Zabbuli 97

¹Mukama afuga; ensi esanyuke, n’embalama eziri ewala zijaguze.

²Ebire n’ekizikiza bimwetooloola; obutuukirivu n’obwenkanya gwe musingi gw’entebe y’obwakabaka bwe.

³Omuliro gumukulembera ne gwokya abalabe be ku njuyi zonna.

⁴Okumyansa kwe kumulisa ensi; ensi n’ekulaba n’ekankana.

⁵Ensozi zisaanuuka ng’envumbo awali Mukama, mu maaso ga Mukama ow’ensi yonna.

⁶Eggulu lirangirira obutuukirivu bwe; n’abantu bonna ne balaba ekitiibwa kye.

⁷Abasinza ebifaananyi ebikole n’emikono bonna baswadde, abo abeenyumiririza mu bifaananyi ebyole. Mumusinze mwe mwenna bakatonda.

⁸Sayuuni akiwulira n’asanyuka, n’ebyalo bya Yuda bijaguza; kubanga ogoberera eby’ensonga, Ayi Katonda.

⁹Kubanga ggwe, Ayi Mukama, oli waggulu nnyo okusinga ensi; ogulumizibwa okusinga bakatonda bonna.

¹⁰Abo abaagala Mukama bakyawa ekibi, akuuma obulamu bw’abamwesiga, n’abawonya okuva mu mukono gw’omukozi w’ebibi.

¹¹Omusana gwe gwakira abatuukirivu, n’abalina omutima ogw’amazima bajjula essanyu.

¹²Musanyukirenga mu Mukama mmwe abatuukirivu, era mwebazenga erinnya lye ettukuvu.