Mwanzo 4

1Yule mtu alikutana kimwili na mkewe Hawa, naye akapata mimba, akamzaa Kaini. Akasema, “Kwa msaada wa BWANA nimempata mwanamume.” 2Baadaye akamzaa Habili, ndugu yake. Habili alichunga makundi ya kondoo na mbuzi, na Kaini alilima ardhi. 3Baada ya muda, Kaini alileta baadhi ya mazao ya ardhi kuwa sadaka kwa BWANA. 4Habili naye alileta sadaka: baadhi ya wazaliwa wa kwanza wa kundi lake, pamoja na sehemu zao za mafuta. BWANA akamkubali Habili na sadaka yake, 5lakini hakumkubali Kaini wala sadaka yake. Basi Kaini akakasirika sana, uso wake ukakunjamana. 6Ndipo BWANA akamwambia Kaini, “Kwa nini umekasirika? Kwa nini uso wako umekunjamana? 7Ukitenda yaliyo mema, je, hutakubaliwa? Lakini usipotenda yaliyo mema, dhambi inakuotea mlangoni pako. Inataka kukutawala, lakini wewe lazima uishinde.” 8Kaini akazungumza na ndugu yake Habili. Walipokuwa shambani, Kaini akamvamia ndugu yake Habili, akamuua. 9Ndipo BWANA akamwuliza Kaini, “Ndugu yako Habili yuko wapi?” Akajibu, “Sijui. Kwani mimi ni mlinzi wa ndugu yangu?” 10BWANA akasema, “Umefanya nini? Sikiliza! Damu ya ndugu yako inanililia kutoka ardhini. 11Sasa umelaaniwa, umefukuzwa kutoka katika ardhi iliyofungua kinywa chake kupokea damu ya ndugu yako kutoka mkononi mwako. 12Utakapolima ardhi, haitakuzalia tena mazao yake. Utakuwa mtu asiyetulia, anayezunguka-zunguka duniani.” 13Kaini akamwambia BWANA, “Adhabu yangu ni zaidi ya ninavyoweza kuvumilia. 14Leo unanifukuza kutoka katika nchi hii, nami nitafichwa mbali na uwepo wako. Nitakuwa mtu asiyetulia, nikizunguka-zunguka duniani, na yeyote atakayenikuta ataniua.” 15Lakini BWANA akamwambia, “Kwa sababu hiyo, yeyote atakayemuua Kaini atalipizwa kisasi mara saba zaidi.” Kisha BWANA akamtia Kaini alama, ili mtu yeyote atakayemkuta asimuue. 16Basi Kaini akaondoka mbele ya uso wa BWANA, akaishi katika nchi ya Nodi, upande wa mashariki wa Edeni. 17Kaini alikutana kimwili na mkewe, naye akapata mimba, akamzaa Henoko. Kaini alikuwa akijenga mji, akauita Henoko, kwa jina la mwanawe. 18Henoko alimzaa Iradi; Iradi akawa baba wa Mehuyaeli, Mehuyaeli akawa baba wa Methushaeli, na Methushaeli akawa baba wa Lameki. 19Lameki alioa wanawake wawili, mmoja aliitwa Ada na mwingine Sila. 20Ada alimzaa Yabali. Yeye alikuwa baba wa wale wanaoishi katika hema na kufuga wanyama. 21Ndugu yake aliitwa Yubali. Yeye alikuwa baba wa wote wanaopiga kinubi na filimbi. 22Sila naye alimzaa mtoto wa kiume, Tubal-kaini, aliyefua kila aina ya vyombo vya shaba na chuma. Dada yake Tubal-kaini alikuwa Naama. 23Lameki akawaambia wake zake, “Ada na Sila, nisikilizeni; wake wa Lameki, sikieni maneno yangu: nimemuua mtu kwa sababu alinijeruhi, kijana kwa sababu alinipiga. 24Ikiwa Kaini atalipiziwa kisasi mara saba, Lameki atalipiziwa mara sabini na saba!” 25Adamu alikutana kimwili na mkewe tena, naye akamzaa mtoto wa kiume, akamwita Sethi, akisema, “Mungu amenipa mtoto mwingine mahali pa Habili, kwa kuwa Kaini alimuua.” 26Sethi naye alipata mtoto wa kiume, akamwita Enoshi. Wakati huo watu walianza kuliitia jina la BWANA.