Zabbuli 145

¹Nnaakugulumizanga ggwe Katonda wange, era Kabaka wange; era nnaatenderezanga erinnya lyo buli lunaku emirembe n’emirembe.

²Nnaakutenderezanga buli lunaku; era nnaasuutanga erinnya lyo emirembe n’emirembe.

³Mukama mukulu, wa kitiibwa, era asaanira okutenderezebwanga ennyo, n’obukulu bwe tebwogerekeka.

⁴Buli mulembe gunaatenderanga gunnaagwo ebikolwa byo, era gunaatendanga emirimu gyo egy’amaanyi.

⁵Nnaatendanga obukulu n’obulungi bw’ekitiibwa kyo, era nnaafumiitirizanga ku bikolwa byo ebyewuunyisa.

⁶Abantu banaatendanga amaanyi g’ebikolwa byo eby’ekitalo, nange nnaatendanga obukulu bwo obw’ekitiibwa.

⁷Banaayogeranga ku bulungi bwo obw’ekitalo nga bajaguza; era banaayimbanga olw’obutuukirivu bwo.

⁸Mukama wa kisa, ajudde okusaasira, alwawo okusunguwala era ajudde okwagala okutaggwaawo.

⁹Mukama mulungi eri buli muntu, era okusaasira kwe kubuna byonna bye yatonda.

¹⁰Byonna bye watonda binaakutenderezanga, Ayi Mukama; n’abatukuvu bo banaakugulumizanga.

¹¹Banaayogeranga ku kitiibwa ky’obwakabaka bwo, era banaatendanga amaanyi go.

¹²Balyoke bategeeze abantu bonna ebikolwa byo eby’amaanyi, n’ekitiibwa ky’obukulu obw’obwakabaka bwo.

¹³Obwakabaka bwo, bwakabaka bwa lubeerera, n’obufuzi bwo bwa mirembe na mirembe. Mukama by’ayogera byonna bya bwesigwa, n’ebikolwa bye bijjudde okusaasira.

¹⁴Mukama awanirira abo bonna abazitoowereddwa, era ayimusa bonna abagwa.

¹⁵Amaaso g’abantu bonna gatunuulira ggwe, Ayi Mukama, era bonna gw’obawa ebyokulya mu biseera byabyo.

¹⁶Oyanjuluza engalo zo, ebiramu byonna n’obigabira bye byetaaga ne bikkuta.

¹⁷Mukama mutuukirivu mu bikolwa bye byonna era ayagala byonna bye yatonda.

¹⁸Mukama abeera kumpi n’abo bonna abamukoowoola; abo bonna abamukoowoola mu mazima.

¹⁹Abo bonna abamussaamu ekitiibwa abawa bye baagala, era awulira okukaaba kwabwe n’abawonya.

²⁰Mukama akuuma bonna abamwagala, naye abakola ebibi alibazikiriza.

²¹Akamwa kange kanaatenderezanga Mukama, era na buli kitonde kinaatenderezanga erinnya lye ettukuvu emirembe n’emirembe.