Mwanzo 14

1Katika siku zile Amrafeli alipokuwa mfalme wa Shinari, Arioko mfalme wa Elasari, Kedorlaoma mfalme wa Elamu na Tidali mfalme wa Goyimu, 2wafalme hao walikwenda kupigana vita na Bera mfalme wa Sodoma, Birsha mfalme wa Gomora, Shinabu mfalme wa Adma, Shemeberi mfalme wa Seboimu, na mfalme wa Bela (yaani Soari). 3Wafalme hawa wote waliunganisha majeshi yao katika Bonde la Sidimu, mahali ilipo Bahari Mfu leo. 4Kwa miaka kumi na miwili walikuwa wakimlipa Kedorlaoma kodi, lakini mwaka wa kumi na tatu wakamwasi. 5Mwaka wa kumi na nne Kedorlaoma alikuja pamoja na wafalme washirika wake, wakawaponda Warefai huko Ashterothi-karnaimu, Wazuzi huko Hamu, Waemi huko Shawe-kiriathaimu 6na Wahori katika milima yao ya Seiri, mpaka El-parani kando ya jangwa. 7Kisha wakageuka wakafika En-mishpati (yaani Kadeshi), wakaiteka nchi yote ya Waamaleki, pamoja na Waamori walioishi Hazazon-tamari. 8Kisha wafalme wa Sodoma, Gomora, Adma, Seboimu na Bela (yaani Soari) wakatoka, wakajipanga tayari kwa vita katika Bonde la Sidimu 9dhidi ya Kedorlaoma mfalme wa Elamu, Tidali mfalme wa Goyimu, Amrafeli mfalme wa Shinari na Arioko mfalme wa Elasari: wafalme wanne dhidi ya wafalme watano. 10Bonde la Sidimu lilikuwa limejaa mashimo ya lami. Wafalme wa Sodoma na Gomora walipokimbia, baadhi ya watu wao wakatumbukia humo, nao walionusurika wakakimbilia milimani. 11Washindi wakachukua kila kitu cha Sodoma na Gomora, mali yao yote na chakula, wakaendelea na safari yao. 12Miongoni mwa mateka alikuwa Lutu, mpwa wa Abramu, aliyeishi Sodoma; wakamchukua yeye pamoja na vyote alivyokuwa navyo. 13Mtu mmoja aliyeponyoka akaenda kumpasha habari Abramu Mwebrania. Wakati huo Abramu alikuwa amepiga kambi karibu na miti mikubwa ya Mamre Mwamori, ambaye ndugu zake walikuwa Eshkoli na Aneri; wote watatu walikuwa wamefungamana na Abramu kwa agano. 14Mara Abramu aliposikia kwamba ndugu yake amekamatwa, akawakusanya watu mia tatu kumi na wanane waliofunzwa wa nyumbani mwake, wote waliozaliwa kambini mwake, akawafuatia adui mpaka Dani. 15Akawagawa watu wake vikundi, akawavamia adui usiku. Akawashinda kabisa, akawafuatia mpaka Hoba, kaskazini mwa Dameski. 16Akarudisha nyara zote, akamrudisha Lutu ndugu yake pamoja na mali yake, na wanawake na mateka wengine. 17Abramu aliporudi kutoka kumshinda Kedorlaoma na wafalme waliokuwa pamoja naye, mfalme wa Sodoma alitoka kwenda kumlaki katika Bonde la Shawe, yaani Bonde la Mfalme. 18Kisha Melkizedeki mfalme wa Salemu akaleta mkate na divai. Yeye alikuwa kuhani wa Mungu Aliye Juu Kabisa. 19Akambariki Abramu, akisema, “Abramu abarikiwe na Mungu Aliye Juu Kabisa, Muumba wa mbingu na nchi. 20Na ahimidiwe Mungu Aliye Juu Kabisa, aliyewaweka adui zako chini ya mamlaka yako.” Kisha Abramu akampa sehemu ya kumi ya kila kitu. 21Kisha mfalme wa Sodoma akamwambia Abramu, “Niachie watu; wewe baki na mali.” 22Abramu akamjibu mfalme wa Sodoma, “Nimeinua mkono wangu kuapa mbele ya BWANA, Mungu Aliye Juu Kabisa, Muumba wa mbingu na nchi, 23kwamba sitabaki na kitu chochote chako, hata uzi, hata kamba ya kiatu. Hutaweza kamwe kusema, ‘Mimi ndiye niliyemtajirisha Abramu.’ 24Mimi sitachukua kitu, isipokuwa kile ambacho vijana wangu wamekwisha kula. Lakini Aneri, Eshkoli na Mamre, waliokwenda pamoja nami, ni lazima wapate fungu lao.”