Mwanzo 32

1Yakobo alipokuwa akiendelea na safari yake, malaika wa Mungu walikutana naye. 2Yakobo alipowaona alisema, “Hii ni kambi ya Mungu mwenyewe!” Akapaita mahali pale Mahanaimu.

3Kisha Yakobo alituma wajumbe watangulie mbele yake kwa ndugu yake Esau, katika nchi ya Seiri, eneo la Edomu. 4Akawaagiza, “Mwambieni bwana wangu Esau hivi: ‘Mtumishi wako Yakobo anakuletea habari hii: Nimeishi kama mgeni kwa Labani, nimekaa huko mpaka sasa. 5Ninamiliki ng’ombe, punda na makundi ya kondoo na mbuzi, na watumishi wanaume na wanawake. Ninatuma habari hii kwa bwana wangu, nikitumaini utanitazama kwa fadhili.’” 6Wajumbe walirudi, wakamwambia Yakobo, “Tulimfikia ndugu yako Esau. Tayari anakuja kukulaki, akiwa na watu mia nne.” 7Yakobo aliogopa mno, akahangaika. Akawagawanya watu wake katika kambi mbili, pamoja na makundi ya kondoo na mbuzi, ng’ombe na ngamia. 8Aliwaza, “Esau akiivamia kambi moja na kuishambulia, kambi itakayobaki itaweza kuokoka.” 9Yakobo akaomba, “Mungu wa baba yangu Abrahamu, Mungu wa baba yangu Isaka, BWANA, ni wewe uliyeniambia, ‘Rudi katika nchi yako na kwa jamaa yako, nami nitakufanikisha.’ 10Mimi ni mdogo kabisa mbele ya upendo usiokoma na uaminifu huu wote ulionionyesha mimi mtumishi wako. Nilipovuka Yordani hii nilikuwa na fimbo tu mkononi, na sasa nimekuwa kambi mbili. 11Uniokoe na ndugu yangu, na mkono wa Esau. Ninaogopa atakuja kutuangamiza sote, akina mama pamoja na watoto. 12Tena wewe mwenyewe ulisema, ‘Hakika nitakufanikisha, nami nitawafanya wazao wako kama mchanga wa bahari, wasioweza kuhesabika kwa wingi wao.’” 13Baada ya kulala pale usiku, alichagua katika mali zake zawadi kwa ajili ya ndugu yake Esau: 14mbuzi jike 200 na mabeberu ishirini, kondoo jike 200 na kondoo dume ishirini, 15ngamia jike thelathini pamoja na watoto wao wanaonyonya, ng’ombe arobaini na mafahali kumi, punda jike ishirini na punda dume kumi. 16Aliwakabidhi watumishi wake, kundi moja baada ya jingine, akawaambia, “Vukeni mbele yangu, na acheni nafasi kati ya kundi moja na jingine.” 17Akamwambia mtumishi wa kwanza, “Ndugu yangu Esau atakutana nawe na kukuuliza, ‘Wewe ni mtu wa nani? Unaelekea wapi? Na wanyama hawa unaowaswaga ni wa nani?’ 18Hapo utasema, ‘Ni wa mtumishi wako Yakobo. Hii ni zawadi anayompelekea bwana wangu Esau, naye Yakobo mwenyewe anatufuata nyuma.’” 19Akatoa agizo hilo hilo kwa wa pili, kwa wa tatu, na kwa wote waliotembea nyuma ya makundi: “Haya ndiyo mtakayomwambia Esau mtakapokutana naye. 20Ongezeni na haya: ‘Mtumishi wako Yakobo yuko nyuma yetu hapa.’” Mpango wake ulikuwa huu: “Nitamvuta kwa zawadi inayonitangulia, kisha nitaonana naye uso kwa uso. Huenda atanipokea kwa wema.” 21Hivyo zawadi ilitangulia mbele yake, wakati yeye alilala usiku ule kambini. 22Usiku ule aliamka, akawachukua wake zake wawili, watumishi wake wawili wa kike na wana wake kumi na mmoja, akavuka kwenye kivuko cha Yaboki. 23Akawachukua na kuwavusha ng’ambo ya kijito, pamoja na vyote alivyokuwa navyo. 24Yakobo alibaki nyuma peke yake. Mtu mmoja akashikana naye mieleka pale mpaka alfajiri ilipoanza kupambazuka. 25Yule mtu alipoona kwamba hawezi kumshinda Yakobo, alimpiga kwenye kiungo cha nyonga, na nyonga ya Yakobo ikateguka walipokuwa wakishikana mieleka. 26“Niache niende,” yule mtu akasema, “kwa maana kunapambazuka.” Yakobo akasema, “Sitakuacha uende isipokuwa unibariki.” 27Yule mtu akamwuliza, “Unaitwa nani?” Akasema, “Yakobo.” 28Akasema, “Hutaitwa tena Yakobo. Jina lako ni Israeli, kwa sababu umepambana na Mungu na watu, nawe umeibuka mshindi.” 29Kisha Yakobo akamwomba, “Tafadhali, niambie jina lako ni nani.” Akajibu, “Kwa nini unaniuliza jina langu?” Na hapo akambariki Yakobo. 30Yakobo akapaita mahali pale Penieli. “Nimemwona Mungu uso kwa uso,” akasema, “na maisha yangu yameokolewa.” 31Jua lilikuwa likimchomozea alipopita Penueli, naye akaenda akichechemea kwa nyonga yake iliyoumia. 32Hii ndiyo sababu Waisraeli hata leo hawali mshipa ulio kwenye kiungo cha nyonga: nyonga ya Yakobo ilipigwa kwenye mshipa huo.