Mwanzo 49

1Yakobo aliwaita wanawe, akasema, “Kusanyikeni, nami nitawaambia mambo yatakayowapata katika siku zijazo.” 2“Njooni pamoja msikie, enyi wana wa Yakobo; tegeni sikio kwa Israeli baba yenu. 3Reubeni, mzaliwa wangu wa kwanza, wewe ni nguvu zangu, mtoto wa kwanza wa ukakamavu wangu, uliye juu ya wengine kwa heshima, juu ya wengine kwa uwezo. 4Mwenye kufurika kama maji yanayofoka, hutakuwa na nafasi ya kwanza, kwa sababu ulipanda kitanda cha baba yako. Ndipo ukakitia unajisi: alipanda malazi yangu!

5Simeoni na Lawi kweli ni ndugu; panga zao zimefanywa kwa ajili ya jeuri. 6Nisishiriki kamwe katika mipango yao ya siri, na heshima yangu ikae mbali na mikusanyiko yao. Katika ghadhabu yao waliwaua watu, na kwa kujifurahisha tu waliwalemaza maksai. 7Hasira yao ni kali na ghadhabu yao haina huruma; zote mbili na zilaaniwe! Nitawatenganisha kati ya Yakobo na kuwaeneza kote katika Israeli.

8Yuda, sifa za ndugu zako zitakuwa kwako. Mkono wako utawakamata adui zako kwa shingo; wana wa baba yako watainama chini mbele yako. 9Yuda ni simba mchanga; mwanangu, umerudi kutoka kwenye windo. Anajikunja na kujinyoosha kama simba, kama simba jike: nani angethubutu kumwamsha? 10Fimbo ya enzi haitaondolewa kwa Yuda, wala fimbo ya amri kutoka kati ya miguu yake, mpaka aje mmiliki wake halali; mataifa yatamtii yeye. 11Atamfunga punda wake kwenye mzabibu, mwana-punda wa punda wake kwenye mzabibu ulio bora; atafua nguo zake kwa divai, joho lake kwa damu ya zabibu. 12Macho yake yatafifia kwa divai, meno yake yatakuwa meupe kwa maziwa.

13Zabuloni ataweka makao yake mahali bahari inapokutana na nchi kavu; atakuwa mahali pa meli kutia nanga, na eneo lake litaenea kuelekea Sidoni.

14Isakari ni punda mwenye mifupa yenye nguvu, aliyejinyoosha kati ya mazizi ya kondoo. 15Aliona kwamba pumziko ni jema na nchi inapendeza, kwa hiyo akainama kubeba mizigo, akatiwa katika kazi ya kulazimishwa.

16Dani atawapatia watu wake haki, kabila la Israeli sawa na mengine. 17Dani na awe nyoka barabarani, kifutu mwenye pembe kando ya njia, anayeuma visigino vya farasi na kumwangusha mpandaji wake kinyumenyume. 18Ninangoja kwa matumaini wokovu wako, BWANA. 19Gadi: kundi la wanyang’anyi litamshambulia vikali, lakini yeye atageuka na kuwafuatia kwa karibu, akiwashambulia visiginoni.

20Kutoka kwa Asheri kutatoka chakula kinono; atatoa vyakula bora vinavyomfaa mfalme.

21Naftali ni kulungu jike anayekimbia huru, anayesema maneno ya kupendeza.

22Yusufu ni tawi lenye kuzaa matunda, tawi lenye kuzaa matunda kando ya chemchemi, ambalo machipukizi yake yanavuka juu ya ukuta. 23Wapiga mishale waliyafanya maisha yake kuwa machungu; walimpiga mishale na kumwandama kwa chuki. 24Hata hivyo upinde wake haukutetemeka, na mikono yake ilidumu kuwa myepesi kwa mikono ya Mwenye Nguvu wa Yakobo; kutoka huko, kutoka kwa Mchungaji, Jiwe la Israeli, 25kutoka kwa Mungu wa baba yako, atakayekusaidia, na kwa Mwenyezi, atakayekubariki kwa baraka zinazoshuka kutoka mbinguni juu, baraka zinazopanda kutoka kilindi kilicholala chini, baraka za matiti na za tumbo la uzazi. 26Baraka anazotoa baba yako zina nguvu zaidi kuliko baraka za mababu zangu, hadi mbali kabisa kwenye vilima vya kale. Na zishuke juu ya kichwa cha Yusufu, juu ya utosi wa yule aliyechaguliwa kati ya ndugu zake.

27Benyamini ni mbwa mwitu anayerarua mawindo yake: asubuhi anakula alichokamata, na kufika jioni anagawa mali aliyoteka.” 28Hawa wote kwa pamoja ndio makabila kumi na mawili ya Israeli. Haya ndiyo maneno ambayo baba yao aliyanena juu yao alipowabariki; kila mmoja alimpa baraka yake mwenyewe. 29Kisha akawapa maagizo: “Karibu nitakusanywa kwa watu wangu. Nilazeni pamoja na baba zangu katika pango lililoko katika shamba la Efroni Mhiti, 30pango lililo katika shamba la Makpela, mashariki ya Mamre, katika nchi ya Kanaani, ambalo Abrahamu alilinunua, pamoja na shamba lote, kutoka kwa Efroni Mhiti liwe mahali pake pa kuzikia. 31Hapo ndipo Abrahamu alipolazwa pamoja na mkewe Sara, na Isaka pamoja na mkewe Rebeka; nami nilimlaza Lea pale pia. 32Shamba pamoja na pango lake vilinunuliwa kutoka kwa Wahiti.” 33Yakobo alimaliza kuwapa wanawe maagizo. Kisha akairudisha miguu yake juu ya kitanda, akavuta pumzi yake ya mwisho, akakusanywa kwa watu wake.