Mwanzo 8

1Lakini Mungu alimkumbuka Nuhu na wanyama wote wa porini na mifugo waliokuwa pamoja naye ndani ya safina. Mungu akaleta upepo juu ya dunia, na maji yakaanza kupungua. 2Chemchemi za kilindi na milango ya maji ya mbinguni vilifungwa, na mvua ikaacha kunyesha kutoka angani. 3Maji yaliendelea kupungua juu ya dunia, na mwisho wa zile siku 150 yalikuwa yamepungua. 4Siku ya kumi na saba ya mwezi wa saba, safina ilitua juu ya milima ya Ararati. 5Maji yaliendelea kupungua hadi mwezi wa kumi, na siku ya kwanza ya mwezi wa kumi vilele vya milima vikaonekana. 6Baada ya siku arobaini, Nuhu alifungua dirisha alilolifanya katika safina 7akamtuma kunguru. Kunguru akaendelea kuruka huku na huko mpaka maji yalipokauka juu ya dunia. 8Kisha akamtuma njiwa ili kuona kama maji yalikuwa yamepungua juu ya uso wa ardhi. 9Lakini njiwa hakupata mahali pa kutua, akarudi kwake ndani ya safina, kwa kuwa maji yalikuwa bado yamefunika uso wote wa dunia. Akanyosha mkono wake, akamshika, akamrudisha ndani ya safina. 10Alingoja siku saba zaidi, akamtuma tena njiwa kutoka safinani. 11Njiwa aliporudi kwake jioni, kumbe mdomoni mwake alikuwa na jani la mzeituni lililochumwa punde! Hivyo Nuhu akajua kwamba maji yamepungua duniani. 12Alingoja siku saba zaidi, akamtuma njiwa tena, lakini safari hii hakumrudia. 13Kufikia siku ya kwanza ya mwezi wa kwanza wa mwaka wa mia sita na moja wa Nuhu, maji yalikuwa yamekauka juu ya dunia. Nuhu akaondoa kifuniko cha safina, akatazama nje, na uso wa ardhi ulikuwa umekauka. 14Kufikia siku ya ishirini na saba ya mwezi wa pili, dunia ilikuwa imekauka kabisa.

15Kisha Mungu akamwambia Nuhu, 16“Toka ndani ya safina, wewe na mke wako, na wanao pamoja na wake zao. 17Uwatoe pamoja nawe viumbe hai wote walio pamoja nawe, ndege, mifugo na viumbe vyote vinavyotambaa ardhini, ili waenee duniani, wazae na kuongezeka juu yake.” 18Basi Nuhu akatoka pamoja na wanawe, mkewe na wake wa wanawe. 19Kila mnyama, kila kiumbe kitambaacho ardhini na kila ndege, kila kiendacho juu ya dunia, walitoka katika safina, aina moja baada ya nyingine. 20Kisha Nuhu alimjengea BWANA madhabahu, akachukua baadhi ya wanyama wote walio safi na ndege wote walio safi, akawatoa kuwa sadaka za kuteketezwa juu ya madhabahu. 21BWANA alipoinusa harufu ya kupendeza, BWANA akasema moyoni mwake, “Kamwe sitailaani tena ardhi kwa sababu ya wanadamu, ingawa kila mwelekeo wa moyo wa mwanadamu ni mbaya tangu utotoni. Kamwe sitaangamiza tena viumbe hai wote, kama nilivyofanya. 22Maadamu dunia ipo, kupanda na kuvuna, baridi na joto, kiangazi na kipupwe, mchana na usiku, havitakoma kamwe.”