Mwanzo 15

1Muda fulani baadaye, neno la BWANA lilimjia Abramu katika maono: “Abramu, usiogope. Ngao yako ni mimi, nawe utapata thawabu kubwa sana.” 2Lakini Abramu akajibu, “Bwana MUNGU, utanipa nini? Bado sina mtoto, na kila kitu nilicho nacho kitamwendea Eliezeri wa Dameski.” 3Abramu akaendelea kusema, “Kwa kuwa wewe hujanipa mtoto, mtu aliyezaliwa nyumbani mwangu ndiye atakayenirithi.” 4Kisha neno la BWANA likamjia: “Hapana, si yeye atakayekurithi. Mrithi wako atakuwa mwana wako mwenyewe, aliyezaliwa na wewe.” 5Akampeleka Abramu nje, akamwambia, “Angalia juu angani ujaribu kuhesabu nyota, kama unaweza.” Kisha akamwambia, “Wazao wako watakuwa kama hizo.” 6Abramu akamtumaini BWANA, na BWANA akalihesabu tumaini hilo kuwa haki kwake. 7Akamwambia pia, “Mimi ni BWANA. Nilikutoa Uru ya Wakaldayo ili nikupe nchi hii iwe yako.” 8Lakini Abramu akasema, “Bwana MUNGU, ninawezaje kuwa na hakika kwamba nitaimiliki?” 9Akamjibu, “Niletee mtamba, mbuzi jike na kondoo dume, kila mmoja wa miaka mitatu, pamoja na hua na mwana njiwa.” 10Abramu akamletea wote, akampasua kila mmoja katikati na kupanga nusu zake zikitazamana, lakini ndege hakuwapasua. 11Ndege wa kuwinda walipotua juu ya mizoga, Abramu akawafukuza. 12Jua lilipokuwa likitua, Abramu alilala usingizi mzito, na pamoja nao likaja giza kubwa la kutisha. 13Kisha BWANA akamwambia Abramu, “Unapaswa kujua kwamba wazao wako watakuwa wageni katika nchi isiyo yao. Watafanywa watumwa na kuonewa kwa miaka mia nne. 14Lakini nitaleta hukumu juu ya taifa litakalowafanya watumwa, na baadaye watatoka na utajiri mkubwa. 15Kwa upande wako, utajiunga na mababu zako kwa amani, nawe utazikwa ukiwa umefikia uzee mwema. 16Wazao wako watarudi hapa katika kizazi cha nne, kwa sababu uovu wa Waamori bado haujafikia kipimo chake kamili.” 17Baada ya jua kutua, gizani, jiko la moto lililofuka moshi na mwenge uliowaka vilipita kati ya nusu za wanyama. 18Siku hiyo BWANA alifanya agano na Abramu: “Ninawapa wazao wako nchi hii, kuanzia mto wa Misri hadi mto mkubwa Frati, 19nchi ya Wakeni, Wakenizi, Wakadmoni, 20Wahiti, Waperizi, Warefai, 21Waamori, Wakanaani, Wagirgashi na Wayebusi.”