Mwanzo 12

1Basi BWANA alimwambia Abramu, “Iache nchi yako, ndugu zako na jamaa ya baba yako, uende katika nchi nitakayokuonyesha. 2Nitakufanya kuwa taifa kubwa; nitakubariki na kukupa jina kuu, ili wewe uwe baraka. 3Nitawabariki wanaokubariki, na yeyote atakayekudharau nitamlaani; na kupitia kwako koo zote za dunia zitabarikiwa.” 4Abramu aliondoka kama BWANA alivyomwagiza, na Lutu akaenda naye. Abramu alikuwa na miaka sabini na mitano alipoondoka Harani. 5Abramu aliwachukua mkewe Sarai, Lutu mwana wa ndugu yake, mali yote waliyokuwa nayo na watu waliokuwa wameingia katika nyumba yao huko Harani. Wakaondoka kwenda Kanaani, wakafika huko. 6Abramu alipita katika nchi hadi Shekemu, hadi mti mkubwa wa More. Siku hizo Wakanaani waliishi katika nchi hiyo. 7Kisha BWANA alimtokea Abramu, akamwambia, “Nitawapa wazao wako nchi hii.” Basi Abramu akajenga huko madhabahu kwa BWANA, aliyemtokea. 8Kutoka huko aliendelea hadi kwenye vilima vilivyo mashariki ya Betheli, akapiga hema lake kati ya Betheli upande wa magharibi na Ai upande wa mashariki. Akajenga huko madhabahu kwa BWANA, akaliitia jina la BWANA. 9Kisha Abramu akaondoka, akaendelea kuhamahama kuelekea Negebu.

10Lakini njaa kali ilitokea katika nchi, hata Abramu akashuka Misri akae huko kwa muda. 11Walipokaribia kufika Misri, Abramu alimwambia mkewe Sarai, “Sikiliza. Najua wewe ni mwanamke mzuri. 12Wamisri watakapokuona, watasema, ‘Huyu ni mke wake,’ kisha wataniua na kukuacha wewe hai. 13Tafadhali waambie kwamba wewe ni dada yangu. Hivyo mambo yatakwenda vizuri kwangu kwa ajili yako, nami nitabaki hai kwa sababu yako.” 14Ikawa hivyo: mara Abramu alipofika Misri, Wamisri waliona jinsi yule mwanamke alivyokuwa mzuri mno. 15Maafisa wa Farao nao walimwona, wakamsifu sana kwa Farao, naye akachukuliwa kuingia katika jumba lake la kifalme. 16Kwa ajili yake, Farao alimkarimu Abramu, naye akapata kondoo, ng’ombe na punda, watumishi wa kiume na wa kike, punda jike na ngamia. 17Lakini BWANA alimpiga Farao na watu wa nyumba yake kwa mapigo makali kwa ajili ya Sarai, mke wa Abramu. 18Farao akamwita Abramu, akamwuliza, “Ni nini hiki ulichonifanyia? Kwa nini hukuniambia kwamba alikuwa mke wako? 19Kwa nini ulidai kwamba ni dada yako, ukaniacha nimchukue kuwa mke wangu? Huyu hapa. Mchukue mke wako uende!” 20Farao akawaweka watu wamshughulikie Abramu, nao wakamsindikiza kutoka nchini pamoja na mkewe na mali yake yote.