Mwanzo 16

1Sarai, mke wa Abramu, alikuwa bado hajamzalia mtoto. Lakini alikuwa na mtumishi wa kike Mmisri aitwaye Hajiri. 2Sarai akamwambia Abramu, “Unaona kwamba BWANA hajaniruhusu kuzaa watoto. Mchukue mtumishi wangu; huenda kupitia yeye nitapata jamaa.” Naye Abramu akamsikiliza Sarai. 3Miaka kumi baada ya Abramu kukaa Kanaani, mkewe Sarai alimpa Hajiri, mtumishi wake Mmisri, awe mke wake. 4Akalala na Hajiri, naye akapata mimba. Alipojua kwamba ana mimba, akaanza kumdharau bibi yake. 5Sarai akamwambia Abramu, “Wewe ndiye wa kulaumiwa kwa dhuluma ninayotendewa! Nilikupa mtumishi wangu, na sasa kwa kuwa ana mimba ananidharau. BWANA na awe mwamuzi kati yako na mimi!” 6Abramu akamjibu Sarai, “Yeye ni mjakazi wako, na yuko chini ya mamlaka yako. Mtendee unavyoona inafaa.” Ndipo Sarai akamtendea kwa ukali mpaka akakimbia. 7Malaika wa BWANA akamkuta kando ya chemchemi jangwani, ile chemchemi iliyo kwenye barabara ya kwenda Shuri. 8Akamwuliza, “Hajiri, mtumishi wa Sarai, unatoka wapi, na unaelekea wapi?” Akajibu, “Ninamkimbia Sarai, bibi yangu.” 9Malaika wa BWANA akamwambia, “Rudi kwa bibi yako, ujiweke chini ya mamlaka yake.” 10Malaika wa BWANA akaongeza kusema, “Nitawafanya wazao wako kuwa wengi mno hata hakuna atakayeweza kuwahesabu.” 11Kisha malaika wa BWANA akasema, “Wewe una mimba, nawe utapata mwana. Umwite Ishmaeli, kwa sababu BWANA amesikiliza mateso yako. 12Atakuwa kama punda-mwitu: atainua mkono dhidi ya kila mtu, na kila mtu atainua mkono dhidi yake, naye ataishi akishindana na jamaa zake wote.” 13Basi akampa BWANA aliyesema naye jina hili: “Wewe ndiwe Mungu anayeniona.” Kwa maana alisema, “Je, kweli nimemwona yeye anayenilinda?” 14Ndiyo sababu kisima hicho kiliitwa Beer-lahai-roi. Bado kipo, kati ya Kadeshi na Beredi. 15Basi Hajiri akamzalia Abramu mwana, naye Abramu akampa mwana huyo aliyezaliwa na Hajiri jina Ishmaeli. 16Abramu alikuwa na miaka themanini na sita Hajiri alipomzalia Ishmaeli.