Banzembo 102

¹Libondeli ya moto na pasi, oyo abungisi elikya mpe azali kolela liboso ya Yawe.

²Yawe, yoka libondeli na ngai! Tika ete koganga na ngai ekoma kino epai na Yo!

³Kobombela ngai elongi na Yo te, wana nazali na pasi. Yoka libondeli na ngai na mokolo oyo nazali kobelela Yo; yanola ngai noki!

⁴Pamba te mikolo ya bomoi na ngai ezali kolimwa lokola molinga, mikuwa na ngai ezali kozika lokola makala ya moto.

⁵Motema na ngai ebungisi elikya mpe ezali komitungisa lokola matiti oyo bakati; mpo na yango, nakomi ata kobosana kolia bilei na ngai.

⁶Mpo ete naleli makasi, natikali kaka na poso ya nzoto likolo ya mikuwa.

⁷Nakomi lokola esulungutu ya esobe, lokola esulungutu ya bisika oyo ebeba.

⁸Pongi ekimi ngai; nakomi lokola ndeke oyo etikali yango moko na likolo ya ndako.

⁹Banguna na ngai batombokeli ngai, bazali kofinga ngai tango nyonso mpe bazali kosalela kombo na ngai mpo na kolakela bato mabe.

¹⁰Nakomi kolia putulu na esika ya bilei, mpe komela mayi esangana na mpinzoli na ngai.

¹¹Mpo na kanda monene na Yo, otombokeli ngai mpe obwaki ngai mosika.

¹²Mikolo ya bomoi na ngai ezali kokima lokola elili, mpe nakawuki lokola matiti.

¹³Kasi Yo Yawe, ozali Mokonzi mpo na libela, ozali Nzambe seko na seko.

¹⁴Okotelema solo mpo na Siona, pamba te ekomi tango ya koyokela yango mawa; tango oyo ekatama ekoki.

¹⁵Pamba te biso basali na Yo, tosepelaka na mabanga na yango, mpe toyokelaka putulu na yango mawa.

¹⁶Bikolo ekotosa Yawe, mpe bakonzi nyonso ya mokili bakondima nkembo na Yo.

¹⁷Pamba te Yawe akotonga lisusu Siona mpe akomonana kati na nkembo na Ye.

¹⁸Akoyanola libondeli ya bato oyo babungisaki biloko, mpe akondima mabondeli na bango.

¹⁹Tika ete bakoma yango mpo na ekeke oyo ekolanda, mpo ete bikelamu ya sika ekumisa Yawe.

²⁰Wuta na Esika na Ye ya bule, wuta na likolo, Yawe atalaki biso awa na mokili

²¹mpo na koyoka kolela ya bakangami kati na boloko mpe kokangola bato oyo bazwaki etumbu ya kufa.

²²Kombo ya Yawe ekokende sango kati na Siona, mpe masanzoli na Ye, kati na Yelusalemi

²³tango bato mpe bikolo bakosangana mpo na kogumbamela Yawe.

²⁴Na bomoi na ngai, abukaki lolendo ya makasi na ngai, mpe akitisaki motango ya mikolo ya bomoi na ngai.

²⁵Nalobaki: « Nzambe na ngai, Yo oyo ozali na bomoi seko na seko, koboma ngai te na kati-kati ya mikolo ya bomoi na ngai!

²⁶Na kala, otiaki miboko ya mokili, mpe maboko na Yo esalaki Likolo.

²⁷Bango, bakokufa; kasi Yo, okotikala seko na seko. Nzoto na bango ekolemba lokola elamba; okobongola bango lokola kazaka, mpe bakolimwa.

²⁸Kasi Yo, ozali ndenge moko, mibu na Yo ekotikala kosuka te.

²⁹Bana ya basali na Yo bakozwa esika ya kovanda, mpe bakitani na bango bakowumela liboso na Yo. »