Mwanzo 9

1Kisha Mungu akambariki Nuhu na wanawe, akawaambia, “Zaeni kwa wingi, mwongezeke na kuijaza dunia. 2Kila mnyama duniani, kila ndege wa angani, kila kiumbe kinachotambaa ardhini na samaki wote wa baharini watawaogopa na kuwahofu. Wamewekwa chini ya mamlaka yenu. 3Kila kiumbe hai kinachotembea kitakuwa chakula chenu. Kama nilivyowapa mimea ya kijani, sasa nawapa vitu vyote. 4Lakini msile nyama ambayo bado ina damu yake, yaani uhai wake. 5Na kwa ajili ya damu yenu, yaani uhai wenu, hakika nitadai hesabu. Nitaidai kwa kila mnyama na kwa kila mwanadamu: kwa kila mtu nitadai hesabu ya uhai wa mwenzake. 6Yeyote amwagaye damu ya binadamu, damu yake itamwagwa na binadamu; kwa kuwa Mungu aliwafanya wanadamu kwa sura yake mwenyewe. 7Na ninyi, zaeni kwa wingi na mwongezeke; eneeni duniani na mwongezeke ndani yake.”

8Kisha Mungu akamwambia Nuhu na wanawe waliokuwa pamoja naye, 9“Sasa ninalithibitisha agano langu nanyi na wazao wenu baada yenu, 10na kila kiumbe hai kilichokuwa pamoja nanyi, ndege, mifugo na wanyama wote wa porini, wote waliotoka katika safina pamoja nanyi, kila kiumbe hai duniani. 11Ninalithibitisha agano langu nanyi: kamwe uhai wote hautakatiliwa mbali tena kwa maji ya gharika, wala hakutakuwa tena na gharika ya kuiharibu dunia.” 12Mungu akasema, “Hii ndiyo ishara ya agano ninalofanya kati yangu nanyi na kila kiumbe hai kilicho pamoja nanyi, kwa vizazi vyote vijavyo: 13Nimeuweka upinde wangu katika mawingu, uwe ishara ya agano kati yangu na dunia. 14Kila mara nitakapoleta mawingu juu ya dunia na upinde ukaonekana mawinguni, 15nitalikumbuka agano langu kati yangu nanyi na kila kiumbe hai cha kila aina. Kamwe maji hayatakuwa tena gharika ya kuangamiza uhai wote. 16Upinde utakapokuwa mawinguni, nitauona na kulikumbuka agano la milele kati ya Mungu na kila kiumbe hai cha kila aina kilicho duniani.” 17Basi Mungu akamwambia Nuhu, “Hii ndiyo ishara ya agano nililolithibitisha kati yangu na uhai wote duniani.”

18Wana wa Nuhu waliotoka katika safina walikuwa Shemu, Hamu na Yafethi. Hamu alikuwa baba wa Kanaani. 19Hawa watatu walikuwa wana wa Nuhu, na kutoka kwao walitokea watu wote walioenea duniani. 20Nuhu, mtu aliyelima ardhi, ndiye aliyekuwa wa kwanza kupanda shamba la mizabibu. 21Alipokunywa sehemu ya divai yake, alilewa, akalala bila nguo ndani ya hema lake. 22Hamu, baba wa Kanaani, alimwona baba yake yu uchi, akatoka nje akawaambia ndugu zake wawili. 23Lakini Shemu na Yafethi walichukua nguo, wakaiweka mabegani mwao, wakaingia kinyumenyume ili kuufunika uchi wa baba yao. Nyuso zao zilikuwa zimegeukia upande mwingine, hivyo hawakumwona baba yao akiwa uchi. 24Nuhu alipoamka kutoka katika ulevi wake na kujua kile ambacho mwanawe mdogo kuliko wote alimtendea, 25akasema, “Kanaani alaaniwe! Atakuwa mtumishi wa chini kabisa wa ndugu zake.” 26Akasema pia, “Ahimidiwe BWANA, Mungu wa Shemu! Kanaani na awe mtumishi wake. 27Mungu na ampe Yafethi nafasi pana, naye akae katika mahema ya Shemu. Kanaani na awe mtumishi wake.” 28Baada ya gharika Nuhu aliishi miaka 350. 29Kwa jumla Nuhu aliishi miaka 950, kisha akafa.