Banzembo 104

¹Eh molimo na ngai, pambola Yawe! Yawe, Nzambe na ngai, ozali monene! Olata kongenga mpe lokumu,

²omifinika moyi lokola kazaka, otanda likolo lokola ndako ya kapo.

³Opika makonzi na yango na mayi ya likolo, okomisaka mapata shar na Yo, otambolaka na mapapu ya mopepe.

⁴Okomisaka bantoma na Yo mipepe, mpe basali na Yo, ndemo ya moto.

⁵Otia mokili na likolo ya miboko na yango mpo ete eningana te seko na seko.

⁶Ozipa yango na mayi monene lokola elamba; mayi ezalaki kovanda na likolo ya bangomba.

⁷Kasi na pamela na Yo, mayi ekimaki; na lokito ya kake na Yo, mayi etiolaki,

⁸emataki na likolo ya bangomba, ekitaki na mabwaku, na bisika oyo obongisaki mpo na yango.

⁹Otiaki mondelo oyo ekoki koleka te; ekozonga lisusu te kozipa mokili.

¹⁰Obimisaka mayi ya bitima mpo na kosopa yango na mayi minene oyo elekaka na kati-kati ya bangomba;

¹¹ekomaka mayi ya komela mpo na banyama nyonso ya bilanga mpe mpo na ba-ane ya zamba.

¹²Bandeke ya likolo evandaka pembeni ya mayi yango mpe eyembaka kati na makasa.

¹³Wuta na bandako na Yo ya likolo, onokisaka mvula na likolo ya bangomba; mokili etondi na mbuma ya misala na Yo.

¹⁴Matiti ebotaka mpo na bibwele, mpe milona ya bato ekolaka mpo ete mabele ebotela bango bilei,

¹⁵vino mpo na kosepelisa mitema na bango, mafuta mpo na kongengisa bilongi na bango, mpe mapa mpo na kolendisa mitema na bango.

¹⁶Banzete ya Yawe etondi na mayi; ndenge wana nde ezali, banzete ya sedele ya Libani, oyo Yawe alona.

¹⁷Bandeke esalaka bazala na yango kuna, mpe nkoko evandaka na banzete ya sipele.

¹⁸Bangomba milayi ezali ekimelo mpo na bantaba ya zamba, mpe madusu ya mabanga ezali bibombamelo mpo na bampanya ya zamba.

¹⁹Osala sanza mpo na koyeba mikolo ya bafeti. Moyi eyebi tango na yango ya kolala.

²⁰Otindaka molili, mpe butu ekomaka. Bongo banyama nyonso ya zamba ekomaka kotambola-tambola.

²¹Bana ya nkosi egangaka sima na nyama mpe esengaka bilei epai ya Nzambe.

²²Soki moyi ebimi, nkosi elongwaka, ezongaka mpo na kolala na bisika na yango;

²³kasi moto abimaka mpo na kokende na mosala na ye mpe asalaka kino na pokwa.

²⁴Oh Yawe, misala na Yo ezali ebele! Osalaki nyonso na bwanya; mokili etondi na biloko oyo okela.

²⁵Tala ndenge ebale monene ezali molayi mpe epanzana, etonda na banyama oyo tokoki kotanga te, kobanda na oyo eleki mike kino na oyo eleki minene.

²⁶Kuna, bamasuwa ekendeke mpe ezongaka; bongo Leviatani oyo osala mpo ete esakanaka kuna.

²⁷Nyonso etalelaka Yo mpo ete opesa yango bilei na tango oyo ekoki.

²⁸Opesaka bilei, mpe ezwaka yango; ofungolelaka yango loboko na Yo, mpe etondaka na biloko.

²⁹Tango obombaka elongi na Yo, somo ekangaka yango; tango olongolaka yango pema, ekufaka mpe ezongaka na putulu;

³⁰tango otindaka pema Yo, ezwaka bomoi; mpe okomisaka mokili sika.

³¹Tika ete nkembo ya Yawe ewumela libela na libela! Tika ete Yawe asepela na misala na Ye!

³²Soki atali mokili, mokili elengaka; soki asimbi bangomba, ebimisaka milinga.

³³Nakoyembela Yawe bomoi na ngai mobimba; nakoyembela Nzambe na ngai tango nyonso nazali na bomoi.

³⁴Tika ete maloba na ngai esepelisa Ye! Tika ete Yawe azala esengo na ngai!

³⁵Tika ete bato ya masumu basila na mokili, mpe bato mabe bazala lisusu te! Oh molimo na ngai, pambola Yawe! Aleluya, bokumisa Yawe!