Banzembo 78

¹Nzembo ya Azafi. Bino, bato na ngai, boyoka malako na ngai! Bopesa matoyi na maloba ya monoko na ngai!

²Nakofungola monoko na ngai mpo na lisese, nakosakola makambo oyo ebombama wuta na tango ya kala.

³Makambo oyo toyoka, oyo toyebi, oyo batata na biso bayebisa biso.

⁴Tokobombela yango bakitani na bango te, kasi tokoloba na bikeke oyo ekoya na sima nkembo ya masanzoli ya Yawe, nguya na Ye mpe bikamwa oyo asalaki.

⁵Apesaki malako mpo na bolamu ya Jakobi, atiaki mibeko kati na Isalaele, apesaki mitindo epai ya batata na biso ete bateya yango epai ya bana mibali na bango,

⁶mpo ete bikeke oyo ekoya sima eyeba yango, ekeke ya bana oyo bakobotama. Tika ete batelema mpe bayebisa yango na bana na bango,

⁷mpo ete batonga elikya na bango kati na Nzambe, babosana te misala ya Nzambe mpe babatela mibeko na Ye.

⁸Boye, bakozala te lokola bakoko na bango, oyo bazalaki mito makasi mpe batomboki, oyo mitema na bango ezalaki sembo te na miso ya Nzambe, mpe milimo na bango ezangaki boyengebene epai na Ye.

⁹Bato ya libota ya Efrayimi basimbaki batolotolo, kasi na mokolo ya etumba, bakimaki.

¹⁰Babatelaki te Boyokani ya Nzambe mpe baboyaki kotosa mibeko na Ye;

¹¹babosanaki bikamwa na Ye mpe makambo minene oyo atalisaki bango.

¹²Na miso ya bakoko na bango, asalaki bikamwa kati na Ejipito, na etuka ya Tsoani;

¹³akabolaki ebale monene mpo na kolekisa bango, atelemisaki mayi lokola mir.

¹⁴Na moyi, azalaki kotambolisa bango na nzela ya lipata; mpe na butu, na nzela ya pole ya moto.

¹⁵Apasolaki mabanga kati na esobe mpe amelisaki bango mayi ebele, lokola mayi ya bibale;

¹⁶abimisaki mayi wuta na libanga mpe asalaki ete etiola lokola mayi ya ebale.

¹⁷Kasi bakobaki kaka kosala masumu liboso na Ye, kotombokela Ye-Oyo-Aleki-Likolo, kati na esobe.

¹⁸Bamekaki Nzambe na nko, na kosenga bilei kolanda posa na bango.

¹⁹Balobaki mabe na tina na Nzambe: « Boni, Ye Nzambe azali penza na makoki ya kopesa biso bilei kati na esobe?

²⁰Solo, abetaki libanga, mayi ebimaki, mpe ebimaki penza ebele. Boni, akokoka lisusu kopesa biso mapa to misuni epai ya bato na Ye? »

²¹Tango Yawe ayokaki bongo, asilikaki makasi; moto na Ye epelelaki Jakobi, mpe kanda makasi na Ye ekitelaki Isalaele,

²²pamba te batiaki elikya na Nzambe te, bandimaki te ete akoki kokangola bango.

²³Nzokande, apesaki mitindo na mapata mpe afungolaki bikuke ya likolo,

²⁴anokiselaki bango mana lokola mvula mpo na kopesa bilei, apesaki bango ble ya Likolo.

²⁵Moko na moko aliaki mapa ya ba-anjelu. Atindelaki bango bilei ebele penza.

²⁶Wuta na likolo, atindikaki mosika mopepe ya Este; mpe na nguya na Ye, amemaki mopepe ya Sude.

²⁷Anokiselaki bango misuni lokola putulu, bandeke ebele lokola zelo ya ebale monene;

²⁸akweyiselaki bango yango kati na molako na bango, zingazinga ya bandako na bango ya kapo.

²⁹Baliaki mpe batondaki makasi; Nzambe apesaki bango biloko oyo bazalaki na yango posa.

³⁰Liboso ete posa na bango ekoka, wana bazalaki nanu na minoko etonda na bilei,

³¹kanda ya Nzambe ekweyelaki bango, abomaki bato minene kati na bango, anyokolaki bilenge ya Isalaele.

³²Kasi atako bongo, bakobaki kaka kosala masumu, bandimaki kaka te bikamwa na Ye.

³³Boye, asukisaki mikolo ya bomoi na bango lokola mopepe, mpe mibu na bango ya mbotama kati na somo.

³⁴Tango nyonso Nzambe azalaki koboma bango, bazalaki koluka Ye; bazalaki komizongisa noki epai na Ye.

³⁵Bazalaki kozongisa na makanisi na bango ete Nzambe nde azali Libanga na bango, ete Nzambe-Oyo-Aleki-Likolo azali Mosikoli na bango.

³⁶Kasi bazalaki koloba lokuta, minoko na bango ezalaki kokosa Ye;

³⁷mitema na bango ezalaki sembo te na miso na Ye, mpe bazalaki kobuka Boyokani na Ye.

³⁸Nzokande Ye, na mawa na Ye, azalaki kolimbisa mabe na bango na esika ya kobebisa bango; mbala mingi, azalaki kokanga motema na esika ya kopelisela bango kanda na Ye;

³⁹pamba te azalaki koyeba ete bazali kaka bato, bazali kaka lokola mopepe oyo ezali koleka mpe ekozonga lisusu te.

⁴⁰Mbala mingi, batombokelaki Ye kati na esobe mpe bayokisaki Ye mawa kati na bisika ya kokawuka;

⁴¹bazalaki kozongela komeka Nzambe, koyokisa Mosantu ya Isalaele mawa.

⁴²Babosanaki makambo minene oyo asalaki na nguya na Ye, mokolo oyo akangolaki bango wuta na maboko ya monyokoli;

⁴³babosanaki bikamwa oyo asalaki kati na Ejipito, misala minene oyo asalaki kati na etuka ya Tsoani.

⁴⁴Abongolaki bibale na bango makila; boye, bakokaki lisusu te komela na mayi na bango.

⁴⁵Atindelaki bango banzinzi oyo eswaka, mpe eliaki bango; mpe magorodo oyo ebebisaki bango.

⁴⁶Akabaki bambuma ya bilanga na bango epai ya mabanki, mpe mbuma ya mosala na bango epai ya mankoko.

⁴⁷Abebisaki bilanga na bango ya vino na nzela ya mvula ya mabanga, mpe banzete na bango ya sikomori na nzela ya mvula ya pembe;

⁴⁸akabaki bameme na bango epai ya mvula ya mabanga, mpe bibwele na bango epai ya kake.

⁴⁹Atindelaki bango kanda na Ye ya makasi lokola moto: kanda makasi, kotomboka, pasi mpe ba-anjelu oyo babebisaka.

⁵⁰Apesaki na kanda na Ye nzela ya kopela, abatelaki bango te na kufa; kasi akabaki bango na bokono oyo ebomaka.

⁵¹Abomaki bana mibali nyonso ya liboso kati na Ejipito, bambuma ya liboso ya makasi na bango na se ya bandako ya kapo ya Cham.

⁵²Abimisaki bato na Ye lokola etonga, amemaki bango kati na esobe lokola meme;

⁵³atambolisaki bango na kimia penza, babangaki eloko te; mpe ebale monene emelaki banguna na bango.

⁵⁴Amemaki bango na mokili na Ye ya bule, na ngomba oyo loboko na Ye ya nguya ezwaki;

⁵⁵abenganaki bikolo liboso na bango, apesaki bango etando lokola libula mpe avandisaki mabota ya Isalaele kati na bandako na bango ya kapo.

⁵⁶Kasi bamekaki Nzambe, batombokelaki Ye-Oyo-Aleki-Likolo mpe babatelaki te malako na Ye;

⁵⁷bapengwaki mpe babukaki mibeko ya boyokani, ndenge batata na bango basalaki; batengamaki lokola tolotolo oyo mbanzi na yango ekeyi na mopanzi;

⁵⁸bayokisaki Ye kanda na nzela ya bisambelo na bango ya likolo ya bangomba, mpe bapelisaki zuwa na Ye na nzela ya banzambe na bango ya bikeko.

⁵⁹Nzambe ayokaki mpe asilikaki makasi, abwakaki Isalaele mobimba;

⁶⁰asundolaki Mongombo ya Silo, ndako ya kapo oyo atelemisaki kati na bato,

⁶¹akabaki nguya na Ye na bowumbu, mpe lokumu na Ye na maboko ya monguna;

⁶²akabaki bato na Ye na mopanga, mpe asilikelaki libula na Ye.

⁶³Moto etumbaki bilenge mibali, mpe banzembo ya libala eyembamaki lisusu te mpo na lokumu ya bilenge basi.

⁶⁴Banganga-Nzambe bakufaki na mopanga, mpe basi oyo bakufisaki mibali balelaki te na banzembo ya matanga.

⁶⁵Nkolo alamukaki lokola moto oyo awuti na pongi, lokola moto oyo abimi na kwiti ya vino;

⁶⁶azokisaki banguna na Ye na sima, wana bazalaki kokima, ayokisaki bango soni ya libela.

⁶⁷Asundolaki bandako ya kapo ya Jozefi mpe aboyaki kopona libota ya Efrayimi;

⁶⁸kasi aponaki libota ya Yuda, ngomba Siona oyo alingaki;

⁶⁹atongaki Esika na Ye ya bule lokola bisika ya likolo makasi, lokola mabele oyo atia mpo na libela.

⁷⁰Aponaki Davidi, mosali na Ye, mpe azwaki ye kati na lopango ya meme;

⁷¹abengaki ye wuta na sima ya meme oyo azalaki kobatela mpo na kokomisa Ye mobateli ya Jakobi, bato na Ye, mpe ya Isalaele, libula na Ye.

⁷²Davidi abatelaki bango na motema ezanga pamela, mpe akambaki bango na maboko ya mayele.