Mwanzo 35

1Kisha Mungu akamwambia Yakobo, “Ondoka, uende Betheli ukaishi huko. Mjengee huko madhabahu Mungu aliyekutokea ulipokuwa ukimkimbia ndugu yako Esau.” 2Basi Yakobo akawaambia jamaa yake na wote waliokuwa pamoja naye, “Tupilieni mbali kila mungu wa kigeni mlio naye kati yenu. Jitakaseni, mvae nguo safi. 3Kisha tuondoke, tupande Betheli. Huko nitamfanyia madhabahu Mungu aliyenijibu nilipokuwa katika dhiki, aliyekaa pamoja nami kila njia niliyopita.” 4Wakamkabidhi Yakobo miungu yote ya kigeni waliyokuwa nayo, pamoja na pete za masikioni mwao, naye Yakobo akavifukia chini ya mti mkubwa ulio karibu na Shekemu. 5Walipokuwa wakiendelea na safari, hofu kuu iliyotoka kwa Mungu ikaiangukia miji iliyowazunguka, wala hakuna aliyewafuatia wana wa Yakobo. 6Yakobo akafika Luzu katika nchi ya Kanaani, mahali panapojulikana sasa kama Betheli, pamoja na watu wote aliokuwa nao. 7Huko akajenga madhabahu, akapaita mahali pale El-betheli, yaani “Mungu wa Betheli”, kwa kuwa ni huko Mungu alikomtokea alipokuwa akimkimbia ndugu yake. 8Debora, aliyekuwa mlezi wa Rebeka, akafa huko, akazikwa chini ya mwaloni ulio chini ya Betheli. Kwa hiyo mti huo ukaitwa Aloni-bakuthi, yaani “Mwaloni wa Kilio”.

9Yakobo alipokuwa amerudi kutoka Padan-aramu, Mungu akamtokea mara nyingine tena, akambariki. 10Mungu akamwambia, “Jina lako ni Yakobo, lakini tangu sasa hilo halitakuwa jina lako. Jina lako litakuwa Israeli.” Basi akampa jina Israeli. 11Mungu akamwambia pia, “Mimi ni Mungu Mwenyezi. Zaa, uongezeke. Taifa, naam, kusanyiko zima la mataifa, litatoka kwako, na wafalme watazaliwa katika uzao wako. 12Nchi niliyowapa Abrahamu na Isaka ni yako; nakupa wewe, na uzao wako baada yako nitawapa nchi hii.” 13Kisha Mungu akapaa, akamwacha pale mahali alipokuwa akizungumza naye. 14Pale Mungu aliposema naye, Yakobo akasimamisha jiwe la ukumbusho, akamimina juu yake sadaka ya kinywaji, na mafuta pia. 15Na mahali pale Mungu aliposema naye, Yakobo akapaita Betheli. 16Wakaondoka Betheli, na walipokuwa bado na umbali fulani kabla ya kufika Efrathi, wakati wa Raheli kujifungua ukafika, na uchungu wake ukawa mkali sana. 17Uchungu wake ulipokuwa mkali kupita kiasi, mkunga akamwambia, “Usiogope; huyu naye ni mwana kwako.” 18Uhai wake ulipokuwa ukimtoka, kwa kuwa alikuwa akifa, akamwita Benoni, yaani “mwana wa huzuni yangu”. Lakini baba yake akamwita Benyamini, yaani “mwana wa mkono wa kuume”. 19Raheli akafa, akazikwa kando ya barabara ya kwenda Efrathi, yaani Bethlehemu. 20Yakobo akasimamisha jiwe la ukumbusho juu ya kaburi lake; ndilo jiwe la kaburi la Raheli, na lipo hata leo. 21Israeli akaendelea na safari, akapiga hema lake upande wa pili wa Migdal-ederi. 22Israeli alipokuwa akiishi katika nchi ile, Reubeni akaenda akalala na Bilha, suria wa baba yake, na habari hizo zikamfikia Israeli. Wana wa Yakobo walikuwa kumi na wawili. 23Wana wa Lea walikuwa Reubeni, mzaliwa wa kwanza wa Yakobo, kisha Simeoni, Lawi, Yuda, Isakari na Zabuloni. 24Wana wa Raheli walikuwa Yusufu na Benyamini. 25Wana wa Bilha, mtumishi wa Raheli, walikuwa Dani na Naftali. 26Wana wa Zilpa, mtumishi wa Lea, walikuwa Gadi na Asheri. Hao ndio wana wa Yakobo, waliozaliwa kwake huko Padan-aramu. 27Hatimaye Yakobo akamfikia baba yake Isaka huko Mamre, karibu na Kiriath-arba (yaani Hebroni), ambako kwanza Abrahamu na kisha Isaka waliishi kama wageni. 28Isaka akaishi hadi umri wa miaka mia moja na themanini. 29Pumzi ya Isaka ikakoma, akafa, akakusanywa kwa watu wake, mzee aliyeshiba miaka. Wanawe Esau na Yakobo wakamzika kaburini.