Mwanzo 18

1BWANA alimtokea Abrahamu karibu na miti mikubwa ya Mamre. Ilikuwa wakati wa joto kali la mchana, na Abrahamu alikuwa ameketi mlangoni pa hema lake. 2Aliinua macho akaona watu watatu wamesimama hatua kadhaa mbali. Alipowaona, akakimbia kutoka mlangoni pa hema kuwalaki, akasujudu hadi chini. 3“Bwana wangu,” akasema, “ikiwa umeridhika nami, tafadhali usimpite mtumishi wako bila kusimama. 4Niwaletee maji kidogo ili mnawe miguu; kisha pumzikeni hapa kivulini mwa mti. 5Nitaleta mkate kidogo ili mpate nguvu kabla ya kuendelea na safari yenu, kwa kuwa mmefika kwa mtumishi wenu.” Wakajibu, “Ndiyo, fanya kama ulivyopendekeza.” 6Abrahamu akaingia hemani haraka, akamwambia Sara, “Harakisha! Chukua kama lita 20 za unga laini, uukande, ufanye mikate.” 7Kisha akakimbia kwenye ng’ombe, akachagua ndama mchanga na mzuri, akampa mtumishi, naye akaharakisha kumpika. 8Akawaandalia maziwa mgando, maziwa na ndama aliyempika, akakaa karibu nao chini ya mti akiwahudumia walipokuwa wakila. 9Wakamwuliza, “Sara, mke wako, yuko wapi?” Akasema, “Yumo ndani ya hema.” 10Mgeni huyo akasema, “Nitarudi kwako majira haya yatakapofika tena, na mke wako Sara atakuwa na mwana.” Sara alikuwa akisikiliza mlangoni pa hema, nyuma yake. 11Abrahamu na Sara walikuwa wazee, wenye umri mkubwa sana, na Sara alikuwa amekoma kupata siku zake za mwezi. 12Sara akacheka kimoyomoyo, akajisemea, “Mimi niliyechakaa hivi, na mume wangu mzee, je, nitapata furaha hii?” 13Kisha BWANA akamwambia Abrahamu, “Kwa nini Sara amecheka? Kwa nini amesema, ‘Je, kweli nitazaa, mzee kama nilivyo?’ 14Je, kuna jambo la ajabu mno kwa BWANA? Wakati uliowekwa, majira haya yatakapofika tena, nitarudi kwako, na Sara atakuwa na mwana.” 15Sara akakana, akasema, “Sikucheka,” kwa sababu aliogopa. Lakini yeye akasema, “Umecheka.” 16Watu hao waliondoka kwenda zao, wakatazama chini kuelekea Sodoma, naye Abrahamu akatembea nao kwa muda kuwasindikiza. 17Kisha BWANA akasema, “Je, nimfiche Abrahamu lile ninalotaka kufanya? 18Abrahamu hakika atakuwa taifa kubwa, lenye watu wengi na nguvu, na kupitia yeye mataifa yote ya dunia yatapata baraka. 19Nimemteua ili awaagize watoto wake na jamaa yake baada yake kuifuata njia ya BWANA, wakitenda yaliyo mema na ya haki. Hivyo ndivyo BWANA atakavyomtimizia Abrahamu yale aliyosema juu yake.” 20Basi BWANA akasema, “Kilio cha kuomba msaada kinachopanda dhidi ya Sodoma na Gomora ni kikubwa, na dhambi yao ni nzito mno. 21Nitashuka nijionee mwenyewe kama matendo yao ni mabaya kama kilio kilichofika kwangu. Kama sivyo, nitajua.” 22Watu hao waliondoka hapo, wakashika njia kuelekea Sodoma, naye Abrahamu akabaki amesimama mbele za BWANA. 23Kisha Abrahamu akasogea mbele, akasema, “Je, kweli utaangamiza wasio na hatia pamoja na wenye hatia? 24Tuseme kuna watu hamsini wasio na hatia mjini. Je, bado utauangamiza? Je, hutauachilia kwa ajili ya hao hamsini? 25Haiwezekani wewe ufanye jambo kama hilo, kuwaua wasio na hatia pamoja na wenye hatia na kuwatendea sawa. Hasha! Je, Mwamuzi wa dunia yote hatatenda yaliyo haki?” 26BWANA akajibu, “Nikiwakuta watu hamsini wasio na hatia ndani ya Sodoma, nitauachilia mji wote kwa ajili yao.” 27Abrahamu akaendelea, “Nimethubutu kusema na Bwana, mimi niliye mavumbi na majivu tu. 28Tuseme hao hamsini wamepungua watano. Je, utauangamiza mji wote kwa sababu wamekosekana watano?” Akasema, “Nikiwapata huko arobaini na watano, sitauangamiza.” 29Abrahamu akasema naye tena, “Tuseme wapo arobaini.” Akajibu, “Kwa ajili ya hao arobaini sitafanya hivyo.” 30Akasema, “Bwana, usikasirike nikisema tena. Tuseme wapo thelathini.” Akajibu, “Nikiwapata huko thelathini, sitafanya hivyo.” 31Akasema, “Nimethubutu kusema na Bwana; tuseme wapo ishirini.” Akajibu, “Kwa ajili ya hao ishirini sitauangamiza.” 32Akasema, “Bwana, usikasirike, nami nitasema mara hii moja tu. Tuseme wapo kumi.” Akajibu, “Kwa ajili ya hao kumi sitauangamiza.” 33BWANA akaenda njia yake alipomaliza kuzungumza na Abrahamu, naye Abrahamu akarudi mahali pake.