Banzembo 21

¹Wuta na buku ya mokambi ya bayembi. Nzembo ya Davidi.

²Yawe, mokonzi azali kosepela na nguya na Yo; Tala ndenge nini elonga oyo opesi ye epesi ye esengo monene!

³Okokisi posa ya motema na ye mpe opimeli ye te oyo azalaki kosenga Yo.

⁴Oyei epai na ye na mapamboli ya motuya. Na moto na ye, olatisi ye motole ya wolo oyo basangisa na eloko mosusu.

⁵Asengaki Yo bomoi, mpe opesaki ye yango; opesaki ye bomoi molayi mpe ya libela na libela.

⁶Nkembo na ye ezali monene mpo na lobiko oyo opesaki ye; olatisaki ye na kongenga mpe na lokumu.

⁷Solo, okomisi ye etima ya mapamboli ya seko na seko; okomisaki ye moto ya esengo na miso na Yo.

⁸Mokonzi atiaka elikya na Yawe, aninganaka te mpo na bolingo ya Ye-Oyo-Aleki-Likolo.

⁹Loboko na Yo ekokanga banguna na Yo nyonso; loboko na Yo ya mobali ekokanga bayini na Yo.

¹⁰Tango okomimonisa, okokomisa bango lokola fulu ya moto. Yawe akosilisa koboma bango na kanda na Ye, mpe moto ekozikisa bango.

¹¹Okolimwisa mabota na bango na mokili, mpe bakitani na bango, kati na bana ya bato.

¹²Atako bakani kosala Yo mabe, atako basali mabongisi ya mabe mpo na kotelemela Yo, bakotikala kolonga ata moke te;

¹³pamba te okobengana bango tango okobwakela bango bambanzi ya tolotolo na Yo.

¹⁴Yawe, telema na nguya na Yo! Tokoyemba nguya na Yo na nzela ya banzembo.