Mwanzo 27

1Isaka alikuwa amezeeka, na macho yake yalikuwa yamefifia hata hakuweza kuona tena. Akamwita Esau, mkubwa wa wanawe wawili, akamwambia, “Mwanangu!” Esau akajibu, “Naam, niko hapa.” 2“Sasa nimekuwa mzee,” Isaka akasema, “na siku yoyote inaweza kuwa siku yangu ya mwisho. 3Basi chukua vifaa vyako vya kuwinda, podo lako na upinde wako, uende nyikani ukaniwindie nyama. 4na uniandalie mchuzi mtamu ule ninaoupenda. Uniletee nile, ili mimi mwenyewe nikubariki kabla sijafa.” 5Rebeka alikuwa akisikiliza Isaka alipokuwa akizungumza na mwanawe Esau. Kwa hiyo Esau alipokwenda nyikani kuwinda mnyama na kumleta, 6Rebeka akamwambia mwanawe Yakobo, “Sikiliza. Nimemsikia baba yako akimwambia ndugu yako Esau, 7‘Niletee nyama ya mawindo, uniandalie chakula kitamu. Nikishakula nitakubariki mbele za BWANA kabla sijafa.’ 8Sasa, mwanangu, fanya sawasawa na ninavyokuambia. 9Nenda kundini ukanichagulie wanambuzi wawili wazuri. Nitawapika kuwa mchuzi mtamu ule anaoupenda baba yako. 10Kisha umpelekee baba yako ale, ili wewe ndiye akubariki kabla hajafa.” 11Lakini Yakobo akamwambia mama yake Rebeka, “Ndugu yangu Esau ni mtu mwenye nywele nyingi mwilini, lakini mimi ngozi yangu ni laini. 12Tuseme baba yangu akinigusa. Ataona kwamba ninamdhihaki, nami nitajiletea laana badala ya baraka.” 13Mama yake akajibu, “Basi laana na iwe juu yangu, mwanangu. Wewe fanya tu ninavyokuambia. Nenda uniletee wanambuzi.” 14Basi Yakobo akaenda akawachukua, akamletea mama yake, naye akapika mchuzi mtamu kama baba yake alivyoupenda. 15Kisha Rebeka akachukua mavazi bora kabisa ya mwanawe mkubwa Esau, aliyoyaweka nyumbani, akamvika mwanawe mdogo Yakobo. 16Pia akaifunika mikono yake na ngozi laini ya shingo yake kwa ngozi za wanambuzi. 17Kisha akampa mwanawe Yakobo mchuzi mtamu na mkate aliokuwa ameuoka. 18Akaingia kwa baba yake, akasema, “Baba!” Isaka akasema, “Naam. Wewe ni mwanangu yupi?” 19Yakobo akamwambia baba yake, “Ni mimi Esau, mzaliwa wako wa kwanza. Nimefanya kama ulivyoniagiza. Tafadhali inuka uketi, ule nyama ya mawindo yangu, kisha unibariki.” 20Isaka akauliza, “Mwanangu, umeyapataje upesi hivi?” Akajibu, “BWANA Mungu wako aliyaleta njiani mwangu.” 21Kisha Isaka akamwambia Yakobo, “Sogea karibu, mwanangu, nikuguse, nijue kama kweli wewe ni mwanangu Esau.” 22Yakobo akamkaribia baba yake Isaka, naye akampapasa, akasema, “Sauti ni kama ya Yakobo, lakini mikono hii ni ya Esau.” 23Hakugundua hila hiyo, kwa sababu mikono ya Yakobo ilikuwa na nywele nyingi kama ya ndugu yake Esau; basi akambariki. 24Akauliza tena, “Kweli wewe ni mwanangu Esau?” Yakobo akasema, “Ndimi.” 25Isaka akasema, “Basi niletee, nile mawindo ya mwanangu, nipate kukubariki.” Yakobo akamwandalia chakula, naye akala. Akamletea pia divai, naye akanywa. 26Kisha baba yake Isaka akamwambia, “Njoo hapa, mwanangu, unibusu.” 27Basi akasogea, akambusu, na Isaka aliposikia harufu ya mavazi yake, akambariki, akisema, “Aha, harufu ya mwanangu ni kama ya nyika ambayo BWANA ameibariki! 28Mungu akujalie umande unaoshuka kutoka angani na utajiri wa ardhi yenye rutuba, pamoja na nafaka na divai mpya kwa wingi. 29Watu wa mataifa wawe watumishi wako, na mataifa yakuinamie. Uwatawale ndugu zako, na wana wa mama yako wakuinamie. Kila akulaaniye na alaaniwe; kila akubarikiye na abarikiwe.” 30Isaka alikuwa amemaliza tu kumbariki Yakobo, na Yakobo alikuwa ndiyo kwanza ametoka mbele ya baba yake, ndipo ndugu yake Esau akarudi kutoka kuwinda. 31Yeye naye akapika mchuzi mtamu, akamletea baba yake. Akasema, “Baba, inuka uketi, ule mawindo ya mwanao, ili upate kunibariki.” 32Baba yake Isaka akamwuliza, “Wewe ni nani?” Akasema, “Ni mwanao, mzaliwa wako wa kwanza, Esau.” 33Isaka akaanza kutetemeka mwili mzima. Akasema, “Basi ni nani aliyewinda na kuniletea mawindo? Nimekula yote kabla hujaja, nami nimembariki, naye atabaki amebarikiwa!” 34Esau aliposikia aliyosema baba yake, akapiga kelele kubwa ya uchungu. Akamsihi, “Baba, unibariki na mimi pia!” 35Lakini Isaka akasema, “Ndugu yako alikuja hapa kwa ujanja, akaondoka na baraka yako.” 36Esau akasema, “Si ajabu anaitwa Yakobo! Mara mbili sasa amenizunguka na kunidanganya. Kwanza alichukua nafasi yangu ya mzaliwa wa kwanza, na sasa tazama, ameichukua baraka yangu pia.” Kisha akauliza, “Je, hukunibakizia baraka yoyote?” 37Isaka akamjibu Esau, “Nimekwisha kumfanya kuwa bwana wako. Nimempa jamaa zake wote wamtumikie, na nafaka na divai mpya za kumtosheleza. Basi nimebakiwa na nini cha kukufanyia, mwanangu?” 38Esau akasema, “Je, hiyo ndiyo baraka pekee uliyo nayo, Baba? Unibariki na mimi pia, baba yangu!” Esau akaangua kilio kwa sauti. 39Baba yake Isaka akamjibu, “Utafanya makao yako mbali na ardhi yenye rutuba, na mbali na umande wa angani juu. 40Upanga wako utakupatia riziki, nawe utakuwa mtumishi wa ndugu yako. Lakini siku itakuja utakapojikomboa na kuitupa nira aliyokuweka shingoni.” 41Esau akaendelea kumwekea Yakobo kinyongo kwa sababu ya baraka ambayo baba yake alikuwa amempa. Akajisemea, “Baba yangu atakufa karibuni, nasi tutamwombolezea. Wakati huo ukipita, nitamwua ndugu yangu Yakobo.” 42Rebeka alipoambiwa aliyokuwa akisema mwanawe mkubwa Esau, akatuma mtu amwite mwanawe mdogo Yakobo, akamwambia, “Ndugu yako Esau anajifariji kwa wazo la kukuua. 43Sasa, mwanangu, fanya ninavyokuambia. Ondoka sasa hivi, ukimbilie kwa ndugu yangu Labani huko Harani. 44Kaa naye kwa muda mfupi, hadi hasira kali ya ndugu yako ipoe, 45mpaka hasira yake juu yako iishe, naye awe amesahau ulichomtendea. Ndipo nitatuma ujumbe nikurudishe. Je, nipokonywe ninyi wawili kwa siku moja?” 46Kisha Rebeka akamwambia Isaka, “Wanawake hawa Wahiti wameyafanya maisha yangu kuwa machungu. Kama Yakobo naye akioa mmoja wa wanawake hawa Wahiti wa nchi hii, ni afadhali nife.”