Mwanzo 34

1Siku moja Dina, binti ambaye Lea alimzalia Yakobo, alitoka kwenda kujuana na wasichana wa nchi ile. 2Shekemu mwana wa Hamori Mhivi, aliyetawala eneo lile, akamwona. Akamkamata na kumlazimisha alale naye, akamtia aibu. 3Lakini baadaye moyo wake ukashikamana sana na Dina, binti Yakobo. Akampenda msichana huyo, akazungumza naye kwa upole ili kuuvuta moyo wake. 4Basi Shekemu akamwendea baba yake Hamori, akamwambia, “Niposee msichana huyu nimwoe.” 5Yakobo akasikia kwamba Shekemu alikuwa amemtia unajisi binti yake Dina, lakini wanawe walikuwa mashambani pamoja na mifugo yake, kwa hiyo akanyamaza mpaka waliporudi. 6Wakati huo Hamori, baba yake Shekemu, akatoka kwenda kwa Yakobo ili kuzungumza naye kuhusu jambo hilo. 7Wana wa Yakobo wakarudi kutoka mashambani mara waliposikia habari. Waliumia moyoni na kuwaka hasira, kwa kuwa Shekemu alikuwa amefanya jambo ovu la aibu katika Israeli kwa kulala na binti Yakobo, jambo ambalo halipaswi kufanyika kamwe. 8Hamori akazungumza nao, akasema, “Mwanangu Shekemu ameutoa moyo wake kwa binti yenu. Nawaomba, mkubali amwoe. 9Fanyeni ndoa pamoja nasi. Mnaweza kuwaoza binti zenu kwa wanaume wetu, na kuwaoa binti zetu wawe wake zenu. 10Mnaweza kuishi kati yetu. Kaeni hapa, mzunguke kwa uhuru, mnunue mashamba yenu wenyewe; nchi yote iko mbele yenu.” 11Kisha Shekemu akawaambia baba na ndugu zake Dina, “Nifanyieni wema, nami nitatoa lolote mtakalotaja. 12Tajeni mahari kubwa na zawadi nyingi kadiri mtakavyo, nami nitalipa chochote mtakachosema. Nipeni tu msichana huyo awe mke wangu.” 13Wana wa Yakobo wakamjibu Shekemu na baba yake Hamori kwa hila, kwa sababu Shekemu alikuwa amemtia unajisi dada yao Dina. 14Wakawaambia, “Hatuwezi kufanya jambo kama hilo. Kumpa dada yetu mwanamume ambaye hajatahiriwa kungetuletea aibu. 15Kuna njia moja tu tutakayokubali: lazima mwe kama sisi, na kila mwanamume kati yenu atahiriwe. 16Ndipo tutawapa binti zetu na kuwaoa binti zenu, nasi tutaishi kati yenu kama watu wamoja. 17Lakini mkikataa kutahiriwa kama tunavyowaomba, tutamchukua binti yetu na kwenda zetu.” 18Hamori na mwanawe Shekemu wakaridhika na waliyoyasikia. 19Kijana huyo hakukawia kutimiza sharti hilo, kwa jinsi alivyopendezwa na binti Yakobo. Yeye ndiye aliyeheshimiwa kuliko wote katika jamaa yake. 20Basi Hamori na mwanawe Shekemu wakaenda kwenye lango la mji, wakawahutubia watu wa mji. 21“Watu hawa hawana nia mbaya nasi,” wakasema. “Na waishi hapa na kufanya biashara katika nchi hii; nafasi ipo ya kutosha na kuzidi kwa ajili yao. Tunaweza kuwaoa binti zao na kuwaoza binti zetu kwao. 22Lakini kuna sharti moja kabla watu hawa hawajakubali kuishi pamoja nasi na kuwa watu wamoja: kila mwanamume kati yetu lazima atahiriwe, kama wao walivyo. 23Fikirini: makundi yao, mali zao na wanyama wao wote watakuwa wetu. Tunahitaji tu kuwakubalia, nao wataishi pamoja nasi.” 24Wanaume wote waliopita katika lango la mji wakakubaliana na Hamori na mwanawe Shekemu, na kila mwanamume wa mji ule, kila mmoja wao, akatahiriwa. 25Siku ya tatu, wanaume wale walipokuwa bado na maumivu, wana wawili wa Yakobo, Simeoni na Lawi, ndugu wa tumbo moja na Dina, wakachukua panga zao. Wakaingia mjini bila upinzani wowote, wakawaua wanaume wote. 26Wakawaua Hamori na mwanawe Shekemu kwa upanga. Kisha wakamtoa Dina katika nyumba ya Shekemu, wakaondoka. 27Wana wengine wa Yakobo wakapita juu ya maiti, wakaupora mji, kwa kuwa ndimo dada yao alimotiwa unajisi. 28Wakachukua kondoo na mbuzi wao, ng’ombe wao na punda wao, kila kitu kilichokuwa mjini na mashambani. 29Wakateka na kupora mali yao yote, watoto wao wadogo wote na wake zao, pamoja na kila kitu kilichokuwa ndani ya nyumba. 30Ndipo Yakobo akawaambia Simeoni na Lawi, “Mmeniletea maangamizi. Mmenifanya nichukiwe na watu wanaoishi hapa, Wakanaani na Waperizi. Watu wangu ni wachache. Mataifa hayo yakiungana na kunijia, yataniangamiza mimi pamoja na jamaa yangu yote.” 31Lakini wao wakajibu, “Je, tumwache amtumie dada yetu kana kwamba ni kahaba?”