Mwanzo 40

1Baada ya hayo, watu wawili waliomtumikia mfalme wa Misri, mnyweshaji wake na mwokaji wake, walimkosea bwana wao. 2Farao akawaghadhibikia maafisa wake hao wawili, mkuu wa wanyweshaji na mkuu wa waokaji. 3Akawaweka chini ya ulinzi katika nyumba ya mkuu wa walinzi, katika gereza lile lile alimokuwa amefungwa Yusufu. 4Mkuu wa walinzi akamkabidhi Yusufu kazi ya kuwa pamoja nao, naye akawahudumia. Wakakaa kizuizini kwa muda. 5Kisha, usiku mmoja, wafungwa wote wawili, mnyweshaji na mwokaji wa mfalme wa Misri, wakaota ndoto. Kila mmoja aliota ndoto yake mwenyewe, na kila ndoto ilikuwa na tafsiri yake. 6Asubuhi yake Yusufu akaingia kwao, akaona jinsi walivyokuwa na huzuni. 7Akawauliza wale maafisa wawili wa Farao waliokuwa wamefungwa pamoja naye katika nyumba ya bwana wake, “Mbona leo nyuso zenu zimejaa huzuni hivi?” 8Wakamjibu, “Kila mmoja wetu ameota ndoto, wala hatuna mtu wa kuzifasiri.” Yusufu akawaambia, “Je, si Mungu anayetoa tafsiri? Tafadhali, nisimulieni.” 9Basi mkuu wa wanyweshaji akamsimulia Yusufu ndoto yake, akisema, “Nilikuwa nikiota, na mbele yangu ulisimama mzabibu, 10wenye matawi matatu. Mara tu ulipochipuka ukachanua maua, na vishada vyake vikajaa zabibu zilizoiva. 11Mkononi mwangu nilikuwa na kikombe cha Farao. Nikachuma zabibu, nikazikamulia ndani ya kikombe, nikakiweka mkononi mwa Farao.” 12Yusufu akamwambia, “Tafsiri yake ni hii: matawi yale matatu yanamaanisha siku tatu. 13Baada ya siku tatu Farao atakiinua kichwa chako na kukurudisha kazini mwako, nawe utampa Farao kikombe chake kama zamani, ulipokuwa mnyweshaji wake. 14Na mambo yakikuendea vizuri, unikumbuke. Tafadhali unitendee wema huu: umweleze Farao habari zangu, unitoe mahali hapa. 15Ukweli ni kwamba nilitekwa nyara kutoka nchi ya Waebrania. Na hata hapa sijafanya kosa lolote linalostahili kunitupa katika shimo hili.” 16Mkuu wa waokaji alipoona kwamba tafsiri ile ilikuwa nzuri, akamwambia Yusufu, “Mimi pia niliota ndoto. Nilikuwa nimebeba vikapu vitatu vya mkate mweupe kichwani. 17Kikapu cha juu kilikuwa na kila aina ya vyakula vilivyookwa kwa ajili ya Farao, na ndege wakawa wakividonoa kutoka katika kikapu kilichokuwa kichwani mwangu.” 18Yusufu akajibu, “Tafsiri yake ni hii: vile vikapu vitatu vinamaanisha siku tatu. 19Baada ya siku tatu Farao atakiinua kichwa chako, akikiondoa mwilini mwako, na kukutundika juu ya nguzo, nao ndege watakula nyama ya mwili wako.” 20Siku ya tatu ikafika, nayo ilikuwa siku ya kuzaliwa kwa Farao. Akawaandalia maafisa wake wote karamu, na mbele yao wote akakiinua kichwa cha mkuu wa wanyweshaji na cha mkuu wa waokaji. 21Akamrudisha mkuu wa wanyweshaji kwenye cheo chake, naye akaendelea kukiweka kikombe mkononi mwa Farao. 22Bali mkuu wa waokaji akamtundika, sawasawa na jinsi Yusufu alivyowaeleza. 23Lakini mkuu wa wanyweshaji hakumfikiria Yusufu tena; alimwondoa kabisa akilini mwake.