Mwanzo 7

1Kisha BWANA akamwambia Nuhu, “Ingia ndani ya safina, wewe na jamaa yako yote, kwa sababu nimeona kwamba wewe ni mwenye haki mbele yangu kati ya watu wa kizazi hiki. 2Chukua pamoja nawe jozi saba za kila aina ya mnyama aliye safi, dume na jike lake, na jozi moja ya kila aina ya mnyama asiye safi, dume na jike lake, 3na jozi saba za kila aina ya ndege wa angani, dume na jike, ili kuzihifadhi hai aina zao juu ya uso wa dunia yote. 4Baada ya siku saba nitaleta mvua juu ya dunia kwa siku arobaini na usiku arobaini, na nitaondoa juu ya uso wa dunia kila kiumbe hai nilichokifanya.” 5Nuhu akafanya kila kitu BWANA alichomwamuru. 6Nuhu alikuwa na umri wa miaka 600 maji ya gharika yalipokuja juu ya dunia. 7Nuhu na wanawe, mkewe na wake wa wanawe wakaingia ndani ya safina ili kuyaepuka maji ya gharika. 8Wanyama walio safi na wanyama wasio safi, ndege na kila kiumbe kinachotambaa juu ya ardhi 9walimjia Nuhu wawili wawili, wakaingia ndani ya safina, dume na jike, kama Mungu alivyomwamuru Nuhu. 10Baada ya siku hizo saba, maji ya gharika yalikuja juu ya dunia. 11Katika mwaka wa mia sita wa maisha ya Nuhu, siku ya kumi na saba ya mwezi wa pili, siku hiyo hiyo chemchemi zote za kilindi kikuu zilipasuka, na milango ya maji ya mbinguni ikafunguka. 12Mvua ikanyesha juu ya dunia kwa siku arobaini na usiku arobaini. 13Siku ile ile Nuhu na wanawe, Shemu, Hamu na Yafethi, pamoja na mkewe na wake wa wanawe watatu, waliingia ndani ya safina, 14wao na kila mnyama wa porini kwa aina yake, mifugo yote kwa aina zake, kila kiumbe kinachotambaa juu ya ardhi kwa aina yake, na kila ndege kwa aina yake, kila kitu chenye mabawa. 15Walimjia Nuhu wawili wawili, wakaingia ndani ya safina, wa kila kiumbe chenye pumzi ya uhai. 16Walioingia walikuwa dume na jike wa kila kiumbe, kama Mungu alivyomwamuru Nuhu. Kisha BWANA akamfungia ndani. 17Kwa siku arobaini gharika iliendelea kuja juu ya dunia. Maji yakaongezeka, yakaiinua safina, nayo ikaelea juu sana ya dunia. 18Maji yakazidi nguvu na kupanda juu zaidi na zaidi juu ya dunia, na safina ikaelea juu ya maji. 19Maji yakapanda juu sana juu ya dunia hata milima yote mirefu chini ya anga lote ikafunikwa. 20Maji yalipanda karibu mita 7 juu yake, na milima ikafunikwa. 21Kila kiumbe hai kilichokwenda juu ya dunia kilikufa: ndege, mifugo, wanyama wa porini, viumbe vyote vinavyojaa tele duniani, na wanadamu wote. 22Kila kitu katika nchi kavu kilichokuwa na pumzi ya uhai puani mwake kilikufa. 23Hivyo kila kiumbe hai juu ya uso wa dunia kilifutiliwa mbali, tangu wanadamu hadi wanyama, viumbe vitambaavyo ardhini na ndege wa angani. Vilifutwa kutoka duniani. Alibaki Nuhu peke yake, na wale waliokuwa pamoja naye ndani ya safina. 24Maji yaliifunika dunia kwa siku 150.