Mwanzo 44

1Yusufu alimpa msimamizi wa nyumba yake amri hii: “Yajaze magunia ya watu hawa chakula chote wanachoweza kubeba, kisha urudishe fedha ya kila mmoja juu kabisa ndani ya gunia lake. 2Kikombe changu, kile cha fedha, ukiweke juu ndani ya gunia la yule mdogo kuliko wote, pamoja na fedha aliyolipa kwa nafaka yake.” Msimamizi akatekeleza maagizo ya Yusufu. 3Kulipopambazuka, watu hao waliruhusiwa kwenda zao pamoja na punda wao. 4Walikuwa wametoka tu mjini na walikuwa bado karibu, Yusufu alipomwambia msimamizi wake, “Nenda uwafuate watu hao mara moja. Utakapowafikia, uwaulize, ‘Kwa nini mmelipa wema kwa ubaya? 5Je, hiki si kikombe ambacho bwana wangu hunywea, kile anachokitumia kupiga ramli? Mlichofanya ni uovu.’” 6Alipowafikia, akawarudia maneno hayo. 7Wakajibu, “Kwa nini bwana wangu anasema mambo kama hayo? Watumishi wako hawawezi kamwe kufanya jambo la namna hiyo! 8Kumbuka, tulikuletea kutoka Kanaani fedha tuliyoikuta juu ndani ya magunia yetu. Kwa nini basi tuibe fedha au dhahabu katika nyumba ya bwana wako? 9Ikiwa mmoja wetu atakutwa nacho, na afe, nasi wengine tutakuwa watumwa wako, bwana wangu.” 10Akajibu, “Haya, itakuwa kama mlivyosema. Lakini ni yule tu atakayekutwa na kikombe atakayekuwa mtumwa wangu; ninyi wengine hamtakuwa na hatia.” 11Kila mmoja wao alishusha haraka gunia lake chini, akalifungua. 12Msimamizi alipekua, akianza na mkubwa na kumaliza na mdogo, na kikombe kikaonekana katika gunia la Benyamini. 13Hapo wakararua nguo zao. Kisha kila mmoja akampakia punda wake tena, wakarudi mjini. 14Yuda na ndugu zake walifika nyumbani kwa Yusufu wakati alikuwa bado yuko huko, wakajitupa chini mbele yake. 15Yusufu akawauliza kwa ukali, “Mmefanya nini? Hamkutambua kwamba mtu mwenye cheo kama changu anaweza kugundua mambo kwa kupiga ramli?” 16Yuda akajibu, “Bwana wangu, tuseme nini? Tuna maneno gani? Tungewezaje kuthibitisha kwamba hatuna hatia? Mungu ameifichua hatia ya watumishi wako. Sasa sisi ni watumwa wako, bwana wangu, sisi sote, wala si yule tu aliyekuwa na kikombe.” 17Lakini Yusufu akajibu, “Siwezi kamwe kufanya jambo kama hilo! Ni yule tu aliyekuwa na kikombe atakayekuwa mtumwa wangu. Ninyi wengine mnaweza kurudi kwa baba yenu salama.”

18Kisha Yuda akamsogelea, akasema, “Nisamehe, bwana wangu, lakini mruhusu mtumishi wako aseme nawe faraghani, na tafadhali usimkasirikie mtumishi wako, kwa maana wewe ni mkuu kama Farao. 19Bwana wangu aliwauliza watumishi wako kama tulikuwa na baba au ndugu mwingine. 20Tukajibu, ‘Tuna baba mzee, na kuna mwana mdogo aliyezaliwa kwake katika uzee wake. Ndugu wa kijana huyo amekufa; yeye ndiye peke yake aliyebaki hai kati ya wana wa mama yake, na baba yake anampenda sana.’ 21Kisha ukawaambia watumishi wako, ‘Mleteni huku ili nimwone kwa macho yangu mwenyewe.’ 22Tukamwambia bwana wangu, ‘Kijana hawezi kumwacha baba yake. Kama angemwacha, baba yake angekufa.’ 23Lakini ukawaambia watumishi wako, ‘Ndugu yenu mdogo kuliko wote asiposhuka pamoja nanyi, hamtaruhusiwa kuniona tena.’ 24Tuliporudi kwa mtumishi wako, baba yangu, tulimweleza yote aliyosema bwana wangu. 25Baadaye baba yetu alituambia, ‘Rudini mkatununulie chakula kidogo zaidi.’ 26Lakini tukasema, ‘Hatuwezi kushuka huko. Tutakwenda tu ikiwa ndugu yetu mdogo atakwenda pamoja nasi. Asipokuwa pamoja nasi, mtu yule hatatupokea.’ 27Mtumishi wako, baba yangu, akatujibu, ‘Mnajua kwamba mke wangu alinizalia wana wawili. 28Mmoja wao aliniacha, nikasema, “Lazima atakuwa ameraruliwa na mnyama wa porini.” Wala sijamwona tena. 29Mkimchukua na huyu pia kutoka kwangu, na jambo likimpata, mtashusha kichwa changu hiki chenye mvi Kuzimu kwa huzuni kuu.’ 30Basi sasa, nikirudi kwa mtumishi wako baba yangu bila kijana, kwa kuwa maisha yake na maisha ya kijana yamefungamana, 31mara atakapoona kwamba kijana hayuko pamoja nasi, atakufa. Watumishi wako watakuwa wamemshusha baba yetu, mtumishi wako, Kuzimu, akiwa na mvi na huzuni. 32Mtumishi wako alimhakikishia baba yangu usalama wa kijana. Nilimwambia, ‘Nisipomrudisha kwako, nitakuwa na hatia mbele yako, baba, maisha yangu yote.’ 33Basi sasa, tafadhali niruhusu mimi, mtumishi wako, nibaki hapa kuwa mtumwa wa bwana wangu badala ya kijana, na kijana arudi nyumbani pamoja na ndugu zake. 34Ningewezaje kurudi kwa baba yangu bila kijana? Siwezi kustahimili kuona msiba ambao jambo hilo lingemletea.”