tera alikuwa baba wa Abramu, Nahori na Harani, naye Harani alikuwa baba wa Lutu. 28Harani alikufa wakati baba yake Tera alipokuwa bado hai, katika nchi alimozaliwa, huko Uru ya Wakaldayo. 29Abramu na Nahori wote wawili walioa. Mke wa Abramu aliitwa Sarai, na mke wa Nahori aliitwa Milka, binti wa Harani, aliyekuwa baba wa Milka na wa Iska. 30Basi Sarai alikuwa tasa; hakuwa na watoto. 31Tera alimchukua mwanawe Abramu, mjukuu wake Lutu mwana wa Harani, na mkaza mwana wake Sarai, mke wa mwanawe Abramu, nao kwa pamoja wakaondoka Uru ya Wakaldayo kwenda nchi ya Kanaani. Lakini walipofika Harani, wakakaa huko. 32Tera aliishi miaka 205, akafa huko Harani.