Zabbuli 83

¹Ayi Katonda, tosirika busirisi n’etebaayo kanyego. Tosirika, Ayi Katonda, n’otobaako ky’okola.

²Wuliriza oluyoogaano oluva mu balabe bo; abo abaagala okukulwanyisa bali mu keetalo.

³Bateesa n’obujagujagu okulumba abantu bo; basalira enkwe abo b’oyagala ennyo.

⁴Bagamba nti, “Mujje eggwanga lyabwe tulizikirize, n’erinnya lya Isirayiri lireme okujjukirwanga emirembe gyonna!”

⁵Basala olukwe n’omwoyo gumu; beegasse wamu bakulwanyise.

⁶Abantu b’omu weema za Edomu, n’ez’Abayisimayiri, n’eza Mowaabu, n’Abakagale;

⁷Gebali ne Amoni, ne Amaleki, n’Abafirisuuti n’abantu b’omu Ttuulo.

⁸Era ne Asiriya yeegasse nabo, okuyamba bazzukulu ba Lutti.

⁹Bakoleko nga bwe wakola Midiyaani, era nga bwe wakola Sisera ne Yabini ku mugga Kisoni,

¹⁰abaazikiririra mu Endoli ne bafuuka ng’obusa ku ttaka.

¹¹Abakungu baabwe bafuule nga Olebu ne Zeebu, n’abalangira baabwe bonna bafuuke nga Zeba ne Zalumunna,

¹²abaagamba nti, “Ka tutwale amalundiro ga Katonda, tugeefunire.”

¹³Ayi Katonda wange, bafuumuule ng’enfuufu, obasaasaanye ng’ebisusunku mu mbuyaga.

¹⁴Ng’omuliro bwe gwokya ekibira; n’ennimi z’omuliro ne zikoleeza ensozi,

¹⁵naawe bw’otyo bw’oba obawondera n’omuyaga gwo, obatiise ne kibuyaga wo ow’amaanyi.

¹⁶Baswaze nnyo, balyoke banoonyenga erinnya lyo, Ayi Mukama.

¹⁷Bajjule ensonyi n’okutya, bazikirire nga baswadde nnyo.

¹⁸Balyoke bategeere nti, Ggwe wekka, Ayi Mukama, ggw’oyitibwa Yakuwa, gw’obeera waggulu ennyo ng’ofuga ensi yonna.