Mwanzo 33

1Yakobo alipoinua macho, alimwona Esau akija na watu mia nne. Kwa hiyo akawagawa watoto kati ya Lea, Raheli na wale watumishi wawili wa kike. 2Aliwaweka watumishi wa kike pamoja na watoto wao mbele, Lea na watoto wake nyuma yao, na Raheli pamoja na Yusufu nyuma kabisa. 3Yakobo mwenyewe aliwatangulia wote, na alipokuwa akimwendea ndugu yake, akainama mpaka chini mara saba. 4Lakini Esau alikimbia kumlaki, akamkumbatia; akamshika kifuani na kumbusu, nao wakalia pamoja. 5Esau alipoinua macho na kuwaona wanawake na watoto, aliuliza, “Hawa wote walio pamoja nawe ni nani?” Yakobo akasema, “Ni watoto ambao Mungu amemfadhili nao mtumishi wako.” 6Kisha watumishi wa kike walisogea mbele pamoja na watoto wao, wakainama sana. 7Lea na watoto wake walisogea mbele baadaye, wakainama; na mwisho kabisa Yusufu na Raheli wakasogea mbele, wakainama. 8“Na yale makundi yote niliyokutana nayo njiani ni ya nini?” Esau akauliza. “Yalikuwa ya kunipatia fadhili za bwana wangu,” Yakobo akajibu. 9“Nina mali nyingi, ndugu yangu,” Esau akasema. “Kilicho chako kibaki kuwa chako.” 10“Hapana, tafadhali,” Yakobo akasema. “Ikiwa unanitazama kwa fadhili, pokea zawadi yangu kutoka mkononi mwangu. Kuuona uso wako kumekuwa kama kuuona uso wa Mungu, kwa jinsi ulivyonipokea kwa wema. 11Basi pokea, nakusihi, baraka uliyoletewa. Mungu amekuwa mwema kwangu, wala sipungukiwi na kitu.” Yakobo akaendelea kumsihi, hata Esau akaikubali. 12Esau akasema, “Haya, tuvunje kambi tuendelee na safari. Nitatembea kando yako.” 13Lakini Yakobo akamwambia, “Kama bwana wangu aonavyo, watoto ni wadogo, nami ninapaswa kuwatunza kondoo, mbuzi na ng’ombe wanaonyonyesha watoto wao. Wakiharakishwa kupita kiasi hata kwa siku moja tu, kundi zima litakufa. 14Tafadhali, bwana wangu, umtangulie mtumishi wako. Mimi nitafuata polepole, kwa kadiri wanyama walio mbele yangu na watoto wanavyoweza kwenda, mpaka nitakapomfikia bwana wangu huko Seiri.” 15Esau akasema, “Angalau niache baadhi ya watu walio pamoja nami waende nawe.” “Kuna haja gani ya hivyo?” Yakobo akajibu. “Nipate tu fadhili za bwana wangu.” 16Siku ile ile Esau aligeuka, akashika njia ya kwenda Seiri. 17Yakobo yeye alisafiri hadi Sukothi. Akajijengea nyumba ya kukaa, akawajengea wanyama wake vibanda; kwa hiyo mahali pale pakaitwa Sukothi.

18Yakobo alifika salama salimini katika mji wa Shekemu katika nchi ya Kanaani, aliporudi kutoka Padan-aramu, akapiga kambi nje kidogo ya mji. 19Alinunua kipande cha ardhi alipokuwa amepiga hema lake kutoka kwa wana wa Hamori, baba yake Shekemu, kwa vipande mia moja vya fedha. 20Alijenga madhabahu pale, akaipa jina El-Elohe-Israeli, “Mungu ni Mungu wa Israeli”.