Mwanzo 13

1Abramu aliondoka Misri akapanda kwenda Negebu pamoja na mke wake na mali yake yote, naye Lutu akaenda pamoja naye. 2Wakati huo Abramu alikuwa tajiri mkubwa, mwenye mifugo, fedha na dhahabu. 3Kutoka Negebu alisafiri hatua kwa hatua hadi Betheli, mahali kati ya Betheli na Ai alipopiga hema lake mara ya kwanza, 4pale alipojenga madhabahu hapo awali. Huko Abramu akaliitia jina la BWANA. 5Lutu, aliyesafiri pamoja na Abramu, naye alikuwa na makundi yake ya kondoo na ng’ombe, na mahema. 6Nchi haikuwatosha wote wawili kuishi pamoja; walikuwa na mali nyingi mno hata hawakuweza kukaa pamoja. 7Muda si mrefu wachungaji wa Abramu na wachungaji wa Lutu wakaanza kugombana. Wakati huo Wakanaani na Waperizi nao walikuwa wamekaa katika nchi hiyo. 8Basi Abramu akamwambia Lutu, “Pasiwe na ugomvi kati yetu, wala kati ya wachungaji wako na wangu. Sisi ni jamaa moja. 9Nchi yote iko wazi mbele yako. Na tutengane. Wewe ukichukua kushoto, mimi nitachukua kulia; ukichukua kulia, mimi nitachukua kushoto.” 10Lutu akatazama uwanda wa Yordani, akaona maji kila mahali, hadi Soari, kama katika bustani ya BWANA au nchi ya Misri. (Hiyo ilikuwa kabla BWANA hajaangamiza Sodoma na Gomora.) 11Basi Lutu akajichagulia uwanda wote wa Yordani, akahamia upande wa mashariki. Hivyo wawili hao wakaachana. 12Abramu akabaki Kanaani; Lutu akaishi kati ya miji ya uwanda, akahamisha kambi yake mpaka Sodoma. 13Lakini watu wa Sodoma walikuwa waovu, wakimtenda BWANA dhambi kubwa. 14Baada ya Lutu kuondoka, BWANA akamwambia Abramu, “Inua macho yako, utazame kutoka hapo ulipo, kaskazini na kusini, mashariki na magharibi. 15Nchi yote unayoweza kuiona nakupa wewe na wazao wako hata milele. 16Nitawafanya wazao wako wasiohesabika kama mavumbi ya nchi; kama mtu angeweza kuhesabu mavumbi, ndipo wazao wako wangehesabika. 17Nenda, uisafiri nchi hii kutoka mwisho hadi mwisho na upande hadi upande, kwa sababu nakupa wewe.” 18Basi Abramu akahamisha mahema yake, akaenda kuishi karibu na miti mikubwa ya Mamre huko Hebroni, akamjengea BWANA madhabahu huko.