Banzembo 103

¹Nzembo ya Davidi. Eh molimo na ngai, pambola Yawe! Tika ete motema na ngai mobimba epambola Kombo na Ye ya bule!

²Eh molimo na ngai, pambola Yawe mpe kobosana ata moko te kati na misala malamu na Ye!

³Ye nde alimbisaka masumu na Yo nyonso, abikisaka yo na bokono nyonso,

⁴akangolaka bomoi na yo wuta na libulu, alatisaka yo motole ya bolingo mpe ya mawa,

⁵atondisaka bomoi na yo na esengo mpe akomisaka yo elenge lokola mpongo.

⁶Yawe asalaka mpo na bosembo, akotelaka banyokolami nyonso.

⁷Amonisaki banzela na Ye epai ya Moyize, mpe bikamwa na Ye epai ya bato ya Isalaele.

⁸Yawe ayokelaka bato mawa mpe asalelaka bango bolamu, asilikaka noki te mpe atonda na bolingo;

⁹azwaka biso makambo te tango nyonso, abombaka kanda na Ye te mpo na libela;

¹⁰apamelaka biso te kolanda masumu na biso, azongiselaka biso te kolanda mabe na biso.

¹¹Ndenge likolo etombolama mosika ya mabele, ndenge wana mpe bolingo na Ye ezali monene mpo na bato oyo batosaka Ye;

¹²ndenge este ezali mosika ya weste, ndenge wana mpe abwakaka masumu na biso mosika na biso.

¹³Ndenge tata alingaka makasi bana na ye, ndenge wana mpe Yawe alingaka makasi bato oyo batosaka Ye;

¹⁴pamba te Yawe ayebi na eloko nini asala biso, ayebi malamu ete tozali putulu.

¹⁵Mikolo ya bomoi ya moto ezali lokola matiti, ebongaka lokola fololo ya bilanga;

¹⁶nzokande soki kaka mopepe ebeti yango, ezalaka lisusu te, mpe esika epai wapi ezalaki ebosani yango.

¹⁷Kasi bolingo ya Yawe mpo na bato oyo batosaka Ye, mpe bosembo na Ye mpo na bakitani na bango,

¹⁸mpo na bato oyo babatelaka boyokani na Ye mpe batosaka mibeko na Ye, ezali ya libela na libela.

¹⁹Yawe atia Kiti na Ye ya Bokonzi kati na Likolo, azali Mokonzi ya mokili mobimba.

²⁰Bopambola Yawe, bino ba-anjelu na Ye nyonso oyo bozali na nguya mpe botosaka mitindo na Ye.

²¹Bopambola Yawe, bino mampinga na Ye nyonso oyo bokokisaka mokano na Ye.

²²Bopambola Yawe, bino bikelamu na Ye nyonso, kati na bisika nyonso ya Bokonzi na Ye. Eh molimo na ngai, pambola Yawe!