Banzembo 89

¹Maloba ya Etani, moto ya Ezera.

²Nakoyemba tango nyonso bolingo ya Yawe; monoko na ngai ekosakola boyengebene na Yo libela na libela.

³Solo, nazali kotatola yango: « Miboko ya bolingo na Yo ezali na suka te; ovandisi boyengebene na Yo kati na likolo. »

⁴Olobaki: « Nasali boyokani elongo na moponami na ngai, nalapi ndayi epai ya mosali na ngai, Davidi:

⁵‹ Nakokomisa yo libota ya bokonzi mpo na tango nyonso mpe nakolendisa kiti na yo ya bokonzi mpo na seko. › »

⁶Yawe, Lola esanzolaka misala na Yo ya kokamwa mpe bosembo na Yo kati na lisanga ya basantu.

⁷Nani akokani na Yawe kuna na likolo? Nani akokani na Yawe kati na mampinga ya likolo?

⁸Azali Nzambe ya somo kati na lisanga ya basantu; solo, azali somo koleka ba-oyo nyonso bazingeli Ye.

⁹Yawe, Nzambe-Na-Nguya-Nyonso, nani azali na nguya lokola Yo? Nani, oh Yawe? Boyengebene na Yo ezingeli Yo.

¹⁰Yo nde okonzaka lolendo ya ebale monene mpe okitisaka bambonge na yango soki etomboki.

¹¹Yo nde olongaki Rahavi, dalagona ya Ejipito, kino koboma ye; mpe, na nguya na Yo, opanzaki banguna na Yo.

¹²Likolo ezali ya Yo; mabele mpe ezali ya Yo! Yo nde osala mokili mpe nyonso oyo ezali kati na yango.

¹³Yo nde okela Nor mpe Sude; Tabori mpe Erimoni egangaka na esengo mpo na lokumu ya Kombo na Yo.

¹⁴Loboko na Yo ezali na makasi, loboko na Yo ezali na nguya, loboko na Yo ya mobali oyo otombola.

¹⁵Bosembo mpe alima ezali miboko ya Kiti ya Bokonzi na Yo, boyengebene mpe bolingo etambolaka liboso na Yo.

¹⁶Esengo na bato oyo bayebi kobetela Yo maboko! Yawe, batambolaka na pole ya elongi na Yo,

¹⁷basepelaka mikolo nyonso na Kombo na Yo, basanzolaka bosembo na Yo.

¹⁸Pamba te ozali nkembo mpe nguya na bango; mpe olongisaka biso na ngolu na Yo.

¹⁹Yawe azali nguba na biso; Mosantu ya Isalaele azali Mokonzi na biso.

²⁰Mokolo moko, olobaki na bayengebene na Yo kati na emoniseli: « Nasungaki elombe moko ya bitumba, natombolaki elenge mobali moko kati na bato na ngai;

²¹namonaki Davidi, mosali na ngai; napakolaki ye mafuta na ngai ya bule.

²²Nakobatela ye na loboko na ngai ya nguya, mpe loboko na ngai ekokomisa ye makasi.

²³Monguna akobimela ye ata moke te na pwasa, moto mabe akokoka konyokola ye te.

²⁴Nakobebisa banguna na ye liboso na ye mpe nakoboma bayini na ye.

²⁵Bolingo mpe boyengebene na ngai ekozala elongo na ye; mpe na Kombo na Ngai, akotombola elongi.

²⁶Nakotia ebale monene na se ya loboko na ye, mpe bibale, na se ya loboko na ye ya mobali.

²⁷Akobelela ngai boye: ‹ Ozali Tata na ngai, Nzambe na ngai, Libanga mpe Mobikisi na ngai! ›

²⁸Mpe ngai, nakokomisa ye mwana na ngai ya liboso, mokonzi oyo aleki na kotombwama kati na bakonzi ya mokili.

²⁹Nakobatela mpo na seko bolingo na ngai mpo na ye; boyokani na ngai elongo na ye ekotikala kobeba te.

³⁰Nakobatela mpo na libela libota na ye ya bokonzi, mpe kiti na ye ya bokonzi ekowumela ndenge moko na likolo.

³¹Soki bana na ye basundoli mibeko na ngai mpe balandi bosembo na ngai te,

³²soki babuki mitindo na ngai mpe babateli te mibeko na ngai,

³³nakopesa bango etumbu na nzela ya lingenda, mpo na botomboki na bango, mpe na nzela ya makofi, mpo na masumu na bango;

³⁴kasi nakowangana te bolingo na ngai mpe nakobongola te boyengebene na ngai.

³⁵Nakosambwisa te boyokani na ngai mpe nakobongola te maloba na ngai.

³⁶Nalapaki yango na ndayi mbala moko mpo na libela na Kombo ya bosantu na ngai: ‹ Nakokosa Davidi te! ›

³⁷Libota na ye ya bokonzi ekowumela mpo na libela, mpe kiti na ye ya bokonzi ekowumela lokola moyi liboso na ngai.

³⁸Solo, lokola sanza, ekowumela na bokonzi mpo na libela. Motatoli oyo azali kuna kati na likolo akoki kokosa te. »

³⁹Nzokande, obwakaki, omonaki pamba, osilikelaki mopakolami na Yo!

⁴⁰Owanganaki boyokani oyo osalaki elongo na mosali na Yo, obwakaki na mabele mpe osambwisaki motole na ye.

⁴¹Otobolaki madusu kati na bamir na ye nyonso mpe obukaki bandako na ye, oyo batonga makasi;

⁴²bato nyonso oyo balekaki wana babotolaki ye biloko, mpe bavandi ya pembeni na ye bakomaki kotiola ye.

⁴³Obakisaki makasi ya bayini na ye mpe otondisaki banguna na ye nyonso na esengo,

⁴⁴osalaki kutu ete mopanga na ye ebalukela ye moko mpe osungaki ye te na bitumba;

⁴⁵osilisaki kongenga ya lokumu na ye, obwakaki kiti na ye ya bokonzi na mabele;

⁴⁶okomisaki moke mikolo ya bolenge na ye mpe olatisaki ye kazaka ya soni.

⁴⁷Yawe, kino tango nini? Okomibomba penza tango nyonso? Kino tango nini kanda na Yo ekongala lokola moto?

⁴⁸Kanisa motango ya mikolo ya bomoi na ngai! Okelaki penza bato mpo na suka oyo ezanga ata tina!

⁴⁹Moto nani akoki kozala na bomoi mpe azanga komona kufa? Nani akolonga kokima nguya ya mboka ya bakufi?

⁵⁰Nkolo, wapi bolingo na Yo ya kala oyo alakaki Davidi na boyengebene na Yo na nzela ya ndayi?

⁵¹Nkolo, kanisa ndenge bazali kosakanela basali na Yo; kobosana te ete namemi mokumba ya bato oyo nyonso!

⁵²Yawe, kanisa mafinga ya banguna na Yo, oyo batiolaka bomoi ya mopakolami na Yo!

⁵³Tika ete Yawe apambolama libela na libela! Amen! Amen!