Mwanzo 46

1Hivyo Israeli alianza safari, akichukua vyote alivyokuwa navyo. Alipofika Beer-sheba akasimama, akatoa dhabihu kwa Mungu wa baba yake Isaka. 2Usiku Mungu alizungumza na Israeli katika maono. Akaita, “Yakobo, Yakobo,” naye Yakobo akajibu, “Mimi hapa.” 3Akasema, “Mimi ndimi Mungu, Mungu wa baba yako. Usiogope safari ya kushuka Misri, kwa kuwa ni huko nitakapokufanya taifa kubwa. 4Mimi mwenyewe nitashuka pamoja nawe mpaka Misri, nami mwenyewe nitakupandisha tena bila shaka. Yusufu ndiye atakayekufumba macho.” 5Yakobo aliondoka Beer-sheba, na wana wa Israeli wakamchukua baba yao Yakobo, watoto wao wadogo na wake zao katika magari ya kukokotwa ambayo Farao alikuwa amemtumia. 6Walichukua pia mifugo na mali walizokuwa wamejipatia katika nchi ya Kanaani, wakafika Misri, Yakobo na wazao wake wote pamoja naye, 7wanawe na wajukuu zake wa kiume, binti zake na wajukuu zake wa kike. Aliwaleta wazao wake wote pamoja naye Misri.

8Haya ndiyo majina ya jamaa ya Israeli waliokuja Misri, Yakobo na wanawe. Mzaliwa wa kwanza wa Yakobo alikuwa Reubeni. 9Wana wa Reubeni walikuwa Hanoki, Palu, Hesroni na Karmi. 10Wana wa Simeoni walikuwa Yemueli, Yamini, Ohadi, Yakini na Sohari, pamoja na Shauli, ambaye mama yake alikuwa Mkanaani. 11Wana wa Lawi walikuwa Gershoni, Kohathi na Merari. 12Wana wa Yuda walikuwa Eri, Onani, Shela, Peresi na Zera, ingawa Eri na Onani walikuwa wamekwisha kufa katika nchi ya Kanaani. Wana wa Peresi walikuwa Hesroni na Hamuli. 13Wana wa Isakari walikuwa Tola, Puva, Yobu na Shimroni. 14Wana wa Zabuloni walikuwa Seredi, Eloni na Yahleeli. 15Hawa ndio wana wa Lea aliowazalia Yakobo huko Padan-aramu, pamoja na binti yake Dina. Ukihesabu wana na binti, tawi hili la jamaa lilikuwa na watu thelathini na watatu. 16Wana wa Gadi walikuwa Sifioni, Hagi, Shuni, Esboni, Eri, Arodi na Areli. 17Wana wa Asheri walikuwa Imna, Ishva, Ishvi na Beria, nao walikuwa na dada yao, Sera. Wana wa Beria walikuwa Heberi na Malkieli. 18Hawa ndio wazao wa Zilpa, ambaye Labani alikuwa amempa binti yake Lea. Alimzalia Yakobo hawa, watu kumi na sita kwa jumla. 19Wana wa Raheli mke wa Yakobo walikuwa Yusufu na Benyamini. 20Huko Misri, Yusufu alipata wana wawili, Manase na Efraimu. Mama yao alikuwa Asenathi, binti wa Potifera, kuhani wa Oni. 21Wana wa Benyamini walikuwa Bela, Bekeri, Ashbeli, Gera, Naamani, Ehi, Roshi, Mupimu, Hupimu na Ardi. 22Hawa ndio wazao wa Raheli aliowazalia Yakobo, watu kumi na wanne kwa jumla. 23Mwana wa Dani alikuwa Hushimu. 24Wana wa Naftali walikuwa Yahseeli, Guni, Yeseri na Shilemu. 25Hawa ndio wazao wa Bilha, ambaye Labani alikuwa amempa binti yake Raheli. Alimzalia Yakobo hawa, watu saba kwa jumla. 26Wazao halisi wa Yakobo waliosafiri pamoja naye kwenda Misri walikuwa sitini na sita, bila kuwahesabu wake wa wanawe. 27Yusufu alikuwa na wana wawili waliozaliwa kwake huko Misri. Hivyo watu wote wa nyumba ya Yakobo waliokuja Misri walikuwa sabini.

28Yakobo alimtanguliza Yuda kwa Yusufu, ili Yusufu awaonyeshe njia ya kwenda Gosheni. Nao wakafika katika nchi ya Gosheni. 29Yusufu aliandaa gari lake la farasi, akapanda kwenda Gosheni kumlaki baba yake Israeli. Mara alipofika mbele ya baba yake, alimkumbatia shingoni, akalia, akaendelea kulia kwa muda mrefu. 30Israeli akamwambia Yusufu, “Sasa kifo na kije. Nimeutazama uso wako, na ninajua kwamba u hai.” 31Yusufu akawaambia ndugu zake na jamaa yote ya baba yake, “Ninakwenda kwa Farao kumpa habari. Nitamwambia, ‘Ndugu zangu na jamaa ya baba yangu, waliokuwa wakiishi Kanaani, wamefika kuungana nami. 32Watu hawa ni wachungaji, watu ambao siku zote wamefuga mifugo, nao wamekuja na kondoo na mbuzi wao, ng’ombe wao na mali yao yote.’ 33Farao atakapowaita na kuwauliza mnafanya kazi gani ya kujipatia riziki, 34jibuni, ‘Sisi watumishi wako tumefuga mifugo tangu tulipokuwa vijana, na baba zetu walifanya hivyo kabla yetu.’ Kwa njia hiyo mtaweza kuishi katika nchi ya Gosheni, kwa sababu Wamisri huwachukia wote wanaochunga kondoo.”