Mwanzo 6

1Wanadamu walipoanza kuongezeka duniani, na binti wakazaliwa kwao, 2wana wa Mungu waliona kwamba binti za wanadamu walikuwa wazuri, wakaoa yeyote kati yao waliyemchagua. 3Ndipo BWANA akasema, “Roho yangu haitakaa ndani ya wanadamu milele, kwa kuwa wao ni wa kufa. Siku zao zitakuwa miaka 120.” 4Wanefili walikuwa duniani siku zile, na pia baadaye, wana wa Mungu walipolala na binti za wanadamu, nao wakawazalia watoto. Hao ndio mashujaa wa zamani, watu maarufu.

5BWANA aliona jinsi uovu wa wanadamu ulivyokuwa mwingi duniani, na kwamba kila mwelekeo wa mawazo ya mioyo yao ulikuwa mbaya tu wakati wote. 6Basi BWANA akajuta kwa kuwa aliwafanya wanadamu duniani, na moyo wake ukafadhaika sana. 7Basi BWANA akasema, “Nitawafuta kutoka katika uso wa dunia wanadamu niliowaumba, na pamoja nao wanyama, viumbe vinavyotambaa ardhini na ndege wa angani, kwa maana ninajuta kwamba niliwafanya.” 8Lakini Nuhu alipata kibali kwa BWANA.

9Hii ndiyo habari ya Nuhu. Nuhu alikuwa mtu mwenye haki, asiye na lawama kati ya watu wa wakati wake, naye alitembea pamoja na Mungu. 10Nuhu alikuwa na wana watatu: Shemu, Hamu na Yafethi. 11Basi dunia ilikuwa imeharibika machoni pa Mungu, nayo ilikuwa imejaa jeuri. 12Mungu aliona jinsi dunia ilivyokuwa imeharibika, kwa sababu watu wote duniani walikuwa wameharibu njia zao.

13Basi Mungu akamwambia Nuhu, “Nimeamua kuwakomesha watu wote, kwa sababu dunia imejaa jeuri kwa ajili yao. Nitawaangamiza pamoja na dunia. 14Jitengenezee safina ya mbao za goferi. Ujenge vyumba ndani yake, na uipake lami ndani na nje. 15Hivi ndivyo utakavyoifanya: safina iwe na urefu wa mita 135, upana wa mita 22.5 na kimo cha mita 13.5. 16Ifanyie safina paa, na uimalize hadi sentimita 45 kutoka juu. Weka mlango ubavuni mwa safina, na uijenge na ghorofa ya chini, ya kati na ya juu. 17Kwa upande wangu, nitaleta gharika, maji juu ya dunia, ili kuangamiza chini ya anga kila kiumbe chenye pumzi ya uhai. Kila kitu kilicho duniani kitakufa. 18Lakini nitaimarisha agano langu nawe, nawe utaingia katika safina: wewe, wanao, mkeo na wake za wanao pamoja nawe. 19Ingiza katika safina wawili wa kila kiumbe hai, dume na jike, ili kuwahifadhi hai pamoja nawe. 20Wawili wa kila aina ya ndege, wa kila aina ya mnyama na wa kila aina ya kiumbe kitambaacho ardhini watakuja kwako, ili wahifadhiwe hai. 21Chukua pamoja nawe kila aina ya chakula kinacholiwa, ukiweke akiba, kiwe chakula chako na chao.” 22Nuhu alifanya kila kitu kama Mungu alivyomwamuru.