Banzembo 107

¹Bosanzola Yawe, pamba te azali malamu, mpe bolingo na Ye ewumelaka seko na seko!

²Tika ete bato oyo Yawe asikolaki baloba bongo, ba-oyo akangolaki wuta na maboko ya monguna,

³ba-oyo asangisaki wuta na bikolo nyonso, wuta na este, na weste, na nor mpe na sude.

⁴Ndambo bazalaki koyengayenga na esobe, na esika oyo ezanga bato, bamonaki te nzela ya engumba epai wapi bakoki kovanda.

⁵Likolo ya nzala mpe ya posa ya mayi, bakomaki pene ya kokufa.

⁶Bongo kati na pasi na bango, babelelaki Yawe, mpe akangolaki bango na mitungisi na bango.

⁷Atambolisaki bango na nzela ya alima mpo ete bakende kovanda kati na engumba.

⁸Tika ete basanzola Yawe mpo na bolingo mpe bikamwa na Ye mpo na bato!

⁹Apesaki mayi epai ya bato oyo bazalaki na posa ya mayi mpe bilei epai ya bato oyo bazalaki na nzala.

¹⁰Bato oyo bazalaki kovanda na bisika ya molili makasi mpe ya molili ya kufa bazalaki ya kokangama na minyoko mpe na minyololo ya bibende,

¹¹pamba te batombokelaki maloba na Nzambe mpe batiolaki mabongisi ya Ye-Oyo-Aleki-Likolo.

¹²Abukaki lolendo ya mitema na bango na nzela ya misala makasi; bakweyaki, mpe moko te asungaki bango.

¹³Kati na pasi na bango, babelelaki Yawe, mpe abikisaki bango na mitungisi na bango.

¹⁴Abimisaki bango wuta na molili makasi mpe na molili ya kufa, mpe abukaki minyololo na bango.

¹⁵Tika ete basanzola Yawe mpo na bolingo mpe bikamwa na Ye mpo na bato!

¹⁶Pamba te abukaki bikuke ya bronze mpe akataki bikangelo ya mabende.

¹⁷Bamosusu bakomaki bazoba mpo na etamboli mabe na bango, mpe bato na pasi, mpo na masumu na bango.

¹⁸Minoko na bango eyinaki bilei nyonso, mpe bakomaki pene ya bikuke ya kufa.

¹⁹Kati na pasi na bango, babelelaki Yawe, mpe abikisaki bango na mitungisi na bango.

²⁰Atindaki Liloba na Ye mpe abikisaki bango, akangolaki bango wuta na kunda.

²¹Tika ete basanzola Yawe mpo na bolingo mpe bikamwa na Ye mpo na bato!

²²Tika ete babonza bambeka ya kozongisa matondi mpe bapanza sango ya misala na Ye na koganga na esengo!

²³Bato oyo bakendaka mobembo na ebale monene kati na masuwa mpe basalaka mombongo na mayi minene

²⁴bamonaki misala ya Yawe, mpe bikamwa kati na ebale monene.

²⁵Alobaki, mpe mopepe makasi eyaki, etombolaki bambonge.

²⁶Bazalaki komata kino na likolo mpe kokita kino na se, bazalaki kolemba nzoto kati na pasi.

²⁷Bazwaki kizunguzungu mpe bakomaki kotenga-tenga lokola bato balangwe masanga, bwanya na bango nyonso elimwaki.

²⁸Kati na pasi na bango, babelelaki Yawe mpe abimisaki bango na mitungisi na bango.

²⁹Akitisaki mopepe makasi, bambonge ya ebale monene evandaki kimia.

³⁰Basepelaki na kimia oyo ezongaki, mpe Nzambe amemaki bango kino na libongo oyo balingaki.

³¹Tika ete basanzola Yawe mpo na bolingo mpe bikamwa na Ye mpo na bato!

³²Tika ete banetola Ye kati na lisanga ya bato mpe bakumisa Ye kati na mayangani ya bakambi.

³³Akoki kobongola bibale esobe; kobongola bitima mabele ya kokawuka;

³⁴kobongola mabele oyo ebotaka bambuma mabele ya mungwa likolo ya mabe ya bavandi na yango.

³⁵Akoki kobongola esobe liziba; kobongola mabele ya kokawuka bitima.

³⁶Akoki kosala ete bato na nzala bakoma kovanda kuna, batonga engumba oyo bato bakoki kovanda,

³⁷babwaka bambuma na bilanga mpe balona banzete ya vino oyo ekobota bambuma ebele.

³⁸Apamboli bango, mpe bakomi ebele; mpe akitisi te motango ya bibwele na bango.

³⁹Motango ya bato mosusu ekiti mpe balembi nzoto mpo na minyoko mpe pasi.

⁴⁰Nzambe asambwisaka bato minene, akotisaka bango na mobulu makasi kino bazanga nzela ya kobimela na pasi.

⁴¹Kasi akangolaka babola wuta na pasi na bango, mpe asalaka ete babotana ebele kati na bituka na bango lokola etonga ya bameme.

⁴²Tango bato ya sembo bamonaka bongo, basepelaka, kasi bato nyonso ya mabe bakangaka minoko na bango.

⁴³Tika ete moto ya bwanya asala keba na makambo wana nyonso mpe akanisa na tina na bolingo ya Yawe!