Banzembo 147

¹Bokumisa Yawe! Tala ndenge ezali malamu kosanzola Nzambe na biso, mpe ndenge ezali kitoko kokumisa Ye!

²Yawe azali kotonga lisusu Yelusalemi epai wapi akosangisa bato ya Isalaele oyo bakenda na bowumbu.

³Abikisaka bato oyo batutami na mitema mpe akawusaka bapota na bango.

⁴Ayebi motango ya minzoto mpe abengaka moko na moko na kombo na yango.

⁵Nkolo na biso azali monene mpe atonda na nguya; mayele na Ye ezali na mondelo te.

⁶Yawe asungaka babola, kasi akitisaka bato mabe kino na mabele.

⁷Boyembela Yawe nzembo ya matondi! Bobetela Nzambe na biso lindanda mpo na kosanzola Ye!

⁸Azipaka likolo na mapata, abongisaka mvula mpo na mokili mpe abotisaka matiti na bangomba.

⁹Apesaka bilei epai ya bibwele mpe epai ya bana ya yanganga oyo ezali koganga mpo na nzala.

¹⁰Asepelaka na makasi ya mpunda te mpe alingaka te nguya ya moto;

¹¹kasi Yawe asepelaka na bato oyo batosaka Ye, ba-oyo batielaka bolingo na Ye motema.

¹²Yelusalemi, pesa nkembo na Yawe! Siona, kumisa Nzambe na yo!

¹³Alendisaka bikangelo ya bikuke na yo mpe apambolaka bana na yo epai na yo.

¹⁴Atiaka kimia na etuka na yo mpe atondisaka yo na farine.

¹⁵Atindaka mitindo na Ye na mokili, mpe maloba na Ye epanzanaka mbala moko!

¹⁶Anokisaka mvula ya pembe lokola bapwale ya meme mpe apanzaka mvula ya mabanga lokola putulu;

¹⁷akweyisaka mabanga ya mvula yango lokola mabanga ya mike-mike; nani akoki kotelema na malili na yango?

¹⁸Soki kaka atindi liloba, malili ekomaka kosila moke-moke; mpe soki atindi mopepe, mayi ekomaka kotiola.

¹⁹Asakolaki liloba na Ye epai ya Jakobi, mibeko mpe malako na Ye epai ya Isalaele.

²⁰Asalaki bongo na ekolo ata moko te; boye eyebaka mpe mibeko na Ye te. Bokumisa Yawe!