Zabbuli 115

¹Si ffe, Ayi Mukama, si ffe. Wabula erinnya lyo lye ligwana okuweebwanga ekitiibwa, olw’okwagala kwo n’olw’obwesigwa bwo.

²Lwaki amawanga gabuuza nti, “Katonda waabwe ali ludda wa?”

³Katonda waffe ali mu ggulu; akola buli ky’ayagala.

⁴Bakatonda baabwe bakole mu ffeeza ne zaabu, ebikolebwa n’emikono gy’abantu.

⁵Birina emimwa, naye tebyogera; birina amaaso, naye tebiraba.

⁶Birina amatu, naye tebiwulira; birina ennyindo, naye tebiwunyiriza.

⁷Birina engalo, naye tebikwata; birina ebigere, naye tebitambula; ne mu bulago bwabyo temuvaamu ddoboozi n’akamu,

⁸abakozi ababikola, n’abo bonna ababyesiga balibifaanana.

⁹Mmwe ennyumba ya Isirayiri mwesigenga Mukama, ye mubeezi wammwe era ye ngabo yammwe.

¹⁰Mmwe ennyumba ya Alooni mwesigenga Mukama, ye mubeezi wammwe era ye ngabo yammwe.

¹¹Mmwe abamutya, mwesigenga Mukama, ye mubeezi wammwe, era ye ngabo yammwe.

¹²Mukama anaatujjukiranga, era anaatuwanga omukisa. Ab’ennyumba ya Isirayiri anaabawanga omukisa; ab’omu nnyumba ya Alooni anaabawanga omukisa;

¹³n’abo abamutya, ab’ekitiibwa n’abatali ba kitiibwa, Mukama anaabawanga omukisa.

¹⁴Mukama abaaze mweyongere nnyo obungi, mmwe n’abaana bammwe.

¹⁵Mukama, eyakola eggulu n’ensi, abawe omukisa.

¹⁶Eggulu ery’oku ntikko lya Mukama, naye ensi yagiwa abantu bonna.

¹⁷Abafu tebatendereza Mukama, wadde abo abaserengeta emagombe.

¹⁸Naye ffe tunaatenderezanga Mukama, okuva leero n’okutuusa emirembe gyonna. Mutendereze Mukama!