Mwanzo 28

1Basi Isaka alimwita Yakobo, akambariki, akampa agizo hili: “Usioe mwanamke Mkanaani. 2Ondoka sasa uende Padan-aramu, nyumbani kwa Bethueli, baba wa mama yako, ukajitafutie mke huko miongoni mwa binti za mjomba wako Labani. 3Mungu Mwenyezi akubariki, akupe watoto na kuwazidisha, mpaka uwe kusanyiko zima la mataifa. 4Akupe wewe na wazao wako baraka aliyompa Abrahamu, ili uimiliki nchi unamoishi sasa kama mgeni, nchi ambayo Mungu alimpa Abrahamu.” 5Kisha Isaka akamruhusu Yakobo aende zake, naye akashika njia kwenda Padan-aramu, kwa Labani mwana wa Bethueli Mwaramu. Labani alikuwa kaka wa Rebeka, mama wa Yakobo na Esau. 6Esau alipata habari kwamba Isaka amembariki Yakobo na kumpeleka Padan-aramu ili akatafute mke huko, na kwamba alipombariki alimwambia, “Usioe mwanamke Mkanaani,” 7na kwamba Yakobo alikuwa amefanya kama baba yake na mama yake walivyomwambia, akaenda Padan-aramu. 8Ndipo Esau akatambua kwamba baba yake Isaka hapendezwi na wanawake Wakanaani, 9basi akaenda kwa jamaa ya Ishmaeli, na zaidi ya wake aliokuwa nao tayari, akamwoa Mahalathi, binti wa Ishmaeli mwana wa Abrahamu, dada yake Nebayothi.

10Yakobo aliondoka Beer-sheba, akashika njia kwenda Harani. 11Alifika mahali fulani, akasimama hapo kulala usiku, kwa sababu jua lilikuwa limetua. Akachukua jiwe moja la mahali hapo, akaliweka karibu na kichwa chake, akajilaza pale ili alale. 12Aliota ndoto, akaona mbele yake ngazi imesimama ardhini, kilele chake kikigusa anga, na malaika wa Mungu wakipanda na kuteremka juu yake. 13Hapo juu yake alisimama BWANA, akasema, “Mimi ni BWANA, Mungu wa baba yako Abrahamu na wa Isaka. Nitakupa wewe na wazao wako ardhi hii unayoilalia. 14Wazao wako watakuwa wengi wasiohesabika kama vumbi la ardhi, nawe utaenea kwa nguvu magharibi na mashariki, kaskazini na kusini. Kupitia wewe na wazao wako, jamaa zote za dunia zitapata baraka. 15Mimi niko pamoja nawe. Nitakulinda kila mahali uendapo na kukurudisha katika nchi hii. Sitakuacha mpaka nitimize yote niliyokuambia.” 16Yakobo alipoamka kutoka usingizini, akasema, “Kumbe BWANA yuko hapa kweli, mahali hapa, nami sikujua kabisa!” 17Akajawa na hofu, akasema, “Mahali hapa ni pa kuogofya mno! Hii ni nyumba ya Mungu mwenyewe, na huu ni mlango wa kuingia mbinguni.” 18Kesho yake alfajiri Yakobo alichukua jiwe alilokuwa ameliweka karibu na kichwa chake, akalisimika wima kuwa nguzo takatifu, akamwaga mafuta juu yake. 19Akapaita mahali pale Betheli, ingawa hapo awali mji huo uliitwa Luzu. 20Kisha Yakobo akaweka nadhiri: “Mungu akikaa pamoja nami na kunilinda njiani ninaposafiri, akinipatia chakula na mavazi, 21nami nikirudi salama nyumbani kwa baba yangu, basi BWANA atakuwa Mungu wangu, 22na jiwe hili nililolisimika kuwa nguzo litakuwa nyumba ya Mungu. Na kwa kila utakachonipa, nitakurudishia sehemu moja ya kumi.”