Mwanzo 48

1Baada ya matukio hayo, Yusufu aliletewa habari kwamba baba yake ni mgonjwa, naye akaenda pamoja na wanawe wawili, Manase na Efraimu. 2Yakobo akapata habari kwamba mwanawe Yusufu amekuja kwake, naye Israeli akajikaza, akaketi kitandani pake. 3Yakobo akamwambia Yusufu, “Huko Luzu, katika nchi ya Kanaani, Mungu Mwenyezi alinitokea, akanibariki. 4Aliniambia, ‘Nitakufanya uzae na kuongezeka; nitakufanya kuwa kusanyiko la mataifa, nami nitawapa wazao wako baada yako nchi hii, iwe mali yao milele.’ 5Basi wana wako wawili, waliozaliwa kwako huko Misri kabla sijaja kujiunga nawe, sasa ni wangu. Efraimu na Manase watahesabiwa kuwa wanangu, sawa kabisa na Reubeni na Simeoni. 6Watoto utakaowapata baada yao watakuwa wako; urithi utakapogawanywa, watahesabiwa chini ya majina ya ndugu zao. 7Mimi nilipokuwa nikirudi kutoka Padani, Raheli alinifia katika nchi ya Kanaani tukiwa njiani, tulipokuwa bado mbali kidogo na Efrathi, nami nikamzika huko kando ya njia iendayo Efrathi” (yaani, Bethlehemu). 8Israeli akawaona wana wa Yusufu, akauliza, “Hawa ni akina nani?” 9Yusufu akamwambia baba yake, “Hawa ni wanangu, wale ambao Mungu amenipa mahali hapa.” Yakobo akasema, “Tafadhali walete hapa kwangu, nami nitawabariki.” 10Uzee ulikuwa umeyafifisha macho ya Israeli, wala hakuweza kuona. Yusufu akawasogeza vijana karibu naye, naye akawabusu na kuwakumbatia. 11Israeli akamwambia Yusufu, “Nilikuwa nimekata tamaa ya kuuona uso wako tena, na tazama, Mungu amenionyesha watoto wako pia.” 12Kisha Yusufu akawaondoa vijana magotini pa baba yake, akainama sana, uso wake hadi chini. 13Yusufu akawasimamisha wote wawili mbele ya baba yake: Efraimu, akiwa amemshika kwa mkono wake wa kuume, upande wa kushoto wa Israeli, na Manase, akiwa amemshika kwa mkono wa kushoto, upande wa kuume wa Israeli. Kisha akawasogeza karibu naye. 14Hata hivyo Israeli akaunyosha mkono wake wa kuume, akauweka juu ya kichwa cha Efraimu, aliyekuwa mdogo, na mkono wake wa kushoto juu ya kichwa cha Manase. Aliipishanisha mikono yake kwa makusudi, kwa kuwa Manase ndiye aliyekuwa mzaliwa wa kwanza. 15Kisha akambariki Yusufu: “Mungu ambaye mbele yake baba zangu Abrahamu na Isaka waliishi, Mungu ambaye amenitunza kama mchungaji tangu kuzaliwa kwangu hadi leo, 16malaika aliyeniokoa na kila dhara, awabariki vijana hawa. Kupitia kwao jina langu likumbukwe, na majina ya baba zangu Abrahamu na Isaka; nao wazaane na kuongezeka sana duniani.” 17Yusufu akaona kwamba baba yake ameweka mkono wake wa kuume juu ya kichwa cha Efraimu, na hilo halikumpendeza. Akaushika mkono wa baba yake, akitaka kuuondoa kichwani pa Efraimu na kuuweka kichwani pa Manase. 18Yusufu akamwambia baba yake, “Si hivyo, baba yangu! Mzaliwa wa kwanza ni huyu. Mkono wako wa kuume unapaswa kuwa juu ya kichwa chake.” 19Lakini baba yake hakukubali. Akasema, “Najua, mwanangu, najua. Ukoo wa Manase nao utakuwa taifa, nao utakuwa mkubwa pia. Lakini ndugu yake mdogo atapanda juu zaidi, na wazao wake watajaza mataifa mazima.” 20Siku ile akawabariki, akisema, “Israeli watalitumia jina lako wanapobariki, wakisema, ‘Mungu akufanye kama Efraimu na Manase.’” Hivyo akamweka Efraimu mbele ya Manase. 21Israeli akaendelea kumwambia Yusufu, “Kifo changu kimekaribia. Lakini Mungu atakuwa pamoja nanyi nyote, naye atawaongoza kurudi katika nchi ya wazee wenu. 22Na wewe, zaidi ya ndugu zako, ninakupa mteremko mmoja wa mlima, Shekemu, ule niliouteka kutoka kwa Waamori kwa upanga wangu na upinde wangu.”