Mwanzo 25

1Abrahamu alioa tena; mke wake mpya aliitwa Ketura. 2Akamzalia wana sita: Zimrani, Yokshani, Medani, Midiani, Ishbaki na Shua. 3Yokshani alikuwa baba wa Sheba na Dedani. Wazao wa Dedani walikuwa Waashuri, Waletushi na Waleumi. 4Wana wa Midiani walikuwa Efa, Eferi, Hanoki, Abida na Eldaa. Hao wote ni wazao wa Ketura. 5Abrahamu akamkabidhi Isaka mali yake yote. 6Wana wa masuria wake Abrahamu aliwapa zawadi, na alipokuwa bado hai akawapeleka mashariki, katika nchi za mashariki, mbali na mwanawe Isaka. 7Abrahamu aliishi jumla ya miaka 175. 8Kisha pumzi ya Abrahamu ikakoma, akafa akiwa na uzee mwema, mzee aliyeridhika na siku zake, akakusanywa pamoja na watu wake. 9Wanawe Isaka na Ishmaeli wakamlaza katika pango la Makpela, mashariki ya Mamre, katika shamba lililokuwa mali ya Efroni mwana wa Sohari Mhiti, 10alilolinunua Abrahamu kwa Wahiti. Hivyo Abrahamu na mkewe Sara wakalazwa mahali pamoja. 11Abrahamu alipokwisha kufa, Mungu alimbariki mwanawe Isaka, naye Isaka akakaa karibu na Beer-lahai-roi.

12Hii ndiyo habari ya jamaa ya Ishmaeli, mwana wa Abrahamu aliyezaliwa na Hajiri Mmisri, mtumishi wa Sara. 13Haya ndiyo majina ya wana wa Ishmaeli, kwa majina na koo zao: Nebayothi, mzaliwa wa kwanza wa Ishmaeli, kisha Kedari, Adbeeli, Mibsamu, 14Mishma, Duma, Masa, 15Hadadi, Tema, Yeturi, Nafishi na Kedema. 16Hawa ndio wana wa Ishmaeli, na haya ndiyo majina yao, kwa vijiji na kambi zao: viongozi kumi na wawili, kila mmoja juu ya kabila lake. 17Ishmaeli aliishi miaka 137. Pumzi yake ikakoma, akafa, akakusanywa pamoja na watu wake. 18Watu wa Ishmaeli walizunguka kuanzia Havila hadi Shuri, inayoelekeana na Misri katika njia ya kwenda Ashuru. Walifanya makao yao wakiwapinga jamaa zao wote.

19Hii ndiyo habari ya jamaa ya Isaka, mwana wa Abrahamu. Abrahamu alimzaa Isaka. 20Isaka alikuwa na miaka arobaini alipomwoa Rebeka. Yeye alikuwa binti wa Bethueli na dada wa Labani, Waaramu wa Padan-aramu. 21Isaka alimsihi BWANA kwa ajili ya mkewe, kwa sababu hakuweza kupata watoto. BWANA akayajibu maombi yake, na Rebeka akachukua mimba. 22Watoto walisukumana tumboni mwake, naye akasema, “Ikiwa ni hivi, ni nini kinachonipata?” Basi akaenda kutafuta jibu kwa BWANA. 23BWANA akamjibu, “Ndani yako kuna mataifa mawili; jamii mbili zitatoka mwilini mwako na kufuata njia tofauti. Moja itakuwa na nguvu zaidi kuliko nyingine, na yule mkubwa atakuwa mtumishi wa yule mdogo.” 24Siku za mimba yake zilipotimia, kumbe walikuwa mapacha tumboni mwake. 25Wa kwanza alitoka akiwa mwekundu, mwili wake wote umejaa nywele kama vazi la manyoya, wakampa jina Esau. 26Kisha akatoka nduguye, mkono wake umeshika kisigino cha Esau, akaitwa Yakobo. Isaka alikuwa na miaka sitini walipozaliwa. 27Vijana hao walipokua, Esau akawa mwindaji stadi, mtu wa porini, lakini Yakobo alikuwa mtu mtulivu aliyeishi mahemani. 28Isaka alimpenda Esau, kwa kuwa alifurahia nyama ya mawindo ya Esau, lakini Rebeka alimpenda Yakobo. 29Siku moja Yakobo alikuwa amepika mchuzi, naye Esau akaingia kutoka porini, amechoka kabisa. 30“Niache nifakamie kidogo cha kile chekundu, kile chekundu pale,” Esau akamwambia Yakobo, “nimechoka kabisa!” Ndiyo sababu akaja kuitwa Edomu. 31Yakobo akajibu, “Kwanza niuzie stahili zako za mzaliwa wa kwanza, hapa hapa sasa hivi.” 32Esau akasema, “Mimi niko karibu kufa. Stahili za mzaliwa wa kwanza zitanifaa nini?” 33“Niapie hapa hapa sasa hivi,” Yakobo akasema. Basi Esau akamwapia, akamwuzia Yakobo stahili zake za mzaliwa wa kwanza. 34Kisha Yakobo akampa Esau mkate na mchuzi wa dengu. Esau akala, akanywa, akainuka, akaondoka. Ndivyo Esau alivyozipuuza stahili zake za mzaliwa wa kwanza.