Zabbuli 96

¹Muyimbire Mukama oluyimba oluggya; muyimbire Mukama mmwe ensi yonna.

²Muyimbire Mukama; mutendereze erinnya lye, mulangirire obulokozi bwe buli lukya.

³Mutende ekitiibwa kye mu mawanga gonna, eby’amagero bye mubimanyise abantu bonna.

⁴Kubanga Mukama mukulu era asaanira nnyo okutenderezebwa; asaana okutiibwa okusinga bakatonda bonna.

⁵Kubanga bakatonda bonna abakolebwa abantu bifaananyi bufaananyi; naye Mukama ye yakola eggulu.

⁶Ekitiibwa n’obukulu bimwetooloola; amaanyi n’obulungi biri mu nnyumba ye entukuvu.

⁷Mugulumize Mukama mmwe ebika eby’amawanga byonna; mutende ekitiibwa kya Mukama awamu n’amaanyi ge.

⁸Mugulumize Mukama mu ngeri esaanira erinnya lye; muleete ekiweebwayo mujje mu mbuga ze.

⁹Musinze Mukama mu kitiibwa eky’obutuukirivu bwe. Ensi yonna esinze Mukama n’okukankana.

¹⁰Mutegeeze amawanga gonna nti Mukama y’afuga. Ensi nnywevu, tewali asobola kuginyeenyaako; Mukama aliramula abantu mu bwenkanya.

¹¹Kale eggulu lisanyuke n’ensi ejaguze; ennyanja eyire ne byonna ebigirimu.

¹²Ennimiro n’ebirime ebizirimu bijaguze; n’emiti gyonna egy’omu kibira nagyo gimutendereze n’ennyimba ez’essanyu.

¹³Kubanga Mukama ajja; ajja okusalira ensi omusango. Mukama aliramula ensi mu butuukirivu, n’abantu bonna abalamule mu mazima.