Mwanzo 39

1Wakati huo Yusufu alikuwa amepelekwa Misri. Waishmaeli waliomleta huko walimwuza kwa Potifa, Mmisri aliyemtumikia Farao kama afisa wa ikulu na mkuu wa walinzi wake. 2BWANA alikuwa pamoja na Yusufu, naye akafanikiwa sana alipokuwa akitumika katika nyumba ya bwana wake, yule Mmisri. 3Bwana wake aliona kwamba BWANA alikuwa pamoja naye, na kwamba BWANA alifanikisha kila jambo Yusufu alilolishughulikia. 4Yusufu alipata kibali kwa bwana wake, akawa mhudumu wake binafsi. Kisha bwana wake akamfanya msimamizi wa nyumba yake, akamkabidhi kila kitu alichokuwa nacho. 5Mara Yusufu alipopewa usimamizi wa nyumba na wa mali yote ya yule Mmisri, BWANA akaibariki nyumba hiyo kwa sababu ya Yusufu. Kila kitu alichokuwa nacho mtu huyo, nyumbani au mashambani, kilikuwa chini ya baraka ya BWANA. 6Basi yule Mmisri aliacha kila kitu alichokuwa nacho mikononi mwa Yusufu. Kwa kuwa Yusufu alikuwapo, hakujishughulisha na jambo lolote ila chakula alichokula. Yusufu alikuwa na umbo zuri na sura nzuri. 7Muda fulani baadaye mke wa bwana wake alimtamani Yusufu. Akamwambia, “Lala nami.” 8Akakataa. Akamwambia mke wa bwana wake, “Unaona, kwa kuwa niko hapa, bwana wangu hajishughulishi na lolote linalotendeka nyumbani. Amekabidhi kila kitu alicho nacho chini ya uangalizi wangu. 9Yeye hana cheo kunizidi katika nyumba hii. Kitu pekee alichoninyima ni wewe, kwa kuwa wewe ni mke wake. Ningewezaje kufanya ubaya mkubwa namna hii, nikamkosea Mungu?” 10Alimsihi Yusufu siku baada ya siku, lakini hakumsikiliza, wala kukubali kulala kando yake au kuwa pamoja naye. 11Lakini siku moja, Yusufu alipoingia nyumbani ili kushughulikia kazi yake, na hapakuwa na mtu yeyote wa nyumba ile ndani, 12mwanamke huyo akalishika vazi lake. Akasema, “Lala nami!” Lakini Yusufu akamkimbia, akatoka nje, akaliacha vazi lile mkononi mwake. 13Alipoona kwamba amekimbia nje na kumwachia vazi lake mkononi, 14akawaita watu wa nyumbani mwake, akawaambia, “Angalieni! Ametuletea Mwebrania huyu atuchezee. Mtu huyu aliingia kwangu ili alale nami, nami nikapiga kelele kwa nguvu zangu zote. 15Aliposikia nikipaza sauti na kupiga kelele, aliliacha vazi lake kando yangu, akakimbilia nje.” 16Akaliweka vazi lile kando yake, akamngoja bwana wa Yusufu arudi nyumbani. 17Kisha akamweleza yote hayo: “Yule mtumwa Mwebrania uliyemleta kwetu aliingia kwangu ili anichezee. 18Lakini nilipopaza sauti na kupiga kelele, aliliacha vazi lake kando yangu, akakimbia nje.” 19Bwana wa Yusufu alimsikiliza mkewe akimwambia, “Hivyo ndivyo mtumwa wako alivyonitendea,” naye akakasirika sana. 20Akamkamata Yusufu, akamfunga katika gereza lililotumika kwa wafungwa wa mfalme, na Yusufu akabaki humo. 21Lakini BWANA alikuwa pamoja na Yusufu. Akamtendea kwa upendo usiokoma, akamfanya apate kibali kwa mkuu wa gereza. 22Mkuu wa gereza alimkabidhi Yusufu uangalizi wa wafungwa wote waliokuwamo, na Yusufu ndiye aliyeongoza kazi yote iliyofanyika humo. 23Mkuu wa gereza hakuwahi kukagua jambo lolote alilokabidhiwa Yusufu, kwa kuwa BWANA alikuwa pamoja naye, na kila Yusufu alilofanya, BWANA alilifanikisha.