Banzembo 48

¹Nzembo ya bana ya Kore.

²Yawe azali monene mpe abongi na lokumu, kati na engumba ya Nzambe na biso, ngomba na Ye ya bule.

³Ezali kitoko, ngomba moke oyo esalaka esengo ya mokili mobimba, ngomba Siona! Ngambo na yango ya Nor nde ezali engumba ya Mokonzi Monene.

⁴Nzambe azali kati na bandako na yango ya bokonzi, amimonisi lokola ndako batonga makasi.

⁵Pamba te bakonzi basanganaki, batambolaki nzela moko.

⁶Kasi tango kaka bamonaki yango, bakamwaki mpe bakimaki na somo.

⁷Mbala moko, bakomaki kolenga wana lokola mwasi oyo azali na pasi ya kobota

⁸to lokola mopepe ya Este oyo apanzaka masuwa ya Tarsisi.

⁹Ndenge kaka bayebisaki biso, ndenge mpe tomonaki kati na engumba ya Yawe, Mokonzi ya mampinga, kati na engumba ya Nzambe na biso; Nzambe alendisaka yango seko na seko.

¹⁰Nzambe, kati na Tempelo na Yo, tokanisaka bolingo na Yo.

¹¹Nzambe, lokumu na Yo epanzani kino na suka ya mokili, ndenge moko na Kombo na Yo; loboko na Yo ya mobali etondi na bosembo.

¹²Ngomba ya Siona ezali kosepela, bamboka ya Yuda etondi na esengo mpo na mikano na Yo.

¹³Botambola pembeni ya Siona, bokende zingazinga na yango, botanga bandako na yango ya milayi.

¹⁴Botala lopango na yango, botala malamu bandako na yango mpo ete bopesa sango epai ya bato oyo bakoya na sima.

¹⁵Pamba te Nzambe wana azali Nzambe na biso seko na seko mpe libela na libela; akotambolisa biso, ezala kino na kufa.