Mwanzo 29

1Yakobo aliendelea na safari yake, akafika katika nchi ya mataifa ya mashariki. 2Huko aliona kisima mbugani, na makundi matatu ya kondoo yamelala kando yake, kwa sababu makundi yalinyweshwa maji kutoka kisima hicho. Jiwe kubwa lilifunika mdomo wa kisima. 3Desturi ilikuwa hivi: makundi yote yalipokusanyika huko, wachungaji walilivingirisha jiwe kutoka kwenye mdomo wa kisima, wakawanywesha kondoo, kisha wakalirudisha jiwe mahali pake juu ya kisima. 4“Rafiki zangu, mnatoka wapi?” Yakobo akawauliza. “Tunatoka Harani,” wakajibu. 5“Mnamfahamu Labani, mjukuu wa Nahori?” akauliza. “Ndiyo, tunamfahamu,” wakasema. 6“Je, yu mzima?” akauliza. “Yu mzima,” wakajibu, “na tazama, binti yake Raheli anakuja sasa na kondoo.” 7“Lakini bado ni adhuhuri,” Yakobo akasema, “ni mapema mno kuwarudisha wanyama. Kwa nini msiwanyweshe kondoo na kuwarudisha malishoni?” 8“Hatuna ruhusa,” wakajibu, “mpaka makundi yote yafike na jiwe liondolewe kisimani. Ndipo tunaweza kuwanywesha kondoo.” 9Alikuwa bado anaongea nao Raheli alipofika na kondoo wa baba yake, kwa kuwa yeye ndiye aliyekuwa akiwachunga. 10Yakobo alipomwona Raheli, binti wa mjomba wake Labani, pamoja na kondoo wa Labani, alisogea mbele, akalivingirisha peke yake jiwe kutoka mdomo wa kisima, akalinywesha kundi la mjomba wake. 11Kisha Yakobo akambusu Raheli, akaangua kilio kikubwa. 12Akamweleza Raheli kwamba yeye ni jamaa wa baba yake, mwana wa Rebeka, naye Raheli akakimbia kwenda kumwambia baba yake. 13Mara Labani aliposikia habari za Yakobo, mwana wa dada yake, alitoka mbio kwenda kumlaki, akamkumbatia na kumbusu, akampeleka nyumbani. Yakobo akamsimulia Labani yote yaliyotokea. 14“Wewe kwa kweli ni mfupa wangu na mwili wangu mwenyewe!” Labani akamwambia. Yakobo akakaa naye mwezi mzima. 15Kisha Labani akamwambia Yakobo, “Wewe ni jamaa yangu, lakini hiyo si sababu ya kunifanyia kazi bila malipo. Niambie unataka kulipwa nini.” 16Labani alikuwa na binti wawili. Mkubwa aliitwa Lea, na mdogo Raheli. 17Macho ya Lea yalikuwa laini, lakini Raheli alikuwa na umbo zuri na sura ya kupendeza. 18Yakobo alikuwa amempenda Raheli, kwa hiyo akasema, “Nitakufanyia kazi miaka saba ili unipe binti yako mdogo, Raheli.” 19“Ni bora aolewe nawe kuliko mwanamume mwingine,” Labani akajibu. “Kaa hapa pamoja nami.” 20Basi Yakobo alifanya kazi miaka saba ili ampate Raheli, na kwa sababu alimpenda sana, miaka hiyo ilimpita kana kwamba ni siku chache tu. 21Kisha Yakobo akamwambia Labani, “Muda wangu umekwisha. Nipe mke wangu ili nilale naye.” 22Basi Labani akawaalika watu wote wa mahali pale, akafanya karamu ya harusi. 23Lakini jioni ilipofika, Labani alimchukua binti yake Lea, akampeleka kwa Yakobo, naye Yakobo akalala naye. 24(Labani alikuwa amempa binti yake Lea mtumishi wake wa kike Zilpa, awe mtumishi wake.) 25Asubuhi kulipokucha Yakobo akaona kwamba ni Lea. “Umenitendea nini?” akamwambia Labani. “Nilifanya kazi kwa ajili ya Raheli! Kwa nini umenihadaa?” 26“Si desturi yetu hapa,” Labani akajibu, “kumwoza binti mdogo kabla ya mzaliwa wa kwanza. 27Maliza wiki ya harusi ya huyu, kisha tutakupa na yule mwingine pia, kwa malipo ya kazi ya miaka saba mingine utakayonifanyia.” 28Yakobo akakubali, na wiki ya Lea ilipokwisha, Labani akampa binti yake Raheli awe mke wake. 29(Labani alimpa binti yake Raheli mtumishi wake wa kike Bilha, awe mtumishi wake.) 30Yakobo akalala na Raheli pia, naye alimpenda Raheli kuliko Lea. Akamfanyia Labani kazi miaka saba zaidi. 31BWANA alipoona kwamba Lea hapendwi, akamjalia kushika mimba, wakati Raheli aliendelea kukosa mtoto. 32Lea akapata mimba, akazaa mtoto wa kiume. Akamwita Reubeni, akisema, “BWANA ameona jinsi ninavyoteseka. Hakika sasa mume wangu atanipenda.” 33Akapata mimba tena, akazaa mtoto mwingine wa kiume. “BWANA amesikia kwamba sipendwi,” akasema, “kwa hiyo amenipa na mwana huyu pia.” Basi akamwita Simeoni. 34Kwa mara nyingine akapata mimba, akazaa mtoto wa kiume. “Sasa hatimaye mume wangu ataambatana nami,” akasema, “kwa sababu nimemzalia wana watatu.” Ndiyo sababu aliitwa Lawi. 35Akapata mimba mara nyingine, akazaa mtoto wa kiume. “Sasa nitamshukuru BWANA,” akasema, na kwa sababu hiyo akamwita Yuda. Kisha kwa muda hakupata watoto wengine.