Mwanzo 22

1Muda fulani baadaye, Mungu alimjaribu Abrahamu. Akamwita, “Abrahamu!” Naye Abrahamu akaitika, “Mimi hapa.” 2Mungu akasema, “Tafadhali mchukue mwanao, mwana wako wa pekee, yule unayempenda, Isaka. Nenda katika nchi ya Moria, na huko, juu ya mmojawapo wa milima nitakayokuonyesha, umtoe kuwa sadaka ya kuteketezwa.” 3Abrahamu aliamka alfajiri. Akatandika punda wake, akawachukua vijana wake wawili, pamoja na mwanawe Isaka. Baada ya kupasua kuni za sadaka ya kuteketezwa, akaondoka kwenda mahali ambapo Mungu alikuwa amemtajia. 4Siku ya tatu Abrahamu aliinua macho, akapaona mahali pale kwa mbali. 5Kisha Abrahamu akawaambia vijana wake, “Ninyi ngojeni hapa pamoja na punda. Mimi na kijana tunakwenda kule juu kuabudu, na baadaye tutarudi kwenu.” 6Abrahamu alimtwika mwanawe Isaka kuni za sadaka ya kuteketezwa, naye mwenyewe akabeba mkononi moto na kisu, nao wawili wakaendelea kutembea bega kwa bega. 7Isaka akamwambia baba yake Abrahamu, “Baba yangu.” Akajibu, “Niko hapa, mwanangu.” Isaka akasema, “Moto na kuni ninaviona, lakini mwanakondoo wa kutoa sadaka yuko wapi?” 8Abrahamu akajibu, “Mungu atashughulikia mwanakondoo wa sadaka yake ya kuteketezwa, mwanangu.” Nao wawili wakaendelea kutembea pamoja. 9Walifika mahali ambapo Mungu alikuwa amemtajia. Hapo Abrahamu akajenga madhabahu, akapanga kuni juu yake; kisha akamfunga mwanawe Isaka, akamlaza juu ya madhabahu, juu ya kuni. 10Abrahamu alinyosha mkono, akakishika kisu, tayari kumchinja mwanawe. 11Lakini kutoka mbinguni malaika wa BWANA akamwita, “Abrahamu, Abrahamu!” Naye Abrahamu akasema, “Niko hapa.” 12Akasema, “Usimguse kijana, wala usimdhuru. Sasa najua kwamba wewe ni mtu anayemcha Mungu, kwa kuwa hukuninyima mimi mwanao, mwana wako wa pekee.” 13Abrahamu alipoinua macho, alimwona nyuma yake kondoo dume aliyenaswa pembe zake vichakani. Akaenda, akamchukua yule kondoo dume, akamtoa kuwa sadaka ya kuteketezwa badala ya mwanawe. 14Abrahamu aliyaita mahali pale “BWANA Atashughulikia.” Ndiyo sababu hata leo watu husema, “Katika mlima wa BWANA itashughulikiwa.” 15Kisha malaika wa BWANA akamwita Abrahamu tena kutoka mbinguni, 16akisema, “Hili ndilo neno la BWANA: Naapa kwa nafsi yangu kwamba, kwa kuwa umefanya hivi, wala hukumzuia mwanao, mwana wako wa pekee, 17nitakumiminia baraka, na kuwaongeza wazao wako mpaka wawe kama nyota za angani na mchanga wa ufukoni. Wazao wako watayateka malango ya adui zao, 18na katika wazao wako mataifa yote ya dunia yatapata baraka, kwa sababu umenisikiliza mimi.” 19Abrahamu aliungana tena na vijana wake, nao wakaondoka pamoja kwenda Beer-sheba, ambako Abrahamu aliweka makao yake.

20Muda fulani baadaye Abrahamu aliletewa habari: “Milka naye amemzalia ndugu yako Nahori wana: 21Usi mzaliwa wa kwanza, nduguye Buzi, Kemueli baba wa Aramu, 22Kesedi, Hazo, Pildashi, Yidlafu na Bethueli.” 23Bethueli alikuwa baba wa Rebeka. Hao ndio wana wanane ambao Milka alimzalia Nahori, ndugu wa Abrahamu. 24Nahori alikuwa pia na mke mdogo aitwaye Reuma, naye akamzalia Teba, Gahamu, Tahashi na Maaka.