Banzembo 140

¹Wuta na buku ya mokambi ya bayembi. Nzembo ya Davidi.

²Yawe, kangola ngai wuta na maboko ya bato ya misala mabe! Kokutanisa ngai te na bato na kanza.

³Basalaka mabongisi mabe kati na mitema na bango mpe balukaka bitumba mikolo nyonso.

⁴Bapelisaka lolemo na bango lokola nyoka, bibebu na bango ezali na ngenge ya etupa.

⁵Yawe, batela ngai mosika ya maboko ya moto mabe; kokutanisa ngai te na bato na kanza oyo bazali kosala mabongisi ya kokweyisa ngai!

⁶Bato ya lofundu batieli ngai mitambo, batandi basinga ya minyama na nzela mpe batimoli mabulu mpo na kokanga ngai.

⁷Nalobaka na Yawe: « Ozali Nzambe na ngai! » Yawe, yoka mabondeli na ngai.

⁸Oh Yawe, Nkolo na ngai, ozali makasi ya lobiko na ngai, obatelaka moto na ngai kati na mokolo ya etumba.

⁹Yawe, kokokisa te posa ya moto mabe, kolongisa te mabongisi na ye, noki te akokoma lolendo.

¹⁰Tika ete pasi oyo bibebu na bango esili kobongisa ekweyela bato oyo bazingeli ngai.

¹¹Tika ete makala ya moto esopanela bango! Tika ete Nzambe atindika bango kati na moto, kati na mabulu ya potopoto epai wapi bakokoka kotelema lisusu te!

¹²Batioli bakowumela te kati na mokili, pasi ekolanda bato na kanza na kolemba te.

¹³Nayebi ete Yawe akotaka makambo ya babola mpe alongisaka bato oyo bakelela.

¹⁴Solo, bato ya sembo bakosanzola Kombo na Yo, bato ya alima bakovanda liboso na Yo.