Mwanzo 3

1Nyoka alikuwa mjanja kuliko mnyama yeyote wa porini ambaye BWANA Mungu alikuwa amemfanya. Akamwambia mwanamke, “Je, ni kweli Mungu aliwaambia msile kutoka mti wowote wa bustani?” 2Mwanamke akamjibu nyoka, “Tunaweza kula matunda ya miti ya bustani, 3lakini kuhusu matunda ya mti ulio katikati ya bustani, Mungu alisema, ‘Msile kutoka kwake, wala msiuguse, la sivyo mtakufa.’” 4“Hamtakufa kamwe!” nyoka akamwambia mwanamke. 5“Mungu anajua vizuri kwamba mtakapokula kutoka kwake, macho yenu yatafunguka na mtakuwa kama Mungu, mkiyajua mema na mabaya.” 6Mwanamke akaona kwamba mti huo ulikuwa mzuri kwa chakula, unapendeza macho, na unatamanika kwa kupata hekima. Basi akachuma baadhi ya matunda yake akala. Akampa pia mume wake, aliyekuwa hapo pamoja naye, naye akala. 7Ndipo macho ya wote wawili yakafunguka, wakatambua kwamba walikuwa uchi. Basi wakashona pamoja majani ya mtini, wakajifanyia mavazi ya kufunga kiunoni. 8Kisha wakasikia sauti ya BWANA Mungu akitembea bustanini wakati upepo wa jioni ulipokuwa ukivuma, na mtu na mke wake wakajificha katikati ya miti ya bustani ili BWANA Mungu asiwaone. 9Lakini BWANA Mungu akamwita mtu, “Uko wapi?” 10Akajibu, “Nilisikia vishindo vya miguu yako bustanini, nikaogopa kwa sababu nilikuwa uchi; ndiyo maana nikajificha.” 11Mungu akauliza, “Nani amekwambia kwamba ulikuwa uchi? Je, umekula kutoka mti ambao nilikuamuru usile?” 12Mtu akasema, “Ni yule mwanamke wewe uliyemweka hapa pamoja nami; yeye alinipa tunda la mti, nikala.” 13Kisha BWANA Mungu akamwambia mwanamke, “Ni nini hiki ulichofanya?” Mwanamke akasema, “Nyoka alinihadaa, nikala.” 14Basi BWANA Mungu akamwambia nyoka, “Kwa sababu umefanya hivi, umelaaniwa kuliko mifugo yote na wanyama wote wa porini! Utatambaa kwa tumbo lako na kula vumbi siku zote za maisha yako. 15Nitawafanya wewe na mwanamke kuwa maadui, na uzao wako na uzao wake pia. Yeye atakupiga kichwani, nawe utampiga kisiginoni.”

16Kwa mwanamke akasema, “Nitaongeza sana maumivu yako wakati wa kuzaa; kwa maumivu utazaa watoto. Shauku yako itakuwa kwa mume wako, naye atatawala juu yako.”

17Kwa mtu akasema, “Kwa sababu ulimsikiliza mke wako na kula kutoka mti niliokuamuru usile, ardhi imelaaniwa kwa sababu yako. Kwa kazi ngumu utapata chakula kutoka kwake siku zote za maisha yako. 18Itakuoteshea miiba na mbaruti, nawe utakula mimea ya shambani. 19Utakula mkate kwa jasho la uso wako mpaka utakaporudi ardhini, kwa sababu ulichukuliwa kutoka huko. Wewe ni mavumbi, na utarejea kuwa mavumbi.” 20Mtu akampa mke wake jina Hawa, kwa sababu angekuwa mama wa wote walio hai. 21BWANA Mungu akawatengenezea mtu na mke wake nguo za ngozi, akawavalisha.

22Kisha BWANA Mungu akasema, “Sasa mtu amekuwa kama mmoja wetu, kwa kuwa anajua mema na mabaya. Hapaswi kuruhusiwa kunyoosha mkono wake na kuchukua pia kutoka mti wa uzima, akala na kuishi milele.” 23Basi BWANA Mungu akamwondoa katika bustani ya Edeni ili aifanyie kazi ardhi aliyochukuliwa kutoka kwake. 24Baada ya kumfukuza mtu, akawaweka makerubi upande wa mashariki wa bustani ya Edeni, pamoja na upanga wa moto uliozunguka kila upande, ili kulinda njia ya kwenda kwenye mti wa uzima.